Chiuta wakalayizga ntchimi Abrahamu kuti kwizira mwa yumoza wa mu mphapu yake “mitundu yose pa charu chapasi yizamusanga vitumbiko.” (Genizesi 22:18) Kasi munthu uyu ni njani?

Vyaka 2,000 ivyo vyajumpha, Chiuta wakapeleka nkhongono zakuchitira minthondwe kwa Yesu uyo njumoza wa mphapu ya Abrahamu. Minthondwe iyo Yesu wakachitanga yikalongora kuti ivyo Chiuta wakalayizga Abrahamu vizamufiskika kwizira mwa iyo.—Ŵagalatiya 3:14.

Minthondwe iyo Yesu wakachitanga yikawovwira ŵanthu kumanya kuti ndiyo wali kusankhika na Chiuta kuti ŵanthu ŵatumbikike. Kweniso yikalongoranga umo Chiuta wazamutumbikira ŵanthu kwamuyirayira kwizira mwa iyo. Wonani umo minthondwe iyo Yesu wakachitanga yikalongolera mikhaliro yake yiwemi.

Kughanaghanira ŵanthu—Yesu wakachizganga ŵalwari.

Nyengo yinyake munthu wavyoni wakapempha Yesu kuti wamuchizge. Yesu wakamukhwaska na kuyowoya kuti: “Nkhukhumba!” Ndipo nyengo yeneyiyo vyoni vya munthu yura vikamara.—Mariko 1:40-42.

Kupeleka—Yesu wakalyeska ŵanthu ŵa njara.

Yesu wakakhumba yayi kuti ŵanthu ŵawelere kwawo na njara. Mwamunthondwe, Yesu wakazgora tuvingwa na tusomba tuchoko waka kuŵa vinandi na kulyeska ŵanthu ŵanandi. (Mateyu 14:17-21; 15:32-38) Ŵanthu ŵakarya na kukhuta ndipo vinandi vikakhalapo.

Lusungu—Yesu wakawuskanga ŵakufwa.

Yesu wati wawona chokoro icho mwana wake msepuka yumoza pera wakafwa, ‘wakachichitira chitima,’ ndipo wakawuska msepuka yura.—Luka 7:12-15.