NKHABABIKA mu 1923 ku Hemsworth, mu tawuni ya Yorkshire, England. Nkhaŵa na mudumbu wane mulara, zina lake Bob. Apo nkhaŵa na vyaka 9, adada ŵakapokera mabuku ghakulongosora mautesi agho visopa vikusambizga. Iwo ŵakatinkhanga chomene maupusikizgi gha visopa. Ndipo ŵakakondwa chomene na ivyo ŵakaŵerenga. Vyaka vikati vyajumphapo, Bob Atkinson wakiza pa nyumba yithu. Wakatilizgira nkhani ya Mubali Rutherford pa giramafoni. Tikamanya kuti gulu ilo likafumiska nkhani iyi ndiloso likafumiska mabuku agho adada ŵakapokera. Ŵapapi ŵane ŵakapempha Mubali Atkinson kuti wizenge mise yiliyose kuzakarya nase chakurya na kuzgora mafumbo ghithu ghakukhwaskana na Baibolo. Tikaŵa na mafumbo ghanandi. Mubali Atkinson wakatipempha kuti tilute ku maungano ku nyumba ya mubali, kutali viŵi yayi na nyumba yithu. Nyengo yeneyiyo tikamba kuluta ku maungano ndipo mpingo uchoko ukapangika ku Hemsworth. Pakati pajumpha nyengo yichoko waka, tikamba kupokelera ŵalaŵiliri ŵadera na kuchemera ŵapayiniya ŵapafupi ku nyumba kwithu kuti tizakarye nawo chakurya. Ŵanthu aŵa ŵakanovwira chomene.

Panyengo iyo, tikaŵa kuti tamba bizinesi. Kweni Adada ŵakaphalira mudumbu wane kuti, “Para ukukhumba kukachita upayiniya mbwenu tilekenge ivi.” Bob wakazomera, ndipo wakafumapo pa nyumba na kwamba upayiniya. Panyengo iyo wakaŵa na vyaka 21. Pakati pajumpha vyaka viŵiri, nkhazomerezgeka kuŵa mupayiniya. Panyengo iyo nkhaŵa na vyaka 16. Kanandi nkhapharazganga nekha, kupaturako kuumaliro wa sabata. Nkhapharazganga na giramafoni kweniso nkhagaŵiranga tumakadi uto pakaŵanga upharazgi. Yehova wakanitumbika chomene. Nkhaŵa na musambiri uyo wakachitanga makora mwauzimu. Nyengo yikati yajumphapo, ŵanthu ŵanandi mu banja la musambiri uyu ŵakasambira unenesko. Chaka chakulondezgapo, nkhaŵa mupayiniya wapadera pamoza na Mary Henshall. Ŵakatituma ku Cheshire, chigaŵa icho kukaŵavya ŵapharazgi.

Panyengo iyo, Nkhondo Yachiŵiri ya Charu Chose yikaŵa mukati. Ŵanakazi ŵakatumikanga ku nkhondo kuti ŵakachitenge ntchito zinyake. Pakuti tikaŵa ŵateŵeti ŵanyengozose, taŵapayiniya ŵapadera tikaghanaghananga kuti ŵatilekenge chifukwa ŵateŵeti ŵa matchalitchi ghanyake ŵakaŵalekanga. Kweni khoti likakana. Ntheura ŵakanijalira mu jele mazuŵa 31. Chaka chakulondezgapo, apo nkhaŵa na vyaka 19,  nkhalembeska ku boma kuti chipulikano chane chikunizomerezga yayi kuluta ku nkhondo. Ŵakaluta nane ku makhoti ghaŵiri, kweni ŵakanisanga wambura mulandu. Panyengo yose iyi, nkhamanya kuti mzimu utuŵa ukanovwiranga ndipo Yehova wakanikoranga pa woko na kunikhozga.—Yes. 41:10, 13.

Nkhakumana na Arthur Matthews mu 1946. Iyo wakaŵa kuti wafuma waka mu jele, wati wakhalamo myezi yitatu chifukwa cha kukana kuluta ku nkhondo. Wakiza kuzakakhala na munung’una wake Dennis, uyo wakaŵa mupayiniya wapadera ku Hemsworth. Adada ŵawo ŵakaŵasambizga za Yehova kufuma pa wana ndipo ŵakabatizika ŵachali ŵawukirano. Pakati pajumpha nyengo yichoko waka, Dennis ŵakamutuma ku Ireland, ndipo Arthur wakakhala yekha. Pakuwona nkharo iyo mupayiniya wachinyamata uyu wakaŵa nayo na umo wakalimbikiranga uteŵeti, ŵapapi ŵane ŵakamuchema kuti ŵakhalenge nayo. Para naluta kukawona ŵapapi ŵane, ine na Arthur tikachapanga mbale zose para tamara kurya. Pamanyuma tikamba kulemberana makalata. Mu 1948, Arthur ŵakamujaliraso mu jele myezi yitatu. Tikatorana mu Janyuwale 1949 ndipo tikapangana kuti tilutilire uteŵeti wanyengozose usange vingachitika. Chifukwa chakuti Yehova wakatovwiranga kweniso tikaŵa na ndondomeko yiwemi, nyengo iyo tikachitanga uteŵeti yayi tikagwiranga ganyu wa kuphawura vipambi. Ivi vikatovwira kuti tisangengeko ndalama. Ntheura tikalutilira kuchita upayiniya.

Pakati pajumpha chaka chimoza, ŵakatipempha kuti tilute ku Northern Ireland. Pakwamba tikaluta ku Armagh, ndipo pamanyuma tikaluta ku Newry. Ŵanthu ŵanandi mu matawuni agha ŵakaŵa Ŵakatolika. Ŵanthu mu chigaŵa ichi ŵakaŵa ŵakali chomene. Ntheura tikeneranga kuŵa ŵakuchenjera kweniso ŵamahara pakupharazga. Maungano tikachitiranga pa nyumba ya mubale munyake, iyo yikaŵa pa mtunda wa makilomita 16 kufuma uko tikakhalanga. Tikawungananga ŵanthu 8. Para ŵatipempha kuti tigone, tikagonanga pasi ndipo para kwacha ŵakatiphikiranga chakurya chinandi. Sono tikukondwa chomene kuwona kuti ku chigaŵa ichi kuli Ŵakaboni ŵanandi.

Mudumbu wane na muwoli wake Lottie ŵakaŵa kuti ŵakuchita kale upayiniya wapadera ku Northern Ireland. Mu 1952 tose taŵanayi tikaluta ku ungano wa chigaŵa ku Belfast. Tose tikakhalanga ku nyumba ya mubali munyake pamoza na mubali Pryce Hughes uyo panyengo iyo wakaŵa mteŵeti wa munthavi ku Britain. Zuŵa linyake tikadumbiskananga za kabuku ka God’s Way Is Love ako kakaŵa kuti kafuma waka ndipo kakalembekera chomene ŵanthu ŵa ku Ireland. Mubali Hughes wakalongosora kuti chikaŵa chakusuzga kupharazgira Ŵakatolika ku Irish Republic. Ku ungano uwu, ŵabali ŵakaŵafumiskanga umo ŵakagonanga ndipo chigulu cha ŵanthu chikaŵawukiranga. Ŵasembe ndiwo ŵakapangiskanga vyose ivi. Pryce wakati, “Tikukhumba ŵakutorana awo ŵali na galimoto kuti ŵachite upharazgi wapadera wakugaŵira kabuku aka mu charu chose ichi.” * Nyengo yeneyiyo tikazgora kuti, “Tichitenge!”  Ndipo pafuma mazgu agho ghali kukwambilira kwa nkhani iyi.

Malo ghanyake agho ŵapayiniya ŵakatemwanga kufikirako kukaŵa ku Dublin, ku nyumba ya Ma Rutland, mudumbu wakugomezgeka uyo wakateŵetera Yehova nyengo yitali. Tikayima pa malo agha na kuguliska katundu munyake uyo tikaŵa nayo. Pamanyuma, tose ŵanayi tikakwera njinga yamoto ya Bob iyo yikaŵa na kanthu kanyake ako mukakweranga ŵanthu. Tikaluta kukapenja galimoto kuti tigule. Tikasanga galimoto yikoloŵere kweni yiwemi ndipo tikapempha uyo wakatiguliska kuti wize nayo chifukwa tose tikamanyanga yayi kwendeska. Namise Arthur wakakhala pa bedi na kuyezgelera kusintha magiya. Kukati kwacha, Arthur wakakhumbanga kufuma na galimoto mu galaja, ndipo kukiza Mildred Willett (uyo wakaŵa mishonale ndipo pamanyuma wakatorana na John Barr). Wakamanyanga kwendeska galimoto. Mudumbu uyu wakatisambizgako pachoko, ndipo pamanyuma ulendo ukambika.

Kufuma apo, tikakhumbanga kwakugona. Ŵakatichenjezga kuti tingagonanga mu tilera yayi chifukwa ŵalwani ŵangiza na kotcha. Ntheura tikapenja malo ghakugona kweni tikaghasanga yayi. Mu usiku uwu, tose ŵanayi tikagona mu galimoto. Kukati kwacha, tikamba kupenja nyumba ndipo tikasanga waka tilera iyo mukaŵa mabedi ghachokoghachoko ghaŵiri. Tilera iyi ndiyo yikazgoka nyumba yithu. Chakukondweska ntchakuti pakaŵa ŵalimi ŵanyake ŵamitima yiwemi awo ŵakatizomerezga kwimika tilera yithu pa munda wawo. Tikapharazga chigaŵa chakukwana makilomita pakati pa 16 na 24. Para taluta kukapharazga ku vigaŵa vyakutali, tikawerangako na kuluta uko tikayimika tilera yithu. Para tafika, tikawelerangako kwa awo tikaŵapharazgira.

Tikapharazga mu nyumba zose za kumwera kwa chigaŵa ichi kwambura masuzgo. Tikagaŵira tumabuku 20,000 ndipo tikatumizganga mazina gha ŵakunweka ku ofesi ya munthavi ya Britain. Ntchakukondweska chomene kuti sono ku malo agha kuli Ŵakaboni ŵanandi.

Pakati pajumpha nyengo, ŵakatituma kumwera kwa London. Tikati takhala masabata ghachoko waka, Arthur wakapokera foni kufuma ku ofesi ya Britain. Ŵakamuphalira kuti namachero ghake wambe kwendera dera. Wakasambizgika ntchito iyi sabata yimoza na kuluta ku dera lithu liphya ku Scotland. Arthur wakaŵavya nyengo yakuti wanganozgekera nkhani, kweni wakaŵa wakunozgeka kuchita ntchito yiliyose iyo Yehova wamupa. Ichi chikanikhozganga chomene. Tikakondwanga chomene kwendera dera. Tikaŵa kuti tafuma waka pa kuteŵetera ku chigaŵa icho kukaŵavya ŵapharazgi ndipo chikaŵa chakukondweska kuŵa pamoza na ŵabali na ŵadumbu ŵanandi.

Mu 1962, Arthur wakachemeka ku Sukulu ya Giliyadi kuti wakachite kosi myezi 10. Chikaŵa chipusu yayi kuti tisankhe chakuchita pa nkhani iyi. Kweni tikawona kuti chikaŵa chakwenelera kuti wazomere uteŵeti uwu nangauli walutenge yekha. Pakuti nkhaŵavya munthu wakupharazga nayo, ŵakanitumaso ku Hemsworth kuti nkhachite upayiniya wapadera. Pakati pajumpha chaka chimoza, Arthur wakawerako. Ŵakatipa mulimo wa  kwendera chigaŵa mu Scotland, kumpoto kwa England, na Northern Ireland.

Mu 1964, Arthur wakapika uteŵeti uphya. Wakaŵa muteŵeti wa munthavi ku Irish Republic. Uteŵeti wakwendakwenda ukatinozgeranga chomene, ntheura pakwamba nkhakondwa viŵi yayi kuti tilekenge uteŵeti uwu. Kweni sono nkhuwonga chomene kuti tikapika mwaŵi wa kuteŵetera pa Beteli. Nkhugomezga kuti nyengo zose Yehova wakukutumbika para wazomera uteŵeti nangauli undaukhumbe. Zuŵa lililose nkhagwiranga ntchito za mu ofesi, kupakira mabuku, kuphika, na kutozga. Nyengo yinyake, tikenderaso chigaŵa ndipo tikakumanaso na ŵabali ŵanandi mu charu ichi. Tikaŵatemwanga chomene ŵabali na ŵadumbu ŵithu ku Ireland. Kweniso tikakondwanga para tikuwona awo tikasambiranga nawo Baibolo ŵakukura mwauzimu. Tikatumbikika chomene.

Ungano wakwamba wa mitundu yose mu charu cha Ireland ukachitika mu 1965 * ku Dublin. Ungano ukenda makora nangauli ŵakususka ŵakaŵa ŵanandi. Pa ungano uwu pakaŵa ŵanthu 3,948 ndipo 65 ŵakabatizika. Waliyose uyo wakapeleka malo ghakugona ku ŵalendo 3,500 awo ŵakiza pa ungano uwu, wakapokera kalata yakumuwonga. Ŵenecho ŵa nyumba ŵakalumbanga Ŵakaboni kuti ŵali na nkharo yiwemi. Ivi vikawovwira kuti ŵanthu ŵambe kuŵawona makora Ŵakaboni ku Ireland.

Mu 1966, munthavi wa ku Dublin ndiwo ukamba kulaŵilira umo ntchito yikwendera ku north na south Ireland. Ŵanthu ŵakawona kuti ivi ni vyachilendo chomene chifukwa pa chilumba ichi ŵanthu ŵakaŵa ŵakugaŵikana chifukwa cha ndyali na visopa. Tikakondwa chomene kuwona Ŵakatolika ŵanandi ŵasambira unenesko na kwamba kuteŵetera lumoza na ŵabali na ŵadumbu awo pakwamba ŵakaŵa Ŵaprotesitanti.

Mu 2011, vinthu vikasintha chomene pa umoyo withu apo munthavi wa Britain na Ireland ŵakasazga pamoza, ndipo ise ŵakatituma ku Beteli ya London. Panyengo iyo, nkhamba kufipa mtima na Arthur. Ŵakamusanga na matenda ku wongo (Parkinson). Pa Meyi 20, 2015, munyane wapamtima uyo nkhakhala nayo vyaka 66 wakatayika.

Vyaka ivi ni vyakuŵinya chomene, nkhusuzgika maghanoghano, kweniso nili na chitima. Apo nkhaŵa na Arthur, nyengo zose wakanovwiranga. Nkhumusoŵa chomene. Kweni para wamunthu wasangana na masuzgo ghanthena, ukusendelera chomene kwa Yehova. Nkhukondwa chomene para nkhuwona umo ŵanthu ŵakamutemweranga Arthur. Napokerapo makalata kufuma ku ŵabwezi ŵithu ku Ireland, Britain, na United States. Makalata agha ghakunikhozga chomene. Munung’una wa Arthur, Dennis, na muwoli wake Mavis, kweniso ŵana ŵa mudumbu wane mulara, Ruth na Judy, nawo ŵakunikhozga kweniso ŵakunovwira chomene. Nkhusoŵa na chakuyowoya wuwo.

Lemba ilo likunikhozga chomene nda Yesaya 30:18. Likuti: “Yehova wakulindilira waka kuti wamulongorani uwemi, ndipo wawukenge na kumulongorani lusungu. Pakuti Yehova ni Chiuta wa urunji. Mbakukondwa wose awo ŵakumulindilira.” Nkhupembuzgika chomene kumanya kuti Yehova wakulindilira mwakuzikira kuti wawuskepo masuzgo na kuzakatipa ntchito zakukondweska mu charu chiphya.

Para nkhughanaghanira umo vinthu vikaŵira, nkhuwona kuti Yehova wakulongozga na kutumbika ntchito yakupharazga ku Ireland. Nkhuwona kuti ni mwaŵi ukuru chomene kuti nane nkhawovwirapo pa ntchito iyi. Mbunenesko nadi kuti tikutumbikika para tikuchita ivyo Yehova wakukhumba.