“Pakuti Chiuta wakatipa mzimu wawofi yayi, kweni wankhongono na wachitemwa ndiposo wamahara.”—2 Timote 1:7, Mang’anamuliro gha Charu Chiphya.

 “Pakuti Ciuta wakatipa mzimu wa wofi cara, kweni wa nkhongono na wa citemwa ndiposo wa mahara.”—2 Timote 1:7, Tumbuka Bible.

 Chiuta wangawovwira munthu kuti waŵe na chikanga chakuchita icho ntchiwemi. Chiuta wakukhumba yayi kuti munyake waŵe na wofi wambura kwenelera uwo ungamupangiska kuti waleke kuchita vinthu vyambura kumukondweska.

 Wonani mikhaliro yitatu yakufuma kwa Chiuta iyo yili pa vesi ili ndipo yikutovwira kutonda wofi.

 ‘Nkhongono.’ Ŵakhristu wakufiska kuteŵetera Chiuta mwachikanga nanga vingaŵa kuti ŵalwani ŵawo mbanandi kweniso vinthu vili makora yayi. Ŵakopa na kuwelera nyuma yayi. (2 Ŵakorinte 11:23-27) Kasi ŵakufiska wuli kuchita nthena? Mpositole paulosi wakati: “Mu vinthu vyose, nkhusanga nkhongono mwa uyo wakunipa nkhongono.” (Ŵafilipi 4:13) Chiuta wangaŵapa awo ŵakumusopa “nkhongono zakuluska zakawiro” kuti ŵatonde suzgo lililose.—2 Ŵakorinte 4:7.

 ‘Chitemwa.’ Chitemwa chanadi pa Chiuta chikovwira Ŵakhristu kuvilikilira icho ntchakwenelera mwachikanga. Mwakuyana waka, chitemwa pa ŵanji chikovwira Mkhristu kuti ŵaŵikenge vyakukhumba vya ŵanji panthazi kuluska vyake, nanga vingaŵa kuti wakususkika panji umoyo wake ungaŵa pangozi.—Yohane 13:34; 15:13.

 ‘Mahara.’ Mu Baibolo, mazgu ghakuti mahara kanandi ghakwimira vyakusankha ivyo Mkhristu wakupanga mwakukolerana na fundo izo zikusangika mu Malemba. Munthu uyo wali na mahara wakughanaghana makora nanga vingaŵa kuti wakusangana na masuzgo. Wakusankha vyakuchita mwakukolerana na maghanoghano gha Chiuta, wakumanya kuti ubwezi wake na Chiuta ngwakuzirwa chomene kuluska ivyo iyo wangaghanaghana.

 Buku la mu Baibolo la 2 Timote likalembeka na Mpositole Paulosi nga ni kalata yakuluta kwa mubwezi kweniso wantchito munyake Timote. Mu kalata iyi, Paulosi wakamuchiska mwachitemwa muwukirano Timote kuti walutilire kulimbikira kuteŵetera Chiuta. (2 Timote 1:1, 2) Timote wakwenera kuti wakaŵa munthu wasoni, icho panji chikamuchitiskanga kuti wagongowenge pakuchita milimo ya Chikhristu. (1 Timote 4:12) Ndipouli Paulosi wakakumbuska Timote kuti wali kupokera chawanangwa, uwo mbuteŵeti wapadera mu mpingo wa Chikhristu. Wakamuchiska Timote kuti wagwiliskirenge ntchito mazaza ghake para wakulaŵilira mpingo, para wakupharazga makani ghawemi, na para wakuzizipizga masuzgo chifukwa cha chipulikano chake.—2 Timote 1:6-8.

 Nangauli mazgu agha ghakalutanga kwa Timote, kweni ghakusimikizgira wose awo ŵakukhumba kuteŵetera Chiuta mazuŵa ghano kuti waŵapenge wovwiri uwo ŵakukhumbikwira kuti viŵayendere makora nanga ŵangasangana na masuzgo wuli.