Zintharika 23:1-35
23 Para wakhala pasi kuti urye pamoza na themba,Uwoneseske chomene ivyo vili panthazi pako.
2 Ŵika chimayi ku chigolomiro chako*Usange uli na njara yikuru.*
3 Ungadokeranga yayi manoninoni ghake,Pakuti ni vyakurya vyaupusikizgi.
4 Ungajivuskanga yayi kuti usange usambazi.+
Leka, ndipo uŵe wakupulikiska.*
5 Para wadodoliska maso ghako pa iwo, mbwenu palije,+Pakuti umerenge mapapindo nga ni nombo na kudukira kuchanya.+
6 Ungaryangako yayi chakurya cha munthu mukaka.*Ungadokeranga yayi manoninoni ghake,
7 Pakuti wali nga ni munthu uyo wakusunga vyuma.*
Wakuti kwa iwe: “Lyanga na kumwa,” kweni wakuneneska yayi.*
8 Uwukurenge ivyo warya,Ndipo unangenge waka mazgu ghako ghakuwonga.
9 Ungayowoyanga mu makutu gha muzeleza chara,+Pakuti wapepurenge vinjeru vya mazgu ghako.+
10 Ungasezganga yayi chimanyikwiro cha mphaka cha papo kale,+Panji kunjilira mu munda wa mwana mulanda.
11 Pakuti Muvikiliri* wawo ngwankhongono.Waŵimirenge pa mulandu wawo na iwe.+
12 Ŵika mtima wako pa chisambizgoNdipo khutu lako liŵe pa kumanya vinthu.
13 Ungalekanga chara kulanga msepuka.*+
Para wamutimba na luswazu wafwenge yayi.
14 Umutimbe na luswazu,Kuti umuponoske* ku Dindi.*
15 Mwana wane, usange mtima wako ngwavinjeru,Mbwenu mtima wane usekelerenge.+
16 Mukati mwane mweneko mukondwenge*Para milomo yako yikuyowoya vyakunyoloka.
17 Mtima wako ungachitiranga sanji ŵakwananga yayi,+Kweni wopenge Yehova zuŵa lose,+
18 Penepapo ukhazgenge viwemi munthazi,+Ndipo chigomezgo chako chidumulikenge chara.
19 Iwe, mwana wane, pulika na kuŵa wavinjeru,Longozgera mtima wako mu nthowa yakwenelera.
20 Ungaŵanga yayi pamoza na awo ŵakutemwa kumwa vinyo linandi,+Awo ŵali na dozo likuru pa nyama,+
21 Pakuti muloŵevu na nkharye ŵakavukenge,+Ndipo kusiwa kumuvwalikenge munthu vizwazwa.
22 Pulikira awuso awo ŵakakubaba,Ndipo ungaŵayuyuranga chara anyoko chifukwa chakuti ŵachekura.+
23 Gura* unenesko, ungawuguliskanga chara,+Ugureso vinjeru, chisambizgo na kupulikiska vinthu.+
24 Wiske wa murunji wakondwenge nadi,Uyo wababa mwana wavinjeru wasekelerenge nayo.
25 Awuso na anyoko ŵasekelerenge,Ndipo mama uyo wakakubaba wakondwenge.
26 Mwana wane, unipe mtima wako,Ndipo maso ghako ghakondwe na nthowa zane.+
27 Pakuti hule ni mbuna yakunyang’amira,Mwanakazi muleŵi* ni muthombo ufinyi.+
28 Wakujoŵelera nga ni munthu wakuphanga vyaŵene.+Wakusazgirako unandi wa ŵanalume ŵambura kugomezgeka.
29 Ni njani wali na soka? Ni njani wakwenjerwa?
Ni njani wali na mbembe? Ni njani wakudandawura?
Ni njani uyo wali na vilonda kwambura chifukwa? Ni njani uyo maso ghake ghali waka loloŵa?
30 Awo ŵakukhala nyengo yitali pa vinyo,+Awo ŵakupenja* vinyo lakusazgika.
31 Ungalaŵiskanga pa vinyo yayi para ndiswesi,Para likufutuka mu nkhombo na kukhira makoramakora,
32 Pakuti paumaliro likuluma nga ni njoka,Ndipo likufumiska poyizoni nga ntchipiri.
33 Maso ghako ghawonenge vyachilendo,Ndipo mtima wako uyowoyenge vinthu vyakubendera.+
34 Uŵenge nga ni munthu uyo wagona mukati mu nyanja,Nga ni uyo wagona pachanya pa mlongoti wa ngalaŵa.
35 Utenge: “Ŵanithyapura, kweni nindapulike vyakuŵinya.
Ŵanitimba, kweni nindamanye.
Kasi niwukenge pawuli?+
Nkhukhumba kumwaso.”*
Mazgu Ghamusi
^ Panji kuti, “Ujiwezge.”
^ Panji kuti, “umoyo wako uli na dozo likuru.”
^ Pangayowoyekaso kuti, “Ufumeko ku kapulikiskiro kako.”
^ Panji kuti, “cha waliyose uyo jiso lake ndiheni.”
^ Panji kuti, “wakupendesera mu umoyo wake.”
^ Mazgu gheneko, “mtima wake uli na iwe yayi.”
^ Mazgu gheneko, “Muwomboli.”
^ Panji kuti, “mwana; muwukirano.”
^ Panji kuti, “uponoske umoyo wake.”
^ Panji kuti, “Sheole,” ndiko kuti, malaro. Wonani Mang’anamuro gha Mazgu.
^ Mazgu gheneko, “Ziso zane zizayenge.”
^ Panji kuti, “Sanga.”
^ Panji kuti, “Awo ŵakuwungana kuti ŵawonjepo.”
^ Panji kuti, “Nipenjengeso vinyo.”
