Salimo 38:1-22
Sumu ya Davide ya chikumbusko.
38 A Yehova, munganichenyanga uku muli na ukali yayi,Nanga nkhunilanga uku mwatukutwa.+
2 Pakuti mivi yinu yanilasa mukati,Woko linu likuninyekezga.+
3 Thupi lane lose ndilwari* chifukwa cha ukali winu.
Mu viwangwa vyane mulije mtende chifukwa cha kwananga kwane.+
4 Pakuti mphuvya zane zabizga mutu wane.+Zikunitonda kunyamura nga ni katundu muzito.
5 Vilonda vyane vikununkha na kunyekaChifukwa cha uchindere wane.
6 Nasuzgika na kulombotoka chomene.Nkhwenda mu chitima muhanya wose.
7 Mukati mwane mukugolera,*Thupi lane lose ndilwari.+
8 Nazilirika na kuteketeka chomene.Nkhutampha* chifukwa mtima wane ukukweŵeka.
9 A Yehova, vyose ivyo nkhukhumba vili pamaso pinu,Kudagha kwane kundabisike kwa imwe.
10 Mtima wane ukumwantha, nkhongono zane zamara,Ndipo ungweru wa maso ghane wafumamo.+
11 Ŵabwezi na ŵanyane ŵakunichimbira chifukwa cha suzgo yane,Awo nkhutemwana nawo ŵakwimilira patali.
12 Awo ŵakupenja umoyo wane ŵakuthya vipingo,Awo ŵakukhumba kunipweteka ŵakuyowoya vya pharanyiko,+Ŵakuyowoya upusikizgi muhanya wose.
13 Kweni nga ni munthu wakumangwa, nkhupulika chara.+Nga ni mbuwu, nkhujura chara mulomo wane.+
14 Nazgoka nga ni munthu wambura kupulika,Uyo mulomo wake ulije chakuyowoya kuti wajivikilire.
15 Pakuti ine nkhalindiliranga imwe, A Yehova,+Ndipo mukanizgora, A Yehova Chiuta wane.+
16 Pakuti nkhati: “Ŵangagiyanga pa ine chara,Panji kujihaya pa ine usange lundi lane latelemuka.”
17 Nkhaŵa pafupi kuwa,Ndipo vyakuŵinya vyane vikaŵa nane nyengo zose.+
18 Nkhavumbura ubudi wane.+Nkhasuzgika na kwananga kwane.+
19 Kweni ŵalwani ŵane mbamoyo na ŵankhongono,*Awo ŵakunitinkha kwambura chifukwa mbanandi.
20 Ŵakaniwezgera uheni pa uwemi.Ŵakalimbananga nane chifukwa cha kulondezga uwemi.
21 Munganisidanga yayi, A Yehova.
Mwe Chiuta, mungakhalanga kutali nane chara.+
22 Endeskani munovwire,Mwe Yehova, chiponosko chane.+
Mazgu Ghamusi
^ Mazgu gheneko, “Mulije kawemi mu thupi lane.”
^ Mazgu gheneko, “Viwuno vyane vikugolera.”
^ Panji kuti, “Nkhubangura.”
^ Pangayowoyekaso kuti, “Awo mbalwani ŵane kwambura chifukwa mbanandi.”
