Ŵakajipeleka na Mtima Wose mu Brazil

VYAKA ivyo vyajumpha, Rúbia (1), mudumbu uyo sono wali na vyaka 30, wakaluta kukawona Sandra (2), mupayiniya uyo wakateŵeteranga mu mpingo ucoko kumwera kwa Brazil. Apo wakaŵa ku malo agha, cinthu cinyake cikacitika ndipo cikamukondweska comene Rúbia kweniso cikasintha umoyo wake. Kasi cikaŵa civici? Tiyeni tiwone ivyo Rúbia wakayowoya.

“NKHAGOMEZGA YAYI IVYO NKHAPULIKA”

“Sandra wakaluta nane kwa mwanakazi uyo wakasambiranga nayo Baibolo. Apo tikaŵa mukati mwa sambiro, mwanakazi uyu wakayowoya kuti: ‘Sandra, ŵasungwana ŵatatu uko nkhugwira nchito ŵakukhumba kusambira Baibolo, kweni ine naŵaphalira kuti ŵalindilire dankha. Nkhumanya kuti caka cino uli nawo kale ŵanthu ŵakuti uŵasambizge.’ Nkhagomezga yayi ivyo nkhapulika. Ŵanthu awo ŵakakhumbanga kumanya vya  Yehova ŵakacitanga kulembeka pa ndondomeko ya ŵanthu ŵakuti ŵalindilire dankha. Ku mpingo wakwithu nkhasuzgikanga kuti nisange sambiro nanga lingaŵa limoza. Pa nyengo yeneyiyi, ticali mu nyumba ya uyo tikasambiranga nayo Baibolo, khumbo lakuti novwire ŵanthu mu tawuni yicoko iyi likamba. Nyengo yicoko waka yikati yajumphapo nkhasama mu tawuni yikuru iyo nkhakhalanga na kuluta mu tawuni iyo Sandra wakacitangako upayiniya.”

Kasi vinthu vikamwendera wuli Rúbia? Wakayowoya kuti: “Mu myezi yiŵiri pera nati nasamira ku malo agha, nkhacitiskanga masambiro gha Baibolo 15, ndipo mwambura kucedwa, nga ni Sandra, nane nkhamba kuŵa na ndondomeko ya ŵanthu ŵakuti ŵalindilire dankha.”

WAKACISKIKA KUTI WASANDESO UTEŴETI WAKE

Diego (3), mubali uyo sono wali na vyaka vya m’ma 20, wakayendera ŵapayiniya awo ŵakuteŵetera ku Prudentópolis, tawuni yicoko kumwera kwa Brazil. Ulendo uwu ukamukondweska comene; nakuti, wakaciskika kuti wasandeso uteŵeti wake. Iyo wakuti: “Nkhacitanga vinandi yayi mu mpingo, ndipo mwezi uliwose nkhapharazganga kwa maora ghacoko waka. Kweni nkhati nendera ŵapayiniya aŵa na kutegherezga vyakucitika mu uteŵeti wawo, nkhaciskika kuyaniska cimwemwe ico ŵakaŵa naco na umo ine nkhuwonera uteŵeti. Nkhati nawona umo ŵakakondweranga, nane nkhakhumba kuti umoyo wane uzakaŵe wacandulo nga ngwawo.” Diego wakamba upayiniya wakati wawerako ku ulendo uwu.

Nga ni Diego, kasi ndimwe Kaboni muwukirano uyo wakupharazga na kuwungana na mpingo waunenesko kweni mukuwona kuti mukucita uteŵeti mwacizgoŵi waka, ndipo mukukondwa nawo yayi? Usange ni nthena, kasi mungasintha yayi vinthu mu umoyo winu kuti muŵe na cimwemwe ico cikwiza cifukwa ca kuteŵetera uko kukukhumbikwira ŵapharazgi ŵanandi ŵa Ufumu? Nchakawiro kwa imwe kopa kuleka umoyo uwemi. Ndipouli, ŵawukirano ŵanandi ŵasankha kucita nthena. Ŵaleka vinthu vinyake kuti ŵasinthe vilato na vyakukhumba vyawo mwakuti ŵateŵetere Yehova mwakufikapo. Ciyelezgero cinyake ni Bruno.

NKHWANTHA YA VYAKWIMBAKWIMBA PANJI MUTEŴETI?

Vyaka ivyo vyajumpha, Bruno (4), uyo sono wali na vyaka 28, wakasambiranga pa sukulu yakumanyikwa comene yakusambizga kwimba, ndipo cilato cake cikaŵa cakuti  wazakaŵe mulongozgi wa gulu la ŵakwimba. Nakuti masambiro ghake ghakamwendera makora comene mwakuti kanandi wakacemekanga kuti wakasambizge ŵanthu kwimba. Wakatenge waŵenge pa nchito yiwemi comene. Bruno wakati: “Kweni nkhajipulikanga kuti nkhusoŵerwa cinthu cinyake pa umoyo wane. Nkhajipeleka kwa Yehova, kweni nkhawona kuti nkhamupanga vyose yayi, ndipo ici cikaniŵinyanga comene. Nkhamuphalira Yehova mu lurombo umo nkhajipulikiranga, kweniso nkhayowoya na ŵabali awo ŵakumanya vinandi mu mpingo. Nkhati naghanaghanirapo comene, nkhasankha kuŵika uteŵeti pakwamba m’malo mwa sumu. Nkhaleka sukulu yakusambizga kwimba, ndipo nkhasankha kukateŵetera uko kukukhumbikwira ŵapharazgi ŵanandi ŵa Ufumu.” Kasi ivyo wakasankha vikamwendera wuli?

Bruno wakasamira mu tawuni ya Guapiara (iyo yili na ŵanthu pafupifupi 7,000), yeneiyo yili pa mtunda wa makilomita 260 kufuma mu msumba wa São Paulo. Uku kukaŵa kusintha kukuru comene. Iyo wakayowoya kuti: “Nkhasamira mu nyumba yicoko yambura furiji, TV, panji Intaneti. Ndipouli, pa nyumba iyi pakaŵa vinthu ivyo pakwamba nkhaŵavya. Nkhaŵa na munda wa mphangwe na wa vipambi.” Apo wakateŵeteranga mu mpingo ucoko uwu, kamoza pa sabata Bruno wakapakiranga cakurya, maji na mabuku mu cikwama ndipo wakakweranga pa muthuthuthu wake kuti wakapharazge ku vigaŵa vya ku mizi. Ŵanthu ŵanandi ku malo agha ŵakaŵa kuti ŵandapulikepo makani ghawemi. Wakayowoya kuti: “Nkhacitiskanga masambiro gha Baibolo 18. Pakuwona umo ŵanthu aŵa ŵakasinthira umoyo wawo nkhaŵa na cimwemwe cikuru comene.” Wakayowoyaso kuti: “Pa nyengo iyi nkhamanya kuti nasanga ico nkhasoŵerwanga mu umoyo wane, ico nkhukhorwa kweneuko kukwiza cifukwa ca kuŵika vinthu vya Ufumu pa malo ghakwamba. Nkhatenge niŵenge wakukondwa nthena yayi usange niŵikenge mtima pa kufiska vilato vyane vyakuthupi.” Kasi Bruno wakasanganga wuli ndalama zakuti zimovwire kusanga vinthu vyakukhumbikwira mu Guapiara? Wakamwemwetera wakati: “Nkhusambizga ŵanthu kulizga gitara.” Wakalutilira kuŵa nkhwantha ya vyakwimbakwimba, kweni pacoko waka.

“NKHAWONA KUTI CIWEMI NIKHALE”

Mariana (5), uyo sono wali pafupi kufiska vyaka 30, nayo wakaŵa na suzgo lakuyana na la Bruno. Wakagwiranga nchito ya uloya. Nangauli wakapokeranga ndalama zinandi, kweni wakaŵa wakukhorwa yayi. Iyo wakati: “Nkhawonanga kuti iyi yikaŵa ‘suzgo ya mtima.’” (Muph. 1:17)  Ŵabali na ŵadumbu ŵanandi ŵakamuciska kuti waghanaghanirepo vya kucita upayiniya. Wakati waghanaghanirapo, Mariana pamoza na ŵabwezi ŵake Bianca (6), Caroline (7), Juliana (8), ŵakasankha kukawovwira mpingo wa mu Barra do Bugres tawuni iyo yili kufupi na Bolivia, yeneiyo yili kutali comene na kukaya kwawo. Kasi nchivici cikacitika pamasinda pake?

Mariana wakati: “Nkhakhumbanga kukhala ku malo agha myezi yitatu pera. Kweni myezi iyi yikati yamara, nkhacitiskanga masambiro gha Baibolo 15. Ndipouli, ŵasambiri aŵa ŵakakhumbikwiranga wovwiri ukuru comene kuti ŵakure mu unenesko. Nkhaŵavya cikanga cakuti niŵaphalilire kuti nkhuwera. Ntheura nkhawona kuti ciwemi nikhale waka kwenekuku.” Ivi ndivyo ŵadumbu wose ŵanayi ŵakacita. Kasi ivyo Mariana wakasankha kucita vikaŵa vyacandulo pa umoyo wake? Wakayowoya kuti: “Nkhukondwa kuti Yehova wakunigwiliskira nchito kovwira ŵanthu kuti ŵasinthe umoyo wawo. Ni thumbiko kwa ine kumanya kuti sono nyengo na nkhongono zane nkhucitira vinthu ivyo ni vyakuzirwa nadi.” Caroline wakayowoya mwakudumura maghanoghano gha ŵadumbu wose ŵanayi, wakati: “Usiku para nagona, nkhujipulika wakukhorwa cifukwa cakuti nkhufwilirapo kupenja vinthu vya Ufumu. Umoyo wane sono wajintha pa umo ningawovwilira ŵanthu awo nkhusambira nawo Baibolo. Nchakukondweska comene kuŵawona umo ŵakulutira panthazi. Nkhuwona kuti mazgu agha ngaunenesko, ghakuti: ‘Cetani ’mwe! muwone kuti Yehova ndi muwemi.’”—Sal. 34:8.

Yehova wakukondwa comene kuwona kuti pa caru cose, ciŵelengero ca ŵabali na ŵadumbu ŵawukirano awo ‘ŵakujipeleka na mtima’ wose kupharazga makani ghawemi gha Ufumu ku vigaŵa ivyo ŵapharazgi mbacoko, panji ivyo kulijirethu ŵapharazgi cikusazgikira. (Sal. 110:3; Zinth. 27:11) Ŵanchito wose ŵakujipeleka aŵa ŵakutumbikika na Yehova.—Zinth. 10:22.

[Bokosi pa peji 5]

“Tikasoŵerwapo Kanthu Yayi”

João Paulo na muwoli wake, Noemi, ŵakati ŵayowoya vya khumbo lawo la kukateŵetera uko kukukhumbikwira ŵapharazgi ŵanandi, ŵanji ŵakaŵagongoweskanga. Ŵanji mu mpingo ŵakayowoyanga kuti: “Mwamusuzgika kusanga ndalama para mwasamira mu tawuni yicoko.” “Cifukwa wuli mukukhumba kusama? Muno mu mpingo withu mucali vinthu vinandi vyakuti mungacita.” João Paulo wakati: “Cikaŵa cakusuzga kuti tikane kugongoweskeka na ulongozgi uwu, cifukwa ukawonekanga nga nguwemi waka.” Ndipouli, pamanyuma pa kuteŵetera vyaka vinandi mu cigaŵa ico cikakhumbikwiranga ŵapharazgi ŵanandi, mazuŵa ghano, João Paulo na Noemi mbakukondwa cifukwa ŵakasintha yayi khumbo lawo la kusazgirako uteŵeti wawo. João Paulo wakayowoya kuti: “Kufumira waka apo ine na muwoli wane tikizira kuno mpaka sono, tindasoŵerwepo kanthu. Ndipo para tingayowoya za vinthu vyakukhumbikwa nadi, sono ndipo tili na vinandi comene kuluska pakwamba.” Noemi wakayowoya kuti: “Tikacita makora kusazgirako uteŵeti withu.”

Nchakusuzga kusanga vyakukhumbikwira pa umoyo mu tawuni yicoko. Kasi awo ŵakusamira ku vigaŵa vya ku mizi ŵakusanga wuli ndalama zakugulira vinthu vyakukhumbikwira pa umoyo? Mwa kutokatoka. Ŵanji ŵakusambizga Cingelezi panji ciyowoyero cinyake, kusambizga ŵana ivyo ŵakusambira ku sukulu, kusona vyakuvwara, kupenta nyumba panji kugwira nchito yiliyose kwa maora ghacoko. Ndipo kasi awo ŵakuteŵetera uko kukukhumbikwa ŵapharazgi ŵanandi ŵakuyowoya fundo wuli yakuyana? Vitumbiko vikuŵa vinandi comene kuluska masuzgo agho ŵakukumana nagho.

[Bokosi pa peji 6]

Suzgo la Kukumbuka Kukaya

Tiago: “Nkhati nafika waka mu mpingo uphya, nkhamba kuŵa na phukwa. Mukaŵa ŵapharazgi ŵacoko comene mu tawuni iyi ndipo nkhaŵavya munthu wakucezga nayo. Nkhamba kukumbuka kukaya. Nkhamanya kuti nkhwenera kucitapo kanthu kuti nimazge suzgo ili. Ntheura nkhafwilirapo kuti nizgoŵerane na ŵabali na ŵadumbu mu mpingo, ndipo vikawovwira. Nkhaŵa na ŵabwezi ŵaphya, ndipo nkhaŵa wakukondwa comene. Nkhaŵa nga nili kukaya.”

[Cithuzithuzi pa peji 3]

Noemi na João Paulo, mu Ascurra, ku Santa Catarina

[Cithuzithuzi pa peji 4]

[Cithuzithuzi pa peji 4]

[Cithuzithuzi pa peji 4]

[Cithuzithuzi pa peji 5]

[Cithuzithuzi pa peji 6]

[Cithuzithuzi pa peji 6]

[Cithuzithuzi pa peji 6]