SAMBIRO 8
Yosiya Wakaŵa na Ŵabwezi Ŵawemi
Kasi ukughanaghana kuti nchakusuzga kucita viwemi?— Ŵanthu ŵanandi ŵakughanaghana kuti nchakusuzga. Baibolo likuyowoya kuti cikaŵa cakusuzga kwa munyamata munyake zina lake Yosiya kucita ico nchiwemi. Kweni wakaŵa na ŵabwezi ŵawemi awo ŵakamovwira. Tiye tisambire vinandi vya Yosiya na ŵabwezi ŵake.
Dada wa Yosiya wakaŵa Amoni, fumu ya Yuda. Amoni wakaŵa muheni comene ndipo wakasopanga vikozgo. Dada wa Yosiya wati wafwa, Yosiya ndiyo wakaŵa fumu ya Yuda. Kweni wakaŵa na vyaka 8 pera. Kasi ukughanaghana kuti nayo wakaŵa muheni nga adada ŵake?— Yayi, wakaŵa muheni ca!
Zefaniya wakacenjezga ŵanthu kuti ŵaleke kusopa vikozgo
Nanga ni apo wakaŵa mucoko, Yosiya wakakhumbanga kupulikira Yehova. Ntheura wakasankha kuŵa paubwezi na ŵanthu awo ŵakatemwanga Yehova. Ŵabwezi aŵa ŵakamovwira kucita viwemi. Kasi ŵabwezi ŵa Yosiya ŵakaŵa anjani?
Yumoza wa ŵabwezi ŵake wakaŵa Zefaniya. Zefaniya wakaŵa nchimi. Wakacenjezga Ŵayuda kuti vinthu viheni viŵacitikirenge usange ŵalutilirenge kusopa vikozgo. Yosiya wakapulikira ivyo Zefaniya wakayowoya. Wakasopanga Yehova, vikozgo yayi.
Mubwezi munyake wa Yosiya wakaŵa Yeremiya. Yeremiya na Yosiya ŵakwenera kuti ŵakaŵa ŵakuyana vyaka, ndipo apo ŵakakuranga ŵakakhalanga pafupi na pafupi. Ŵakatemwananga comene mwakuti Yosiya wati wafwa, Yeremiya wakalemba sumu ya kumukumbukira. Yeremiya na Yosiya ŵakawovwirananga kucita viwemi na kupulikira Yehova.
Yosiya na Yeremiya ŵakawovwirananga kucita viwemi
Kasi ungasambirako vici kwa Yosiya?— Kufuma waka apo wakaŵa munyamata, Yosiya wakakhumbanga kucita viwemi. Wakamanya kuti wakeneranga kuŵa paubwezi na ŵanthu awo ŵakutemwa Yehova. Nawe ukwenera kuwoneseska kuti wasankha ŵabwezi awo ŵakutemwa Yehova, awo ŵangakovwira kucita viwemi.
ŴAZGANI MU BAIBOLO LINU
Panji Mungatemwa Kuŵerengaso Nkhani Izi
Sangwani na nkhani 116 za mu Baibolo. Ni zaunenesko, zambura kusuzga kupulikiska, ndipo zalongosoleka makora chomene.
Fumu Yiwemi Yaumaliro ya Israyeli
Apo wakaŵa muchoko, Yosiya wakachita vinthu mwa chikanga.
