APO sitima yikasendeleranga pa jiti ya Belfast Lough, ŵanthu ŵachoko waka awo ŵakakwera sitima iyi ŵakawona mapiri ghakutowa chomene. Kukaŵa mulenji, mu Meyi 1910. Pakati pa ŵanthu aŵa pakaŵa Charles T. Russell, ndipo uwu ukaŵa ulendo wake wachitatu kufika mu Ireland. Pafupi na Mubali Russell pakaŵa masitima ghaŵiri ghakurughakuru agho ŵakaŵa kuti ŵakupanga. Masitima agha ghakaŵa Titanic na Olympic. * Pafupi na malo ghakupangirapo masitima pakaŵa Ŵasambiri ŵa Baibolo awo ŵakalindiliranga mwakunweka Mubali Russell.

Vyaka 20 pambere ivi vindachitike, Mubali Russell wakaghanaghana kuti wambe kwenda maulendo ghanandi kuluta kuwaro kwa charu cha America. Wakakhumbanga kusanga nthowa yiwemi yakuthandazgira makani ghawemi. Pakwamba wakaluta ku Ireland, mu Julayi 1891. Apo wakajumphanga mu Msumba wa Chicago, pafupi na Queenstown, zuŵa likanjiranga, ndipo panji wakakumbukangaso ivyo ŵapapi ŵake ŵakamuphaliranga vyakukhwaskana na kukwake. Apo Mubali Russell na ŵabali awo wakendanga nawo lumoza, ŵakajumphanga matawuni na malo ghakutowa, ŵakawona kuti mu malo agha “vuna yacha kale kuti yivunike.”

Ku Ireland, Mubali Russell wakalutako nyengo zakukwana 7. Pa ulendo wakwamba wakawovwira ŵanthu kuti ŵanweke. Ivi vikapangiska kuti pa maulendo ghanyake kwize ŵanthu mahandiredi, nyengo zinyake masauzandi kuti ŵazakapulike kwa iyo. Pa ulendo wake wachiŵiri, uwo ukaŵako mu Meyi 1903, nkhani zachisanisani mu msumba wa Belfast na wa Dublin ŵakapharazga mu manyuzipepara. Mubali Russell wakati “ŵanthu ŵakategherezga chomene” nkhani ya mutu wakuti: “Layizgo Ilo Likapelekeka na Chilapo.” Nkhani iyi yikayowoyanga vya chipulikano cha Abrahamu na umo ŵanthu ŵazamutumbikikira munthazi.

Ku Ireland ŵanthu ŵakaŵa ŵakunweka chomene, ntheura Mubali Russell wekenderakoso pa ulendo wake wachitatu wa ku Europe. Ŵabali ŵankhondi ŵakamutawuzga wakati wafika pa dowoko ku Belfast mulenji mu Epulero 1908. Pa nkhani ya mutu wakuti “Kuthereskeka kwa Ufumu wa Satana,” iyo yikapharazgika, pakiza “ŵanthu ŵakunweka pafupifupi 300.” Nkhani iyi yikaŵako kumise pa zuŵa ili. Wakususka uyo wakaŵapo ŵakamuchetamiska na Malemba. Ku Dublin, kukaŵa munthu munyake uyo wakaŵikapo mtima chomene kutisuska. Zina lake wakaŵa Mr. O’Connor, ndipo wakaŵa mulembi wa wupu wa YMCA. Munthu uyu wakakhumbanga kuti ŵategherezgi ŵakujumpha 1,000 ŵawukire Ŵasambiri ŵa Baibolo. Kasi chikachitika ntchivichi?

Tiyeni nase tiŵe nga tikaŵako ndipo tiŵe nga tikuwona ivyo vikachitikanga. Munthu uyo wakukhumba kumanya unenesko wa mu Baibolo wiza kuti nayo wategherezgeko nkhani iyo yikapharazgika mu nyuzipepara ya The Irish Times. Holo yazura chomene mwakuti wachita waka kufyenyerezga kuti wasange pakukhala. Wakutegherezga chomene apo munthu wanyivwi tuu na mwembe unandi, uyo wavwara bachi litali lifipa wakuyowoya. Muyowoyi wakuyowoya nkhani yake mwakufwatuka, wakwenda ku pulatifomu uku wakupanga majesicha. Wakulongosora malemba mwakupulikikwa makora. Munthu wakunweka  uyu wakupulikiska unenesko wa mu Baibolo. Nangauli palije vyakukuzgira mazgu, kweni mazgu gha uyo wakuyowoya nkhani ghakupulikikwa holo yose, ndipo ŵanthu ŵakutegherezga mwakunweka kwa ora limoza na hafu. Nyengo ya mafumbo na mazgoro yikukwana. O’Connor uyo ngwakususka pamoza na ŵanyake ŵakwamba kumuphulunga na mafumbo muyowoyi kuti ŵamukhozge soni, kweni wakuŵazgora makora mwakugwiliskira ntchito Baibolo. Ŵategherezgi ŵakukuŵa mapi chifukwa cha mazgoro agho ŵakupulika. Chidumbirano ichi chati chamara, munthu wakunweka yura wakwiza ku ŵabali na kuŵapempha kuti wamanye vinandi. Awo ŵakaŵako ŵakuti ŵanthu ŵanandi ŵakasambira unenesko mu nthowa iyi.

Apo Mubali Russell wakanyamukanga ku New York mu Meyi 1909 pa sitima ya Mauretania pa ulendo wake wachinayi, wakaŵa na Mubali Huntsinger kuti apo ŵali mu nthowa watayipenge nkhani za mu Gongwe la Mulinda izo Mubali Russell wakamuphaliranga. Apo Mubali Russell wakadumbanga nkhani yachisanisani mu Belfast kukiza ŵanthu 450, ndipo ŵanthu 100 ŵakimilira waka chifukwa cha kusoŵa pakukhala.

Ivi ndivyo vikachitikaso pa ulendo wachinkhondi uwo wazunulika kukwambilira kwa nkhani iyi. Nkhani yachisanisani yikati yamara mu Dublin, muliska munyake uyo wakiza na O’Connor wakazgoreka mafumbo ghake mwakugwiliskira ntchito Baibolo. Ivi vikaŵakondweska chomene ŵategherezgi. Pa zuŵa lakulondezgapo, ŵabali aŵa ŵakakwera boti lakuyegha makalata, ilo likachimbiranga chomene, ndipo ŵakaluta ku Liverpool ndipo kura ŵakakwera sitima yakumanyikwa chomene ya Lusitania kuluta ku New York. *

Nkhani zachisanisani zikapharazgikaso pa ulendo wa nambara 6 na 7 wa Mubali Russell, mu 1911. Mu Malichi panji Epulero, Ŵasambiri ŵa Baibolo 20 mu Belfast ŵakapokelera ŵanthu 2,000, awo ŵakiza kuzakategherezga nkhani ya mutu wakuti “Ivyo Vikuchitika Para Tafwa.” O’Connor nayo wakiza ku Dublin na muliska munyake kuti ŵazakafumbe mafumbo. Kweni ŵategherezgi ŵakakuŵangaso chomene mapi para ŵapulika mazgoro ghawemi ghakufuma mu Baibolo. Mu Seputembala panji Okutobala chaka chenechichi, ŵabali ŵakenderaso matawuni ghanyake, ndipo nako kukiza ŵanthu ŵanandi. O’Connor na ŵanthu ŵanyake ŵakusuzga 100 ŵakayezgaso kutimbanizga ungano ku Dublin, kweni ŵategherezgi ŵakaŵa ku chigaŵa cha Mubali Russell.

Nangauli Mubali Russell ndiyo kanandi wakadumbanga nkhani zachisanisani pa nyengo yira, kweni wakamanyanga kuti “palije munthu uyo ngwakuzirwa chomene kuluska ŵanyake,” pakuti “uwu ni mulimo wa munthu chara; kweni ngwa Chiuta.” Pa nyengo ya nkhani zachisanisani izo zikapharazgikanga kale, izo pa nyengo yasono zikuyowoyeka pa Ungano Wachisanisani, unenesko wa mu Malemba ukalongosorekanga makora chomene. Kasi pakaŵa uwemi wuli? Nkhani zachisanisani zikawovwira kuti makani ghawemi ghathandazgike, ndipo mipingo yinandi yikamba mu Ireland.—Kufuma mu nthamba yithu ku Britain.