1. Kasi mukamanya vichi mwati mwamba kusambira Baibolo?

 KASI mukukumbuka nyengo iyo mukambira kusambira Baibolo? Panji mukazizwa chomene kumanya kuti Chiuta wali na zina. Panyake mtima winu ukazika mwati mwamanya kuti Chiuta wakuyuzga ŵanthu yayi ku moto wa helo. Nakuti tikukayika yayi kuti mukakondwa chomene mwati mwamanya kuti muzamuwonanaso na ŵabali ŵinu awo ŵali kufwa na kukhalaso lumoza mu paradiso pa charu chapasi.

2. Padera pa kumanya unenesko wa mu Baibolo, ni vichiso vinyake ivyo mukachita? (Ŵaefeso 5:1, 2)

² Apo mukalutiliranga kusambira Baibolo, chitemwa chinu pa Yehova nacho chikakuranga chomene. Chitemwa ichi ndicho chikamuchiskani kulondezga ivyo mukasambiranga. Mukamba kusankha makora vinthu kuyana na fundo za mu Baibolo. Mukasintha nkharo yinu chifukwa mukakhumbanga kukondweska Chiuta. Nga umo mwana wakuyezgera mupapi wachitemwa, namwe mukamba kuyezga Adada ŵinu ŵakuchanya.—Ŵazgani Ŵaefeso 5:1, 2.

3. Kasi ni mafumbo wuli agho tingajifumba?

³ Jifumbani kuti: ‘Kasi sono nkhumutemwa chomene Yehova kuluska pakwamba nati nazgoka waka Mkhristu? Kufuma apo nkhabatizikira, kasi kaghanaghaniro kane na vyakuchita vyane vikukolerana na Yehova, chomenechomene pakulongora chitemwa ku ŵabali na ŵadumbu ŵane?’ Para ‘chitemwa icho mukaŵa nacho pakwamba’ chazizima, mungagongowanga yayi. Vyanthena ivi ndivyo vikachitikiraso Ŵakhristu ŵakwambilira. Kweni Yesu wakaŵaleka yayi, ndipo nase watilekengepo yayi. (Chivu. 2:4, 7)  Iyo wakumanya kuti chitemwa icho tikaŵa nacho pakwamba apo tikasambiranga unenesko tingaŵaso nacho.

4. Kasi tiwonenge vichi mu nkhani iyi?

⁴ Mu nkhani iyi tidumbiskanenge umo tingachitira kuti tilutilire kukuzga chitemwa chithu pa Yehova na ŵanji. Tiwonengeso vitumbiko ivyo tikusanga para tikulutilira kutemwa Yehova kweniso ŵabali na ŵadumbu ŵithu.

5-6. Kasi mpositole Paulosi wakakumana na masuzgo wuli pa uteŵeti wake, kweni ntchivichi icho chikamovwira kuti walutilire kuteŵetera Yehova?

⁵ Mpositole Paulosi wakakondwanga kuteŵetera Yehova, kweni wakasangananga na masuzgo ghakupambanapambana. Iyo kanandi wakendanga mitunda yitaliyitali, nangauli kwenda kukaŵa kwakusuzga mu nyengo yakale. Pa maulendo ghake, nyengo zinyake Paulosi wakaŵanga “mu ulwani wa milonga” kweniso mu “ulwani wa vigeŵenga.” Nyengo zinyakeso ŵalwani ŵake ŵakamutimbanga. (2 Kor. 11:23-27) Kweniso ni nyengo zose yayi apo Ŵakhristu ŵanyake ŵakawongeranga ntchito iyo Paulosi wakachitanga kuti waŵawovwire.—2 Kor. 10:10; Fil. 4:15.

⁶ Ntchivichi chikawovwira Paulosi kulutilira kuteŵetera Yehova? Paulosi wakasambira vinandi vyakukhwaskana na Yehova kufuma mu Malemba kweniso ku vinthu ivyo vikamuchitikirapo pa umoyo wake. Paulosi wakakhorwa kuti Yehova Chiuta wakumutemwa nadi. (Rom. 8:38, 39; Efe. 2:4, 5) Ndipo wakamba kumutemwa chomene Yehova. Wakalongora kuti wakumutemwa chomene Yehova ‘pakuteŵetera ŵatuŵa na kulutilira kuŵateŵetera.”—Heb. 6:10.

7. Kasi ni nthowa wuli yimoza iyo tingakuzgira chitemwa chithu pa Yehova?

⁷ Tingakuzga chitemwa chithu pa Chiuta para tikuŵikapo mtima kusambira Mazgu ghake. Apo mukuŵazga Baibolo, yezgani kuwona ivyo lemba lililose likuvumbura vyakukhwaskana na Yehova. Jifumbani kuti: ‘Kasi lemba ili likulongora wuli kuti Yehova wakunitemwa? Kasi likunipa vifukwa wuli vyakumutemwera Yehova?’

8. Kasi lurombo lungatovwira wuli kuti tikuzge chitemwa chithu pa Chiuta?

⁸ Nthowa yinyake iyo tingakuzgira chitemwa chithu pa Yehova nkhulomba kwa iyo nyengo zose na kumuphalira umo tikujipulikira. (Sal. 25:4, 5) Para tichitenge nthena, Yehova wazgorenge malurombo ghithu. (1 Yoh. 3:21, 22) Khanh, mudumbu wa ku Asia, wakuti: “Pakwamba nkhatemwanga waka Yehova chifukwa cha vinthu ivyo nkhasambira vyakukhwaskana na iyo, kweni nati nawona umo wakazgoleranga malurombo ghane chitemwa chane pa iyo chikakura chomene. Ivi vikanipangiska kuti nichitenge vinthu ivyo vikumukondweska.” b

9. Kasi ntchivichi chikulongora kuti Timote wakakuzganga chitemwa chake pa ŵabali na ŵadumbu?

⁹ Vyaka vyati vyajumphapo wati wazgoka Mkhristu, Paulosi wakasangana na muwukirano munyake zina lake Timote. Timote wakatemwanga chomene Yehova kweniso wakatemwanga ŵanthu. Paulosi wakaphalira Ŵafilipi kuti: “Nilije munyake uyo wali na maghanoghano ghakuyana na [Timote], uyo wazamupwelelera nadi vya imwe.” (Fil. 2:20) Apa Paulosi wakayowoyapo yayi vya maluso gha Timote pakulongozga vinthu nesi maluso ghake pakudumba nkhani, m’malo mwake wakayowoya waka vya chitemwa icho Timote wakaŵa nacho pa ŵabali na ŵadumbu. Lekani tikukayika yayi kuti mipingo iyo Timote wakateŵeteranga yikamulindiliranga mwakunweka.—1 Kor. 4:17.

10. Kasi Anna na mfumu wake ŵakalongora wuli chitemwa icho ŵakaŵa nacho pa ŵabali na ŵadumbu?

¹⁰ Nase tipenjerezgenge nthowa izo tingawovwilira ŵabali na ŵadumbu ŵithu. (Heb. 13:16) Wonani ivyo wakachita Anna uyo wazunulika  mu nkhani iyo yajumpha. Chimphepo chikuru chikati chachitika, iyo na mfumu wake ŵakaluta ku nyumba ya mbumba yinyake ya Ŵakaboni ndipo ŵakasanga kuti mtenje wa nyumba yawo waŵewuka. Ivi vikapangiska kuti mbumba iyi yiŵavye malaya ghakutowa. Anna wakuti: “Tikatora vyakuvwara vyawo na kuŵachapira kweniso tikaŵasitira na kuvipinda makora na kuŵapa. Kwa ise tikawonanga nga ivyo tachita ni vikuru yayi, kweni ivyo tikachita vikakhozga chomene ubwezi withu na mbumba iyi uwo uchalipo m’paka sono.” Chitemwa icho Anna na mfumu wake ŵakaŵa nacho pa ŵabali na ŵadumbu ndicho chikaŵachiska kuti ŵawovwirepo.—1 Yoh. 3:17, 18.

11. (a) Kasi ŵanji kanandi ŵakujipulika wuli para tikulongora kuti tikuŵatemwa? (b) Kuyana na Zintharika 19:17, kasi Yehova wakuchita wuli para tikulongora chitemwa?

¹¹ Para tikulongora lusungu na chitemwa ku ŵanji, iwo ŵangamanya kuti tikuchita nthena kuti tiyezge Yehova. Ndipo ŵangawonga chomene ivyo taŵachitira kuluska umo ise taghanaghaniranga. Khanh, uyo tamuzunura kukwambilira, kanandi wakukumbukira awo ŵakamovwirapo. Iyo wakuti: “Nkhuwonga chomene ŵadumbu awo ŵakanitoranga kuti tinjire lumoza mu uteŵeti. Ŵakazakanitoranga ku nyumba, ndipo nyengo zinyake tikalyeranga lumoza chakurya, ndipo pamanyuma ŵakazakanilekangaso ku nyumba. Sono ndipo namanya kuti chikaŵa chipusu yayi kuchita nthena. Ndipo ŵakachitanga nthena chifukwa cha chitemwa.” Unenesko ngwakuti ni wose yayi awo ŵangawonga ivyo tingaŵachitira. Pakuyowoya za awo ŵakamovwira, Khanh wakuti: “Nkhukhumba chomene kuŵawezgerapo pa viwemi vyose ivyo ŵakanichitira, kweni nkhumanyako yayi uko wose ŵakukhala pasono. Ndipouli, Yehova wakumanyako, ndipo nkhulomba kuti mphanyi ndiyo waniwezgerako m’malo mwa ine.” Khanh wakuneneska. Yehova wakuwona vyose ivyo tikuchitira ŵanyithu nanga vingaŵa vichoko wuli.  Wakuviwona kuŵa sembe yakuzirwa kweniso wakuviwona kuŵa ngongoli iyo wawezgerengepo.—Ŵazgani Zintharika 19:17.

12. Kasi ŵabali ŵangalongora wuli chitemwa chawo ku mpingo? (Wonaniso chithuzi.)

¹² Usange ndimwe mubali, kasi mungalongora wuli chitemwa ku ŵanji na kuchita vinthu ivyo vingaŵawovwira? Mubali munyake muwukirano zina lake Jordan wakafumba mulara umo wangachitira kuti wachite vinandi mu mpingo. Mulara wakamuwonga chifukwa cha kuluta panthazi uko wachitapo kale ndipo pamanyuma wakamupa ulongozgi wa umo wangachitira kuti wachite vinandi. Mwachiyelezgero, wakasachizga kuti Jordan wafikenge mwakutendekera pa Nyumba ya Ufumu na kutawuzga ŵanji, wazgorengepo pa maungano, wapharazgenge nyengo zose pamoza na kagulu kake kauteŵeti, kweniso kusanga nthowa zinyake izo wangawovwilira ŵanji. Jordan wati walondezga ulongozgi uwu, wakasambira umo wangachitira makora vinthu vinyake kweniso chitemwa chake pa ŵabali na ŵadumbu chikakura. Jordan wakamanya kuti para mubali waŵa muteŵeti wakovwira, ndipo wakwamba kovwira ŵanji yayi, m’malo mwake wakulutirizga waka kuŵawovwira.—1 Tim. 3:8-10, 13.

13. Kasi chitemwa chikamuchiska wuli mubali munyake zina lake Christian kuti wateŵetereso pa ulara?

¹³ Wuli usange kumasinda mukateŵeterapo kale nga muteŵeti wakovwira panji mulara? Yehova wakukumbuka mulimo uwo mukachita kumasinda na chitemwa icho chikamuchiskani kuti muchite nthena. (1 Kor. 15:58) Wakuwonaso chitemwa icho mukulutilira kulongora. Mubali munyake zina lake Christian wakakhuŵara chomene wati walekeskeka ulara. Ndipouli, iyo wakati: “Nkhasankha kuti nichite vyose ivyo ningafiska kuti niteŵetere Yehova chifukwa cha chitemwa, kwali ndine mulara panji yayi.” Nyengo yati yajumphapo, wakimikikaso kuŵa mulara. Christian wakuti: “Nkhafipangaso  mtima kuteŵeteraso pa ulara. Kweni nkhawona kuti usange Yehova chifukwa cha lusungu lwake wakukhumba kuti niteŵetereso pa ulara, niteŵeterenge chifukwa chakuti nkhumutemwa kweniso nkhutemwa ŵabali na ŵadumbu.”

14. Kasi mukusambirako vichi ku ivyo mudumbu munyake wa ku Georgia wakayowoya?

¹⁴ Ŵateŵeti ŵa Yehova ŵakulongoraso chitemwa chawo pa ŵazengezgani ŵawo. (Mat. 22:37-39) Mwachiyelezgero, Elena, mudumbu wa ku Georgia, wakuti: “Pakwamba, chinthu icho chikanichiskanga kuti nipharazgenge nkhutemwa Yehova. Kweni apo chitemwa chane pa Adada ŵane ŵakuchanya chikakura, nkhambaso kuŵatemwa chomene ŵanthu. Nkhayezganga kughanaghanira masuzgo agho ŵakukumana nagho kweniso nkhani izo zingaŵafika pamtima. Apo nkhaghanirangapo chomene nthena, ndipo nkhakhumbangaso chomene kuŵawovwira.”—Rom. 10:13-15.

15-16. Nga umo chikulongolera chithuzi, kasi pakuŵa vyandulo wuli para tikulongora chitemwa ku ŵanji?

¹⁵ Para tikulongora chitemwa ku ŵabali na ŵadumbu ŵithu, ndiwo pera yayi ŵakusanga chandulo. Muliri wa COVID-19 wati wayamba, mubali munyake zina lake Paolo na muwoli wake ŵakawovwira ŵadumbu ŵanandi ŵachekuru kugwiliskira ntchito mafoni, matabuleti panji makompyuta pakupharazga. Mudumbu munyake uyo pakwamba vikamusuzganga kugwiliskira ntchito vinthu ivi paumaliro wakamanya. Wakakwaniska kuchemerako ŵabali ŵake ku Chikumbusko, ndipo 60 mwa iwo ŵakawungana kwizira pa vidiyokonferensi. Mudumbu uyu pamoza  na ŵabali ŵake wose ŵakapindura chifukwa cha wovwiri wa Paolo na muwoli wake. Pamanyuma, mudumbu uyu wakalembera Palolo kuti: “Nkhumuwongani chomene chifukwa cha kutisambizga ise taŵachekuru. Nizamuluwa yayi umo Yehova waŵira nase panyengo iyi kweniso ivyo muli kutichitira.”

¹⁶ Vyakuchitika vya nga ni ivi vikamusambizga Paolo sambiro lakuzirwa. Vikamukumbuska kuti chitemwa ntchakuzirwa chomene kuluska kumanya waka vinthu panji maluso ghithu. Iyo wakuti: “Nkhateŵeteranga nga mulaŵiliri wa dera. Mazuŵa ghano, nkhumanya kuti nangauli ŵabali na ŵadumbu ŵangaŵa kuti ŵali kuluwa nkhani zane, kweni ŵachali kukumbukira wovwiri uwo nkhaŵapa.”

17. Kasi ni njaniso uyo wakupindura para tikulongora chitemwa?

¹⁷ Para tikulongora chitemwa ku ŵanji, nase tikupindura mu nthowa izo takhazganga yayi. Jonathan, uyo wakukhala ku New Zealand, wakukhozgera fundo iyi. Zuŵa linyake pa Chisulo muhanya apo kukawotchanga chomene, wakawona mupayiniya uyo wakapharazganga yekha mu msewu. Jonathan wakasankha kuti wapharazgirenge lumoza na mupayiniya uyu mise yiliyose pa Chisulo. Panyengo iyi wakamanyanga yayi umo wangapindulira chifukwa cha kuchita nthena. Jonathan wakuzomerezga kuti: “Panyengo iyi kupharazga kukaninozgeranga yayi. Kweni nati nawona umo mupayiniya uyu wakasambizgiranga kweniso umo ŵanji ŵakapinduliranga na uteŵeti wake, nane nkhamba kutemwa chomene kupharazga. Mupayiniya uyu wakazgokaso mubwezi wane wapamtima ndipo wakanovwira kuti nikure mwauzimu, nikondwenge na uteŵeti, kweniso kuti nisendelere chomene kwa Yehova.”

18. Kasi Yehova wakukhumba kuti tichite vichi?

¹⁸ Yehova wakukhumba kuti tikuzgenge chitemwa chithu pa iyo kweniso ku ŵanji. Nga umo tasambilira, tingakuzga chitemwa chithu pa Yehova para tikuŵazga Mazgu ghake na kughanaghanirapo kweniso para tikulomba nyengo zose. Tingakuzga chitemwa chithu pa ŵabali na ŵadumbu para tikuŵawovwira munthowa zakupambanapambana. Apo chitemwa chithu chikukura, tisendelerenge chomene kwa Yehova kweniso tiŵenge paubwezi wakukhora na ŵabali na ŵadumbu. Ndipo tiŵenge paubwezi uwu kwamuyirayira.