SAMBIRO 06
Kasi Umoyo Ukamba Wuli?
“Chisimi cha umoyo chili na [Chiuta].” (Salimo 36:9) Kasi mukugomezga fundo iyi? Ŵanthu ŵanyake ŵakughanaghana kuti umoyo ukaŵako wekha. Usange ni nthena, mbwenu tingati tikaŵako waka mwangozi. Kweni usange Chiuta ndiyo wakalenga umoyo, mbwenu ndikuti pali chifukwa icho wakalengera umoyo. a Chifukwa wuli tikwenera kugomezga kuti Chiuta ndiyo wakalenga umoyo?
1. Kasi chilengiwa chikaŵako wuli?
Baibolo likuti: “Pakwamba, Chiuta wakalenga kuchanya na charu chapasi.” (Genizesi 1:1) Ŵasayansi ŵanandi ŵakuzomerezga kuti chilengiwa chili na pakwambira. Kasi Chiuta wakachilenga wuli? Wakagwiliskira ntchito “nkhongono” yake iyo ni mzimu utuŵa pakulenga chilichose kusazgapo vipingausiku, nyenyezi kweniso mapulaneti.—Genizesi 1:2.
2. Chifukwa wuli Chiuta wakalenga charu chapasi?
Yehova “wakachilenga waka yayi [charu] kweni wakachipanga kuti ŵanthu ŵakhalengemo.” (Yesaya 45:18) Wakalenga charu chakutowa kuti taŵanthu tikhalengemo. (Ŵazgani Yesaya 40:28; 42:5.) Ŵasayansi ŵakuti charu chapasi ntchapadera chomene kuluska mapulaneti ghanyake, chifukwa chili na chilichose chakukhumbikwa kuti ŵanthu ŵaŵe na umoyo.
3. Kasi ŵanthu ŵakupambana wuli na vinyama?
Wati walenga charu, Yehova wakalenga vyamoyo. Chakwamba wakalenga vyakumera na vinyama. Kufuma apo, “Chiuta wakalenga munthu mu chikozgo chake.” (Ŵazgani Genizesi 1:27.) Chifukwa wuli ŵanthu mbapadera? Pakuti tili kulengeka mu chikozgo cha Chiuta, tingatolera mikhaliro yake nga chitemwa na urunji. Wakatilengaso munthowa yakuti tingasambira viyowoyero, kukondwa na vinthu vyakutowa kweniso sumu. Mwakupambana na vinyama, taŵanthu tili kulengeka munthowa yakuti timusopenge Mlengi withu.
MANYANI VINANDI
Sangani ukaboni uwo ukulongora kuti umoyo ukalengeka kweniso kuti ivyo Baibolo likuyowoya ni vyaunenesko. Kasi mikhaliro iyo taŵanthu tili nayo yikutisambizga vichi za Chiuta?
4. Umoyo ukachita kulengeka
Ŵanthu ŵakulumbika na vinthu ivyo ŵakupanga nangauli ŵakutolera ku chilengiwa. Ipo asi uyo wakalenga vinthu ivyo ŵanthu ŵakutolerako ndiyo wakwenera kulumbika chomene? Wonelerani VIDIYO, kufuma apo dumbiskanani fumbo ili.
-
Kasi ni vinthu wuli ivyo ŵanthu ŵali kupanga ivyo ŵali kutolera ku chilengiwa?
Nyumba yiliyose yikuzengeka na munthu. Kweni kasi ninjani wakalenga vinthu ivyo tikuviwona? Ŵazgani Ŵahebere 3:4, kufuma apo dumbiskanani mafumbo agha:
-
Kasi ni vinthu wuli ivyo Chiuta wali kulenga ivyo imwe vikumukondweskani?
-
Kasi pali chifukwa chakugomezgera kuti vinthu vyose vikachita kulengeka? Chifukwa wuli?
Kasi mukumanya?
Mungasanga nkhani kweniso mavidiyo agho ghakulongosora nkhani iyi pa jw.org pa chigaŵa chakuti “Kasi Vikaŵako Vyekha?” kweniso “Ivyo Ŵanthu Ŵakuyowoya Vya Umo Umoyo Ukambira.”
“Nyumba yiliyose yikuzengeka na munthu, kweni uyo wakazenga vinthu vyose ni Chiuta”
5. Pali vifukwa vinandi vyakugomezgera kuti ivyo Baibolo likuyowoya vyakukhwaskana na chilengiwa ni vyaunenesko
Mu Genizesi chaputara 1, Baibolo likulongosora umo charu chikalengekera kweniso umo umoyo ukambira. Kasi mukugomezga nkhani iyi, panji ntchidokoni waka? Wonelerani VIDIYO, kufuma apo dumbiskanani mafumbo agha.
-
Kasi Baibolo likusambizga kuti charu na vyamoyo vikalengeka mu mazuŵa 6 gha maora 24?
-
Kasi mukuwona kuti ivyo Baibolo likulongosora pa nkhani ya kulenga ni vyakupulikikwa? Chifukwa wuli?
Ŵazgani Genizesi 1:1, kufuma apo dumbiskanani fumbo ili:
-
Ŵasayansi ŵakuti chilengiwa chili na pakwambira. Kasi ivyo ŵasayansi ŵakuyowoya vikukolerana wuli na ivyo mwaŵerenga mu lemba ili?
Ŵanthu ŵanyake ŵakuti vinthu vikachita waka kusintha kufuma ku vinthu vinyake ivyo Chiuta wakalenga. Ŵazgani Genizesi 1:21, 25, 27, kufuma apo dumbiskanani mafumbo agha:
-
Kasi Baibolo likusambizga kuti Chiuta wakalenga kanthu kachoko waka ako pamasinda kakazgoka somba, vinyama, kweniso ŵanthu? Panji kasi wakalenga vyamoyo kuyana na “mitundu” yake? b
6. Ŵanthu ŵali kulengeka mwapadera chomene
Taŵanthu tikupambana chomene na vinyama ivyo Chiuta wali kulenga. Ŵazgani Genizesi 1:26, kufuma apo dumbiskanani fumbo ili:
-
Pakuti taŵanthu tili kulengeka mu chikozgo cha Chiuta, kasi ni mikhaliro wuli iyo tingatolerako kwa iyo?
IVYO ŴANYAKE ŴAKUYOWOYA: “Ivyo Baibolo likuyowoya pa nkhani ya kulenga ni vyautesi.”
-
Kasi imwe mukuti wuli? Chifukwa wuli?
MWAKUDUMURA
Yehova ndiyo wakalenga vinthu vyose.
Kuweleramo
-
Kasi Baibolo likusambizga kuti chilengiwa chikamba wuli?
-
Kasi Chiuta wakalenga kanthu kachoko waka ako pamasinda kakazgoka vyamoyo? Panji vyamoyo vyose wakachita kuvilenga?
-
Chifukwa wuli ŵanthu mbapadera?
SANGANI FUNDO ZAKUSAZGIKIRA
Wonani vinthu ivyo vikulongora kuti kuli Mlengi.
“Kasi Tikusambirako Vichi ku Chilengiwa?” (Wukani!, Seputembala 2006)
Wonani umo dada wangalongosolera mwana wake ivyo Baibolo likuyowoya pa nkhani ya kulenga.
Wonani usange chisambizgo chakuti vyamoyo vikachita kusintha chikukolerana na ivyo Baibolo likuyowoya.
Wonani usange vinthu vyakale ivyo vikusangika mu dongo panji ivyo ŵasayansi ŵafufuza vikulongora kuti vinthu vikachita kulengeka panji vikaŵako waka mwangozi.
Umoyo Ukaŵako Wuli?—Mafumbo 5 Agho Tikwenera Kujifumba (burosha)
a Mu Sambiro 25 tizamudumbiskana chifukwa icho Chiuta wakalengera ŵanthu.
b Mu Baibolo mazgu ghakuti “mitundu” ghakwimira vilengiwa vya gulu limoza.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
