“Kwenjerwa napachoko chara vya zuŵa lakulondezgapo, chifukwa zuŵa lakulondezgapo liŵenge na vyenjezgo vyake. Zuŵa lililose lili na masuzgo ghake.”—Mateyu 6:34, Mang’anamuliro gha Charu Chiphya.

 “Rekani kwenjerwa na vya na machero chifukwa zuŵa la machero liti lijenjerwerenge lekha. Zuŵa lirilose liri na suzgo lakhe lakukwanira.”—Mateyu 6:34, Mazgu gha Chiuta mu Kang’anamuliro Kaphya.

 Yesu uyo wakayowoya mazgu agha, wakasimikizgira awo ŵakamutegherezganga kuti ŵakwenera kwenjerwa mwakujumphizga yayi na vyamunthazi. M’malo mwake, ŵakwenera kulimbana na suzgo la zuŵa lililose pa lekha.

 Apa Yesu wakang’anamuranga kuti tileke kughanaghana vya machero panji kunozgekera vyamunthazi yayi. (Zintharika 21:5) Kweni wakatovwiranga kuti tileke kukhalira waka kwenjerwa panji kufipa chomene mtima na vyamachero. Chifukwa para tingachita nthena mbwenu tingaŵa ŵakukondwa yayi kweniso vingatitondeska kuchita milimo yinyake. Kwenjerwa kungamazga yayi masuzgo agho tisanganenge nagho munthazi. Nakuti kanandi ivyo tikwenjerwa navyo vikuchitika yayi kweniso vikuzakaŵa nga umo tikaghanaghaniranga yayi.

 Yesu wakayowoya mazgu agha pa Upharazgi wake wa pa Phiri uwo ngwakumanyikwa chomene, ndipo ivyo wakayowoya vikusangika pa Mateyu chaputara 5-7. Pa upharazgi wake wa pa phiri, Yesu wakalongosora kuti kwenjerwa kungasintha panji kusazgirako umoyo withu yayi. (Mateyu 6:27) Wakayowoyaso kuti para tikumugomezga chomene Chiuta pa umoyo withu, tikwenera kwenjerwa mwakujumphizga yayi na vya machero. Usange Chiuta wakupwelelera vyakumera na vinyama, wangaleka yayi kupwelelera awo ŵakumuteŵetera.—Mateyu 6:25, 26, 28-33.