1, 2. (a) Kasi ŵalendo ŵanandi ŵakusangana na masuzgo wuli mazuŵa ghano? (Wonani chithuzi chakwamba.) (b) Kasi Baibolo likutiphalira vichi, ndipo pakuŵa mafumbo wuli?

VYAKA 30 ivyo vyajumpha, Osei wa ku Ghana wakaluta ku Europe. ^[1] Pa nyengo iyi, Osei wakaŵa Kaboni wa Yehova yayi. Iyo wakati: “Nkhati nafika waka ku Europe, nkhawona kuti ŵanthu ŵanandi ŵakaŵavya nane ntchito. Malo ghake nagho ghakaniŵira ghachilendo chifukwa ghakuzizima chomene. Nkhati nafuma waka pa chiŵanja cha ndege, nkhayamba kulira chifukwa kakaŵa kakwamba kufika ku malo ghakuzizima nthena pa umoyo wane.” Kwa chaka chathunthu, Osei wakaŵa kuti wandasange ntchito yiwemi chifukwa chiyowoyero chikamusuzganga. Wakayamba kuchita phukwa chifukwa chakuti wakaŵa kutali na kwake.

² Kasi imwe mungatemwa kuti ŵanthu ŵamuchitirani wuli para mwafika ku malo ghachilendo? Mwachiyelezgero, kasi mungakondwa yayi usange ŵabali na ŵadumbu ŵangamupokelerani makora  pa maungano kwambura kuwona mtundu panji chiyowoyero chinu? Nakuti Baibolo likuchiska Ŵakhristu ŵaunenesko kuti: “Mungaluwanga yayi kuchitira lusungu ŵalendo.” (Heb. 13:2, mazgu ghamusi) Ntheura tiyeni tidumbiskane mafumbo agha: Kasi Yehova wakuŵawona wuli ŵalendo? Chifukwa wuli tikwenera kuwona ŵalendo mwakwenelera? Kasi tingawovwira wuli ŵalendo awo ŵiza mu mpingo withu kufuma ku charu chinyake kuti ŵafwatukenge?

3, 4. Kasi lemba la Ekisodo 23:9 likuti Yehova wakakhumbanga kuti Ŵaisrayeli ŵachitenge wuli na ŵalendo, ndipo chifukwa wuli?

³ Yehova wati wafumiska Ŵaisrayeli mu Eguputo, wakaŵapa malango gha umo ŵakwenera kuchitira na ŵanthu ŵamitundu awo ŵakanyamukira nawo lumoza pa ulendo uwu. (Eks. 12:38, 49; 22:21) Pakuti ŵalendo ŵakaŵavya vinthu vinandi, Yehova wakapeleka malango agho ghakawovwiranga kuti ŵanthu aŵa nawo ŵasange vyakukhumbikwa pa umoyo wawo. Linyake mwa malango agha likapelekanga wanangwa ku ŵalendo kuti ŵavulurenge mu minda.—Lev. 19:9, 10.

⁴ Yehova wakaphalira Ŵaisrayeli kuti ŵachindikenge ŵalendo, ndipo wakachita kuŵapempha kuti ŵachitirenge lusungu ŵalendo. (Ŵazgani Ekisodo 23:9.) Ŵaisrayeli ‘ŵakamanyanga umo vikuŵira para munthu ni mulendo.’ Nanga ni apo ŵakaŵa kuti ŵandazgoke ŵazga ku Eguputo, Ŵaisrayeli ŵakatinkhikanga chomene na Ŵaeguputo chifukwa cha mtundu wawo panji chifukwa cha Chiuta uyo ŵakasopanga. (Gen. 43:32; 46:34; Eks. 1:11-14) Nangauli Ŵaisrayeli ŵakayuzgika chomene na Ŵaeguputo, kweni Yehova wakakhumbanga kuti ŵawonenge mulendo “nga njumoza” wawo panji kuti mubali wawo.—Lev. 19:33, 34.

5. Kasi ntchivichi chingatovwira kuti tilongorenge lusungu ku ŵalendo nga ni Yehova?

⁵ Mazuŵa ghano napo, tikumanya kuti Yehova wachali kuchitira lusungu ŵalendo awo tikuwungana nawo mu mipingo yithu. (Doto. 10:17-19; Mal. 3:5, 6) Para tikughanaghanira masuzgo agho ŵalendo ŵakukumana nagho nga ni sankho, kweniso chiyowoyero chachilendo, tipenjerezgenge nthowa zakuŵalongolera lusungu na kuŵawovwira kuti nawo ŵafwatukenge.—1 Pet. 3:8.

6, 7. Kasi tikumanya wuli kuti Ŵakhristu ŵakwambilira ŵakamazga sankho pakati pawo?

⁶ Ŵakhristu ŵakwambilira ŵakasambira umo ŵangamazgira sankho ilo likazara chomene pakati pa Ŵayuda. Pa Pentekoste 33 C.E., Ŵakhristu awo ŵakakhalanga mu Yerusalemu ŵakalongora lusungu ku ŵanthu ŵakufuma ku vyaru vinyake awo ŵakazgoka Ŵakhristu. (Mil. 2:5, 44-47) Chitemwa icho Ŵakhristu Ŵachiyuda ŵakalongora pa nyengo iyi, chikulongora kuti ŵakapulikiska ng’anamuro la “kupokelera ŵalendo.” Mazgu agha ghakung’anamura “kuchitira lusungu ŵalendo.”

⁷ Ndipouli, apo mpingo wakwambilira Wachikhristu ukakuranga, pakaŵa sankho. Ŵayuda awo ŵakayowoyanga Chigiriki ŵakamba kudandawura kuti Ŵayuda awo ŵakayowoyanga Chihebere ŵakuzerezga vyokoro ivyo vikayowoyanga Chigiriki. (Mil. 6:1) Kuti ŵamazge suzgo ili, ŵapositole ŵakasora ŵanalume 7 kuti ŵawoneseskenge kuti palije waliyose uyo wakuzgelereka. Ŵanalume wose 7 awo ŵakasoleka ŵakaŵa na mazina Ghachigiriki. Ichi chikulongora kuti ŵapositole ŵakakhumbanga kuti paleke kuŵa sankho pakati pa Ŵakhristu.—Mil. 6:2-6.

8, 9. (a) Kasi ntchivichi chingalongora kuti tili na sankho? (b) Kasi tikwenera kuwuskamo vichi mu mtima withu? (1 Pet. 1:22)

 ⁸ Kwali tikumanya panji yayi, tose tikuchita vinthu mwakuyana na mutheto withu. (Rom. 12:2) Kanandi tikupulika ŵazengezgani, ŵanyithu ku ntchito panji ku sukulu, ŵakunyoza ŵanthu ŵa fuko linyake. Kasi nase tikuchitako ivi? Kasi tikujipulika wuli usange munyake wamba kuyowoya mwakutalulira vinthu viheni vya mtundu withu?

⁹ Nyengo yinyake mpositole Petrosi wakaleka kuchezga na ŵanthu awo ŵakaŵa Ŵayuda yayi. Kweni pachoko na pachoko, wakamazga sankho mu mtima wake. (Mil. 10:28, 34, 35; Gal. 2:11-14) Mwakuyana waka, usange tawona kuti tamba kuŵa na sankho mu mtima withu tikwenera kuchitapo kanthu mwaluŵiro. (Ŵazgani 1 Petrosi 1:22.) Tikwenera kukumbuka kuti tose ndise ŵakwananga, kwali ndise ŵafuko wuli. Nakuti palije uyo wazamupona chifukwa cha fuko lake. (Rom. 3:9, 10, 21-24) Ntheura palije chifukwa cha kujitemwera kuti tili ŵapachanya kuluska ŵanyithu. (1 Kor. 4:7) Tikwenera kuŵa ŵakujiyuyura nga ni Paulosi uyo wakaphalira ŵakuphakazgika ŵanyake kuti “muchali ŵalendo yayi kweni . . . muli ŵamunyumba ya Chiuta.” (Efe. 2:19) Ipo tikwenera kulimbikira kuti tiwonenge mwakwenelera ŵanthu ŵa mitundu yinyake. Ichi chitovwirenge kuvura wunthu wakale na kuvwara uphya.—Kol. 3:10, 11.

10, 11. Kasi umo Bowazi wakachitira na Rute, wakayezga wuli Yehova pa nkhani ya kuchitira lusungu ŵalendo?

¹⁰ Umo Bowazi wakachitira na Rute Mumowabu, wakalongora kuti wakawonanga ŵalendo nga umo Yehova wakuŵawonera. Apo Bowazi wakizanga kuzakawona umo ŵateŵeti ŵake ŵakugwilira ntchito yakuvuna, wakawona mwanakazi wachilendo uyo wakalimbikiranga chomene kuvulura. Bowazi wakapulika kuti mulendo uyu wakapempha dankha kuti wavulureko mu munda wake nangauli wakaŵa kale na wanangwa wakuvulura. Ntheura Bowazi wakaphalira ŵantchito ŵake kuti ŵamuleke wavulurenge pa balere uyo ŵawunjika kale.—Ŵazgani Rute 2:5-7, 15, 16.

¹¹ Ivyo Bowazi na Rute ŵakadumbiskana, vikulongora kuti Bowazi wakafipiranga mtima Rute pakuŵa mulendo. Bowazi wakamuphalira Rute kuti wakhalenge na gulu la ŵateŵeti ŵake ŵanakazi kuti ŵateŵeti ŵake ŵanalume ŵaleke kumusuzga. Wakawoneseskaso kuti Rute wali na chakurya na maji ghakukwana nga umo vikaŵira na ŵaganyu ŵake wose. Kweniso Bowazi wakamunyozanga yayi mwanakazi mulendo uyu, m’malo mwake wakamukhozganga.—Rute 2:8-10, 13, 14.

12. Kasi chingachitika ntchivichi para tikulongora lusungu ŵalendo?

¹² Bowazi wakakondwa nayo chomene Rute chifukwa wakatemwanga nyinavyara, Naomi, kweniso wakamba kusopa Yehova. Lusungu ulo Bowazi wakalongora kwa Rute, mbukaboni wakuti Yehova wakamutemwanga Rute uyo ‘wakabisama mu mapapindo gha Chiuta wa Israyeli.’ (Rute 2:12, 20; Zinth. 19:17) Mwakuyana waka, para nase tikulongora lusungu ŵalendo, tingawovwira “ŵanthu ŵa mitundu yose” kumanya unenesko, kweniso kumanya umo Yehova wakuŵatemwera.—1 Tim. 2:3, 4.

13, 14. (a) Chifukwa wuli tikwenera kuŵikapo mtima kutawuzga ŵalendo awo ŵiza pa Nyumba ya Ufumu? (b) Kasi mungachita wuli para vikumusuzgani kuchezga na mulendo?

¹³ Para tapokera ŵalendo pa Nyumba ya Ufumu tikwenera kuŵatawuzga mwaubwezi kulongora kuti ndise ŵalusungu. Kanandi ŵalendo ŵakuŵa na soni ndipo ŵakutemwa kujipatura. Iwo ŵangamba kuwona fuko panji mtundu wawo kuŵa wapasi chifukwa cha umo ŵali kukulira, na umo ŵakuwonekera. Ntheura tikwenera kwamba ndise kuŵatawuzga mwaubwezi, kulongora kuti nawo mbakuzirwa.  Para JW Language app yikusangika mu chiyowoyero chinu, mungayigwiliskira ntchito kuti musambire umo mungatawuzgira ŵanthu mu chiyowoyero chawo.—Ŵazgani Ŵafilipi 2:3, 4.

¹⁴ Nyengo zinyake vingamusuzgani kuchezga na mulendo uyo mukupambana mitheto. Kweni kuti mumarane na suzgo ili, mukwenera kujilongosora dankha mwaŵene. Para mungachita nthena mungazizwa kuwona kuti pali vinthu vinandi chomene ivyo mose mukuyana nangauli mukupambana mtundu panji fuko. Mumanyengeso kuti mutheto uliwose uli na uwemi na uheni wake.

15. Kasi ntchivichi icho chingatovwira kuti tiŵapulikiskenge ŵalendo?

¹⁵ Kasi tingaŵawovwira wuli ŵalendo kuti ŵaŵenge ŵakufwatuka? Tikwenera kujifumba kuti, ‘Kasi usange ine ningaŵa mulendo mu charu chinyake, ningatemwa kuti ŵanthu ŵachitenge nane wuli?’ (Mat. 7:12) Tikwenera kuzikira na ŵanthu awo ŵachali kusambira mitheto ya mu charu chithu. Pakwamba tingapulikiska yayi umo ŵakughanaghanira panji chifukwa icho ŵakuchitira vinthu vinyake. Ntheura tileke kukhazga waka kuti nyengo zose ŵachitenge mwakuyana na mutheto withu, m’malo mwake tikwenera kuŵapulikiska waka.—Ŵazgani Ŵaroma 15:7.

16, 17. (a) Kasi tingachita vichi kuti tizgoŵerane luŵiro na ŵalendo? (b) Kasi tingaŵawovwira vichi ŵalendo awo ŵiza mu mpingo withu?

¹⁶ Para tamanya uko ŵalendo ŵafuma kweniso mitheto yawo, chiŵenge chipusu kuzgoŵerana nawo. Nyengo zinyake pa Nyengo Yakusopera ya Mbumba tingapatura nyengo kuti tiŵamanye makora ŵalendo awo ŵiza mu mpingo panji mu chigaŵa chithu. Nthowa yinyake njakuŵachemera ku nyumba zithu kuti tikachezge na kurya nawo lumoza. Pakuti Yehova ‘wajulira ŵamitundu mulyango kuti ŵaŵe na chipulikano,’ ipo nase tikwenera kujulira mulyango  ŵalendo “awo mbamoza na ise mu chipulikano.”—Mil. 14:27; Gal. 6:10; Yobu 31:32.

¹⁷ Para tikupatura nyengo ya kuchezga nawo, tizamukondwa kumanya ivyo ŵakuchita kuti ŵazgoŵere mitheto yithu. Tizamuwonaso kuti ŵakukhumbikwira wovwiri withu kuti ŵasambire chiyowoyero chithu. Kweniso, tingaŵawovwira kuti ŵasange nyumba yiwemi yakukhalamo panji ntchito. Ivi vingaŵawovwira chomene kuti ŵabali ŵithu ŵazgoŵere luŵiro malo ghachilendo.—Zinth. 3:27.

18. Kasi ŵalendo ŵangasambirako vichi kwa Rute?

¹⁸ Ŵalendo nawo ŵakwenera kuchitapo kanthu kuti ŵazgoŵere mitheto ya ku chigaŵa icho ŵali kusamira. Rute ntchiyelezgero chiwemi pa nkhani iyi. Chakwamba, Rute wakalongora kuti wakuchindika mitheto ya Ŵaisrayeli. Wakafumba dankha usange ŵangamuzomerezga kuvulura. (Rute 2:7) Iyo wakagwiliskira ntchito makora wanangwa wake wakuvulura. Chachiŵiri, Rute wakawonga chomene chifukwa cha lusungu ulo ŵakamulongora. (Rute 2:13) Para ŵalendo ŵakulongora nkharo yiwemi nga ni Rute, ŵenekaya na awo ŵakusopa nawo ŵazamuŵachindika chomene.

19. Chifukwa wuli tikwenera kulutilira kupokelera ŵalendo?

¹⁹ Tikukondwa chomene kuti Yehova wakuchitira lusungu ŵanthu wose ndipo wapeleka mwaŵi kuti ŵanthu ŵamitundu yose ŵapulike makani ghawemi. Ŵanyake kukwawo ŵakaŵavya m’pata wa kusambira Baibolo panji kuwungana na Ŵakaboni ŵa Yehova. Kweni sono ŵasambira unenesko ndipo tikuwungana nawo. Kasi tingaŵawovwira yayi ŵanthu aŵa kuti ŵaŵenge ŵakufwatuka pakati pithu? Nangauli nyengo zinyake tingaŵavya vinthu vyakuti tiŵape, kweni para tikuŵalongora lusungu tikulongora kuti Yehova wakuŵatemwa. Pakuti ‘tikuyezga Chiuta,’ ipo nyengo zose tikwenera kuchitira lusungu ŵalendo.—Efe. 5:1, 2.