Luka 1:1-80

JULANI

Kwa Tiyofilo (1-4)
Gabriyeli wakuyowoyerathu vya kubabika kwa Yohane Mubatizi (5-25)
Gabriyeli wakuyowoyerathu vya kubabika kwa Yesu (26-38)
Mariya wakuluta kwa Elizabeti (39-45)
Mariya wakuchindika Yehova (46-56)
Yohane wakubabika, ŵakumuthya zina (57-66)
Uchimi wa Zekariya (67-80)

1 Ŵanthu ŵanandi ŵalemba nkhani za vinthu ivyo tikuvigomezga.+ ² Ŵanyake awo ŵakatiphalira vinthu ivi ni awo kufuma pakwamba ŵakaŵa ŵakaboni ŵakuwona na maso+ na ŵapharazgi ŵa uthenga.+ ³ Ntheura ŵakuchindikika ŵa Tiyofilo,+ nane napenjerezga vinthu vyose ivi ndipo naŵikapo mtima kumulemberani mu ndondomeko yiwemi. ⁴ Nachita nthena kuti mumanye makora unenesko wa vinthu ivyo mwasambizgika pamulomo.+ ⁵ Mu mazuŵa gha Herode,*+ themba la Yudeya, kukaŵa wasembe* zina lake Zekariya wa gulu la Abiya.+ Muwoli wake wakaŵa Elizabeti, wakafuma pa ŵana ŵanakazi ŵa Aroni. ⁶ Wose ŵakaŵa ŵarunji panthazi pa Chiuta, ŵakaŵa ŵambura kafukwa, chifukwa ŵakapulikiranga malango ghose na kusungilira ivyo Yehova* wakukhumba. ⁷ Kweni ŵakaŵavya mwana, chifukwa Elizabeti wakaŵa chumba, ndipo wose ŵakaŵa ŵachekuru. ⁸ Zekariya wakateŵetanga nga ngwasembe pamaso pa Chiuta, kwimira gulu lake.+ ⁹ Ndipo yikaŵa nyengo yake yakupelekera vyakununkhira+ kuyana na dango ilo likaŵikika* pa mulimo wa usembe. Ntheura wakanjira mu malo ghakupatulika gha Yehova.*+ ¹⁰ Wumba wose wa ŵanthu ukalombanga kuwaro pa ora lakupelekera vyakununkhira. ¹¹ Mungelo wa Yehova* wakawoneka kwa iyo, wakimilira kumalyero kwa jotchero la vyakununkhira. ¹² Kweni Zekariya wakati wawona mungelo wakahangayika ndipo wakachita wofi. ¹³ Kweni mungelo wakati kwa iyo: “Kopa chara Zekariya, chifukwa Chiuta wapulika kuŵeya kwako. Muwoli wako Elizabeti wakubabirenge mwana msepuka, ndipo zina lake umuthyenge Yohane.+ ¹⁴ Usekelerenge na kukondwa chomene, ndipo para mwana wababika ŵanandi ŵazamusekelera,+ ¹⁵ chifukwa wazamuŵa mukuru pamaso pa Yehova.*+ Kweni wangazakamwanga vinyo chara panji chakumwa chakuloŵezga.+ Mwana uyu wazamuzuzgika na mzimu utuŵa kufuma waka mu nthumbo ya anyina.+ ¹⁶ Wazamuwezgera Ŵaisrayeli ŵanandi kwa Yehova* Chiuta wawo.+ ¹⁷ Kweniso wazamudangira panthazi pa Chiuta mu mzimu na nkhongono za Eliya,+ kuti wawezgere mitima ya awiskewo ku ŵana+ kweniso kuti wawezgere ŵambura kupulikira ku vinjeru vya ŵarunji. Wazamuchita ivi kuti wanozgere Yehova* ŵanthu ŵakunozgeka.”+ ¹⁸ Ndipo Zekariya wakati kwa mungelo: “Kasi ningagomezga wuli ichi? Pakuti nili muchekuru ndipo muwoli wane nayo ni muchekuru.” ¹⁹ Mungelo wakamuzgora kuti: “Ndine Gabriyeli,+ uyo wakwimilira pamaso pa Chiuta,+ ndipo natumika kuti niyowoye nawe na kupharazga makani ghawemi agha kwa iwe. ²⁰ Kweni wona, uŵenge wambura kuyowoya m’paka pa zuŵa ilo vinthu ivi vizamuchitikira, chifukwa wagomezga chara mazgu ghane, agho ghazamufiskika pa nyengo yake.” ²¹ Ŵanthu ŵakalindiliranga Zekariya, ndipo ŵakazizwa kuwona kuti wakachedwa mu malo ghakupatulika. ²² Kweni wakati wafuma, wakatondeka kuyowoya nawo, ndipo iwo ŵakamanya kuti wawona mboniwoni mu malo ghakupatulika. Pakuti wakaŵa mbuwu, wakalutilira kuyowoya nawo na mawoko. ²³ Mazuŵa gha uteŵeti wake wakupatulika ghakati ghamara, wakaluta ku nyumba yake. ²⁴ Pakati pajumpha mazuŵa, muwoli wake Elizabeti wakaŵa na nthumbo, ndipo kwa myezi yinkhondi wakafumangapo chara pa nyumba, wakati: ²⁵ “Umu ndimo Yehova* wanichitira mu mazuŵa agha. Wazgokera kwa ine na kunifyura soni ku ŵanthu.”+ ²⁶ Apo Elizabeti wakaŵa na nthumbo ya myezi 6, Chiuta wakatuma mungelo Gabriyeli+ kuya ku msumba wa Galileya wakuchemeka Nazarete. ²⁷ Wakamutuma kwa mwali+ uyo wakalayizgika nthengwa* na mwanalume zina lake Yosefe wa nyumba ya Davide. Mwali uyu wakaŵa Mariya.+ ²⁸ Mungelo wakati wafika wakaphalira Mariya kuti: “Monire iwe wakutumbikika chomene, Yehova* wali nawe.” ²⁹ Kweni mwali wakasuzgika chomene maghanoghano na mazgu agha ndipo wakaghanaghaniranga ng’anamuro la katawuzgiro aka. ³⁰ Mungelo wakati kwa iyo: “Kopa chara Mariya, pakuti watumbikika na Chiuta. ³¹ Ndipo wona, uŵenge na nthumbo na kubaba mwana mwanalume.+ Zina lake umuthye Yesu.+ ³² Iyo wazamuŵa mukuru,+ wazamuchemeka Mwana wa Wapachanya Nkhanira.+ Ndipo Yehova* Chiuta wazamumupa chitengo cha* Davide, awiske.+ ³³ Wazamuwusa nga ni Themba pa nyumba ya Yakhobe muyirayira, ndipo Ufumu wake uzamumara chara.”+ ³⁴ Kweni Mariya wakati kwa mungelo: “Kasi ichi chichitikenge wuli apo nindagonanepo na mwanalume?”+ ³⁵ Mungelo wakamuzgora kuti: “Mzimu utuŵa wizenge pa iwe,+ ndipo nkhongono ya Wapachanya Nkhanira yikubenekelerenge. Ntheura uyo wababikenge wazamuchemeka mutuŵa,+ Mwana wa Chiuta.+ ³⁶ Wona, mubali wako Elizabeti, uyo wakachemekanga chumba nayo wali na nthumbo ya mwana msepuka mu uchekuru wake, ndipo uwu ni mwezi wake wa 6. ³⁷ Chifukwa kwa Chiuta kulije mazgu agho ghangatondeka kuchitika.”+ ³⁸ Ndipo Mariya wakati: “Wonani, muzgakazi wa Yehova! Vichitike kwa ine kuyana na mazgu ghinu.” Penepapo mungelo wakafumako kwa iyo. ³⁹ Mu mazuŵa agha, Mariya wakawuka mwaluŵiro, wakaluta mu charu cha mapiri, ku msumba wa Yuda. ⁴⁰ Ndipo wakanjira mu nyumba ya Zekariya na kutawuzga Elizabeti. ⁴¹ Elizabeti wakati wapulika kutawuzga kwa Mariya, bonda mu nthumbo yake wakabwalanthuka. Ndipo mzimu utuŵa ukiza pa Elizabeti, ⁴² ndipo wakachemerezga kuti: “Wakutumbikika ndiwe pakati pa ŵanakazi, ndipo chakutumbikika ntchipambi cha nthumbo yako! ⁴³ Ndine njani ine kuti mama wa Fumu yane wize kuzakanichezgera? ⁴⁴ Wona, nati napulika kutawuzga kwako, bonda wangubwalanthuka mwakukondwa mu nthumbo yane. ⁴⁵ Kweniso wakukondwa ni mwanakazi uyo wakagomezga, chifukwa ivyo Yehova* wakayowoya kwa iyo vizamufiskika nadi.” ⁴⁶ Mariya wakati: “Umoyo wane ukukuzga Yehova.*+ ⁴⁷ Mzimu wane ungaleka chara kuŵa na chimwemwe chikuru kwa Chiuta Mponoski wane,+ ⁴⁸ chifukwa walaŵiska kuyuyuka kwa muzgakazi wake.+ Wonani, kufuma sono kuya munthazi miwiro yose yinichemenge wakutumbikika.+ ⁴⁹ Pakuti Wankhongono wanichitira milimo yikuru, ndipo zina lake ndituŵa.+ ⁵⁰ Ndipo wakulongora lusungu lwake ku miwiro na miwiro ku awo ŵakumopa.+ ⁵¹ Iyo wachita milimo yankhongono na woko lake. Wambininiska awo mbakujikuzga mu mitima yawo.+ ⁵² Wakhizga pa vitengo ŵanthu ŵankhongono+ na kukwezga ŵapasi.+ ⁵³ Wakhutiska ŵanjara na vinthu viwemi+ ndipo ŵasambazi waŵawezga mawoko ghawaka. ⁵⁴ Wawovwira muteŵeti wake Israyeli, na kulongora lusungu lwake+ ⁵⁵ kwa Abrahamu na ku mphapu*+ yake muyirayira, nga umo wakayowoyera ku ŵasekuru ŵithu.” ⁵⁶ Mariya wakakhala na Elizabeti pafupifupi myezi yitatu, ndipo wakawelera ku nyumba yake. ⁵⁷ Nyengo yakuti Elizabeti wababe yikakwana, ndipo wakababa mwana msepuka. ⁵⁸ Ndipo ŵazengezgani na ŵabali ŵake ŵakapulika kuti Yehova* wamuchitira lusungu Elizabeti, ndipo ŵakasekelera pamoza nayo.+ ⁵⁹ Pa zuŵa la 8 ŵakiza kuti ŵamukotore mwana,+ ndipo ŵakatenge ŵamuthye zina la awiske, Zekariya. ⁶⁰ Kweni anyina ŵakazgora kuti: “Yayi! kweni wachemekenge Yohane.” ⁶¹ Ŵakati kwa iyo: “Palije mubali wako uyo wakuchemeka na zina ili.” ⁶² Ndipo ŵakafumba wiske wa mwana kuti wayowoye zina ilo wakakhumbanga kumuthya. Pakufumba ŵakayowoya nayo na mawoko. ⁶³ Wiske wakapempha chakulembapo na kulemba kuti: “Zina lake ni Yohane.”+ Ndipo wose ŵakazizwa. ⁶⁴ Nyengo yeneyiyo, mulomo wake ukabanuka ndipo lulimi lwake lukafwatuka. Wakamba kuyowoya+ na kulumba Chiuta. ⁶⁵ Wose ŵakukhala mu chikaya chawo ŵakaŵa na wofi, ndipo ŵanthu ŵakamba kuyowoya vinthu vyose ivi mu charu chose cha mapiri cha Yudeya. ⁶⁶ Wose awo ŵakapulika ŵakavisunga mu mitima yawo, ŵakati: “Kasi mwana uyu wazamuŵa wuli?” Pakuti woko la Yehova* likaŵa nayo nadi. ⁶⁷ Wiske Zekariya wakazuzgika na mzimu utuŵa, ndipo wakachima kuti: ⁶⁸ “Walumbike Yehova* Chiuta wa Israyeli,+ chifukwa wazgokera ku ŵanthu ŵake na kuŵawombora.+ ⁶⁹ Watiwuskira sengwe* la chiponosko*+ mu nyumba ya Davide muteŵeti wake.+ ⁷⁰ Vili nga umo wakayowoyera kwizira mu mulomo wa ntchimi zake zituŵa zakale.+ ⁷¹ Wakayowoya kuti watithaskenge ku ŵalwani ŵithu na ku woko la wose awo ŵakutitinkha.+ ⁷² Wazamufiska mazgu ghake agho wakayowoya ku ŵasekuru ŵithu na kuŵalongora lusungu. Wakumbukenge phangano lake lituŵa,+ ⁷³ chilapo icho wakalapa kwa Abrahamu sekuru withu.+ ⁷⁴ Para Chiuta watithaska ku ŵalwani ŵithu, timuchitirenge uteŵeti wakupatulika kwambura wofi, ⁷⁵ mwakugomezgeka kweniso mwaurunji pa maso pake mazuŵa ghithu ghose. ⁷⁶ Kweni iwe wamwana, uchemekenge ntchimi ya Wapachanya Nkhanira, pakuti uzamudangira panthazi pa Yehova* kunozga nthowa zake.+ ⁷⁷ Kumanyiska ŵanthu kuti Chiuta waŵagowokerenge zakwananga zawo+ na kuŵaponoska, ⁷⁸ pakuti ngwalusungu. Chifukwa cha lusungu ulu, tizamuwona ungweru kufuma kuchanya, uwo ukuŵala para kwacha. ⁷⁹ Uzamuŵalira awo ŵali mu chisi na mu mfwiri wa nyifwa,+ na kulongozga malundi ghithu mu nthowa ya mtende.” ⁸⁰ Mwana Yohane wakakura na kuŵa wankhongono mu mzimu. Wakakhalanga mu mapopa m’paka pa zuŵa ilo wakajilongora pakweru kwa Israyeli.