Yesaya 60:1-22
60 “Wuka, iwe mwanakazi,+ ŵala pakuti ungweru wako wafika.
Uchindami wa Yehova ukuŵala pa iwe.+
2 Pakuti wona, chisi chizamubenekelera charu chapasiMdima wa bii pa ŵamitundu.Kweni Yehova wazamuŵala pa iwe,Ndipo uchindami wake uzamuwoneka pa iwe.
3 Mitundu yizamwiza ku ungweru wako+Mathemba+ ku uchindami wako wakuŵala.+
4 Yinuska maso ghako na kulaŵiska kosekose!
Wose ŵakuwungana pamoza, ŵakwiza kwa iwe.
Ŵana ŵako ŵanalume ŵakwiza kufuma kutali,+Ndipo ŵana ŵako ŵasungwana ŵali mu mbeyeka.*+
5 Pa nyengo iyo, uzamuwona na kumwemwetera,+Mtima wako uzamukondwa na kusekelera,Chifukwa usambazi wa mu nyanja uzamwiza kwa iwe.Vyuma vya ŵamitundu vizamwiza kwa iwe.+
6 Viwuru vya ngamila vizamuzura charu chako,Twana twa ngamila twa ku Midiyani na Efa.+
Wose ŵakufuma ku Sheba ŵazamwizaŴazamuyegha golide na lubani.
Ŵazamupharazga malumbo gha Yehova.+
7 Miskambo yose ya Kedara+ yizamuwungana kwa iwe.
Mberere zanalume za ku Nebayoti+ zizamukuteŵetera.
Zizamwiza na kupokelereka pa jotchero lane,+Ndipo nizamutozga nyumba yane yauchindami.*+
8 Kasi mbanjani awo ŵakuwuruka pamoza nga ni mabingu,Nga ni nkhunda kwiza ku vitupa vyawo?
9 Pakuti virwa vigomezgenge mwa ine,+Ngalaŵa za ku Tarishishi zadangira,Zikwiza na ŵana ŵako kufuma kutali chomene,+Pamoza na siliva lawo na golide lawo,Chifukwa cha zina la Yehova Chiuta wako na chifukwa cha Mutuŵa wa Israyeli,Pakuti wakupenge uchindami.*+
10 Ŵalendo ŵazamuzenga viliŵa vyako,Mathemba ghawo ghazamukuteŵetera.+Pakuti mu ukali wane nkhakutimba,Kweni mu uwemi wane nizamukulengera lusungu.+
11 Vipata vyako vizamuŵa mwazi nyengo zose.+Vizamujalika chara muhanya panji usiku,Kuti vyuma vya ŵamitundu vize kwa iwe,Ndipo mathemba ghawo ghazamudangilira.+
12 Pakuti mtundu uliwose na ufumu uliwose uwo uzamuleka kukuteŵetera umalenge,Ndipo mitundu yizamuparanyika tetete.+
13 Uchindami wa Lebanoni wizenge kwa iwe,+Khuni la junipa, khuni la ashi, pamoza na milanje,+Kutozga malo ghane ghakupatulika.Nighapenge uchindami malo gha malundi ghane.+
14 Ŵana ŵa awo ŵakakusuzganga ŵizenge na kukusindamira.Wose awo ŵakukuyuyura ŵajikamenge ku malundi ghako,Ŵakuchemenge msumba wa Yehova,Ziyoni wa Mutuŵa wa Israyeli.+
15 M’malo mwa kuŵa wakusidika na wakutinkhika, kwambura ŵanthu kujumphamo mwa iwe,+Nizamukuzgora chinthu chakunothiska muyirayira,Chakukondweska mu miwiro yose.+
16 Iwe uzamuwonkha mkaka wa ŵamitundu,+Uzamuwonkha mabere gha mathemba.+Uzamumanya nadi kuti ine, Yehova, ndine Mponoski wako,Ndipo Wankhongono wa Yakhobe ni Muwomboli wako.+
17 M’malo mwa mkuŵa nizamuŵikamo golide,M’malo mwa chisulo nizamuŵikamo siliva,M’malo mwa khuni, mkuŵa,Ndipo m’malo mwa malibwe, chisulo.Nizamwimika mtende kuŵa ŵalaŵiliri ŵakoNa urunji kuŵa ŵakapitawo ŵako.+
18 Mu charu chako muzamupulikikwaso nkhaza charaPanji pharanyiko na kupasura mu mphaka zako.+
Ndipo uzamuchema viliŵa vyako kuti Chiponosko,+ vipata vyako Malumbo.
19 Dazi lizamuŵaso kuŵala kwako chara muhanya,Nanga ni mwezi uzamukupa ungweru chara,Pakuti Yehova wazamuŵa ungweru wamuyirayira kwa iwe,+Ndipo Chiuta wako wazamuŵa uchindami wako.+
20 Dazi lako lizamunjiraso chara,Panji mwezi wako kufuŵilira,Pakuti Yehova wazamuŵa ungweru wamuyirayira kwa iwe,+Mazuŵa ghakutengera kwako ghazamumara.+
21 Ŵanthu ŵako wose ŵazamuŵa ŵarunji.Ŵazamuhara charu muyirayira.
Iwo ni mphukira iyo nkhapanda,Mulimo wa mawoko ghane,+ kuti nipike uchindami.+
22 Muchoko chomene wazamuŵa chikwiNdipo muchoko wazamuzgoka mtundu wankhongono.
Ine Yehova, nizamuchifiska luŵiro mu nyengo yake.”
Mazgu Ghamusi
^ Mazgu ghanyake, “pa jeka; mu nkhwamba.”
^ Panji kuti, “nyumba yane yakutowa.”
^ Panji kuti, “wakutozgenge.”
