SAMBIRO 50
Kasi Mungachita Wuli Kuti Mukondwenge mu Banja Linu?—Chigaŵa 2
Ŵana ni vyawanangwa vyakufuma kwa Yehova. Iyo wakukhazga kuti ŵapapi ŵaŵapwelelerenge makora chomene ŵana. Yehova wali kupeleka ulongozgi uwo ungawovwira ŵapapi kuti ŵalere makora ŵana ŵawo. Iyo wali kupelekaso ulongozgi uwo ukulongosora ivyo ŵana ŵangachita kuti banja lilutilire kuŵa lakukondwa.
1. Kasi Yehova wakupeleka ulongozgi wuli ku ŵapapi?
Yehova wakukhumba kuti ŵapapi ŵatemwenge ŵana ŵawo kweniso kuti ŵapatulenge nyengo yakuchezgera nawo. Iyo wakukhumbaso kuti ŵapapi ŵavikilirenge ŵana ŵawo kweniso kuŵasambizga fundo za mu Baibolo apo ŵachali ŵachoko. (Zintharika 1:8) Iyo wakuphalira ŵafumu kuti: “Lutilirani kuŵalera makora [ŵana ŵinu] . . . na kuŵasambizga maghanoghano gha Yehova.” (Ŵazgani Ŵaefeso 6:4.) Yehova wakukondwa chomene para ŵapapi ŵakulera ŵekha ŵana ŵawo kweniso para ŵakulondezga ulongozgi wake pakuŵalera.
2. Kasi Yehova wakupeleka ulongozgi wuli ku ŵana?
Yehova wakuphalira ŵana kuti: “Pulikirani ŵapapi ŵinu.” (Ŵazgani Ŵakolose 3:20.) Yehova kweniso ŵapapi ŵakukondwa chomene, para ŵana ŵakupulikira na kuchindika ŵapapi ŵawo. (Zintharika 23:22-25) Yesu wakalongora chiyelezgero chiwemi chomene pa nkhani ya kupulikira ŵapapi. Yesu wakapulikiranga na kuchindika ŵapapi ŵake nangauli wakaŵa wakufikapo.—Luka 2:51, 52.
3. Kasi banja linu lingasendelera wuli kwa Chiuta?
Para ndimwe mupapi, tikukayika yayi kuti mukukhumba kuti ŵana ŵinu ŵatemwenge chomene Yehova nga umo imwe mukuchitira. Kasi mungachita wuli kuti ŵana ŵinu ŵatemwenge Yehova? Mukwenera kuchita ivyo Baibolo likuyowoya, likuti: “Ughadidimizge [mazgu gha Yehova] mu ŵana ŵako na kughayowoya para ukukhala pasi mu nyumba yako, para ukwenda pa nthowa.” (Dotoronome 6:7) Mazgu ghakuti “kudidimizga” ghakung’anamura kusambira mwakuwerezgawerezga. Nakuti kanandi para ŵapapi ŵakusambizga ŵana ŵawo ŵakutemwa kuwerezgapo chinthu kuti ŵachipulikiske. Lemba ili likulongora kuti nyengo zose mukwenera kupenjerezga m’pata wakuti musambizge ŵana ŵinu maghanoghano gha Yehova. Banja likwenera kupatura zuŵa sabata yiliyose kuti lisopenge pamoza. Para mulije ŵana, napo mukwenera kuŵa na zuŵa lakusambilira Mazgu gha Chiuta pamoza na mfumu panji muwoli winu.
MANYANI VINANDI
Wonani masachizgo agho ghangamovwirani kuti mukondwenge na kuvikilirika mu banja mwinu.
4. Sambizgani ŵana ŵinu mwachitemwa
Ntchipusu yayi kusambizga ŵana. Kweni, kasi Baibolo lingamovwirani wuli? Ŵazgani Yakobe 1:19, 20, kufuma apo dumbiskanani mafumbo agha:
-
Kasi ŵapapi ŵangalongora wuli chitemwa para ŵakuyowoya na ŵana ŵawo?
-
Chifukwa wuli ŵapapi ŵakwenera yayi kulanga ŵana ŵawo para ŵakwiya? a
5. Vikilirani ŵana ŵinu
Ŵapapi ŵakwenera kusambizga makora ŵana ŵawo nkhani zakugonana kuti ŵaŵe ŵakuvikilirika. Kweni ŵapapi ŵanandi ŵakuchita soni kudumbiskana na ŵana ŵawo nkhani zakugonana. Wonelerani VIDIYO, kufuma apo dumbiskanani mafumbo agha.
-
Chifukwa wuli ŵapapi ŵanandi vikuŵasuzga kudumbiskana na ŵana ŵawo nkhani zakugonana?
-
Kasi ŵapapi ŵanyake ŵakuchita wuli kuti ŵadumbiskane na ŵana ŵawo nkhani zakugonana?
Nga umo Baibolo likayowoyerathu, charu cha Satana ichi chikulutilira kuhenipirahenipira. Ŵazgani 2 Timote 3:1, 13, kufuma apo dumbiskanani fumbo ili:
-
Ŵanyake mwa ŵanthu ŵaheni awo ŵakuzunulika mu vesi 13 ni awo ŵakuchitira ŵana vyamuziro. Chifukwa wuli ntchakuzirwa kuti ŵapapi ŵasambizgenge ŵana ŵawo nkhani zakugonana, kweniso umo ŵangajivikililira ku ŵanthu awo ŵakuchitira ŵana vyamuziro?
Kasi mukumanya?
Ŵakaboni ŵa Yehova ŵafumiska mabuku kweniso mavidiyo ghanandi agho ghangawovwira ŵapapi kuti ŵasambizge ŵana ŵawo nkhani zakugonana kweniso umo ŵangaŵavikililira ku ŵanthu awo ŵakuchitira ŵana vyamuziro. Mwachiyelezgero, wonani:
-
Vikilirani Ŵana Ŵinu (vidiyo)
-
“Umo Mungasambizgira Ŵana Ŵinu pa Nkhani za Kugonana” (Wukani! Na. 5 2016)
6. Chindikani ŵapapi ŵinu
Ŵana ŵangalongora kuti ŵakuchindika ŵapapi ŵawo para ŵakuyowoya nawo mwantchindi. Wonelerani VIDIYO, kufuma apo dumbiskanani mafumbo agha.
-
Chifukwa wuli ntchakuzirwa kuti mwana wayowoyenge mwantchindi na ŵapapi ŵake?
-
Kasi mwana wangalongora wuli ntchindi para wakuyowoyeskana na ŵapapi ŵake?
Ŵazgani Zintharika 1:8, kufuma apo dumbiskanani fumbo ili:
-
Kasi mwana wakwenera kuchita wuli para ŵapapi ŵakumupa ulongozgi?
7. Musopenge Yehova pamoza na banja linu
Banja lililose la Ŵakaboni ŵa Yehova, likupatura zuŵa sabata yililose kuti lisopenge pamoza. Kasi ŵakuchita wuli? Wonelerani VIDIYO, kufuma apo dumbiskanani mafumbo agha.
-
Kasi mabanja ghangachita wuli kuti ghaŵe na sambiro la mbumba lakukhazikika?
-
Kasi ŵapapi ŵangachita wuli kuti sambiro la mbumba liŵenge lakukhozga na lakukondweska?—Wonani chithuzi chakwamba mu sambiro ili.
-
Kasi ntchivichi icho chingamutondeskani kuti muŵe na sambiro la mbumba lakukhazikika?
Mu nyengo ya Ŵaisrayeli, Yehova wakakhumbanga kuti mabanja ghasambirenge Mazgu ghake nyengo zose. Ŵazgani Dotoronome 6:6, 7, kufuma apo dumbiskanani fumbo ili:
-
Kasi mungalondezga wuli fundo iyi?
Ivyo mungachita pakusopa kwa mbumba:
-
Munozgekerenge maungano gha mpingo.
-
Muŵazgenge na kudumbiskana nkhani ya mu Baibolo iyo waliyose mu banja wangakondwa nayo.
-
Usange muli na ŵana ŵachokoŵachoko, pangani dawunilodi panji pulintani nkhani zakukhwaskana na ŵana pa jw.org.
-
Usange muli na ŵana ŵawukirano dumbiskanani nkhani za ŵachinyamata pa jw.org.
-
Pangani seŵero la mu Baibolo na ŵana ŵinu.
-
Wonelerani na kudumbiskana mavidiyo pa jw.org.
IVYO ŴANYAKE ŴAKUYOWOYA: “Baibolo ndinonono chomene, ŵana ŵangalipulikiska yayi.”
-
Imwe mukuti wuli?
MWAKUDUMURA
Yehova wakukhumba kuti ŵapapi ŵatemwenge ŵana ŵawo, kuŵasambizga, kweniso kuŵavikilira. Ŵana ŵachindikenge na kupulikira ŵapapi ŵawo. Kweniso kuti mabanja ghaŵenge na sambiro la mbumba.
Kuweleramo
-
Kasi ŵapapi ŵangachita wuli kuti ŵasambizge na kuvikilira ŵana ŵawo?
-
Kasi ŵana ŵangalongora wuli kuti ŵakuchindika ŵapapi ŵawo?
-
Kasi mabanja ghangasanga vitumbiko wuli usange sabata yiliyose ghakupatura zuŵa lakusopera pamoza?
SANGANI FUNDO ZAKUSAZGIKIRA
Kasi ni vinthu wuli ivyo vingawovwira ŵana ŵinu kuti ŵakure makora?
“Vinthu 6 Ivyo Ŵana Ŵakwenera Kusambira” (Wukani! Na. 2 2019)
Wonani ivyo Baibolo likuphalira awo ŵakupwelelera ŵapapi ŵawo ŵachekuru.
“Kasi Baibolo Likuti Wuli pa Nkhani ya Kupwelelera Ŵapapi Awo Mbachekuru?” (Nkhani ya pa Intaneti)
Wonani ivyo vikawovwira mwanalume munyake kuti walere makora ŵana ŵake.
Wonani ivyo vingawovwira ŵapapi kuti ŵakhozge ubwezi na ŵana ŵawo ŵanyamata.
a Mu Baibolo, mazgu ghakuti kulanga ghakung’anamura kusambizga, kupeleka ulongozgi kweniso kunyololera. Ghakung’anamura kuyowoya mazgu gha msinjiro panji kuŵachitira nkhaza yayi.—Zintharika 4:1.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
