Ŵanthu Ŵakukhumbikwira Ciponosko

MAJI ghakazura mwamabuci mu mgodi wa malasha uwo uli pafupi na msumba wa Pittsburgh ku Pennsylvania, mu caru ca U.S.A. Ŵanalume ŵankhondi na ŵanayi awo ŵakagwiranga nchito mu mgodi uwu ŵakajalirika na maji. Mwamwaŵi, mukati mwa mgodi uwu mukaŵa khululu linyake la mamita 73 uko maji ghakaŵa ghandafikeko, ndipo wose ŵakamatana kwenekuko. Pakati pajumpha mazuŵa ghatatu ŵanalume aŵa ŵakafumiskikamo mu khululu ilo kwambura kupwetekeka. Kasi ŵakapona wuli?

Mwakovwirika na mapu gha mgodi uwu ndiposo mashini ghanyake, awo ŵakuponoska ŵanthu pangozi ŵakabowora khululu lisani la masentimita 65 na kunjizgapo citete cikuru ca mawaya. Citete ici cikafika apo ŵanthu aŵa ŵakawunjikana. Waliyose mwa ŵanthu aŵa wakakwera mu citete ici na kufumiskikira kuwaro. Wose ŵakafuma mu khululu ilo ŵakatenge ŵafwirengemo. Ŵanalume aŵa ŵakakondwa comene kuti ŵakapona, ndiposo ŵakawonga comene awo ŵakaŵaponoska.

Taŵanandi tingazakajalirika mu mgodi nga ni umo vikaŵira na ŵanalume ŵara yayi, nesi umoyo withu kuŵa pangozi. Ndipouli, tikukhumbikwira ciponosko cifukwa cakuti tingagega yayi matenda, ucekuru na nyifwa. Yobu wakalemba kuti: ‘Munthu wakubabika na mwanakazi mazuŵa ghake ngacoko waka na kuzura visuzgo. Wakufuma ngati luŵa, wakufota; wakucimbiraso ngati mfwiri, ntha wakukhalilira.’ (Job 14:1, 2) Pajumpha vilimika pafupifupi 3,500 kufuma apo Yobu wakayowoyera mazgu agha, ndipo tikuwona kuti mazgu agha ngaunenesko cifukwa cakuti palije uyo wangacimbira nyifwa. Mwambura kupwelerako kanthu za uko tikukhala panji umo tikujipwelelelera, tose tikukhumbikwira kuponoskeka ku ucekuru na nyifwa.

Ŵasayansi na ŵanthu ŵanyake ŵakuyezgayezga kuti umoyo wa ŵanthu uŵe utali. Wupu unyake ukayowoya kuti mulimo wake ngwakuti “umazge nyifwa” ndiposo “kovwira ŵanthu ŵa wupu uwu umo ŵangawovwilira ŵanthu kuti ŵaleke kufwa.” Nangauli pakuŵa kuyezgayezga kose uku, sayansi, ndiposo khumbo la ŵanthu lakuti ŵaleke kufwa, vindapangiske kuti umoyo wa munthu uŵe utali kujumpha pa vilimika 70 panji 80, ivyo Mozesi wakayowoya vilimika pafupifupi 3,500 ivyo vyajumpha.—Salmo 90:10.

Kwali mukuzomerezga panji yayi fundo ya Yobu yakukhwaskana na umoyo na nyifwa, unenesko ngwakuti, peneapo vilimika vikwenda, namwe mukucimbira nga ni mufwiri, muzamuleka ŵanyinu, mbumba yinu na cikaya cinu ndipo vyose ivyo mukacitanga vizamumalira pa nyifwa. Themba lavinjeru Solomoni likati: “Ŵamoyo ŵakumanya kuti ŵafwenge, kweni ŵakufwa kuti ŵakumanya kanthu cara, nanga nkhuŵa nayo njombe; kweni cikumbukiro cawo nchakuluwika.”—Mupharazgi 9:5.

Mwakuyana na umo Baibolo likuyowoyera, unenesko ngwakuti, nyifwa ‘yikuwusa’ ŵanthu mwankhaza. Nyifwa ni mulwani waumaliro wa ŵanthu. Antheura ŵanthu ŵakukhumbikwira kuwombokwa kwa mulwani uyu. (Ŵaroma 5:14; 1 Ŵakorinte 15:26) Ŵanthu awo ŵakuponoska ŵanyawo pa ngozi ŵangamuponoskani yayi ku mulwani uyu. Kweni ni Mlengi pera Yehova Ciuta, uyo wali kunozga nthowa yakuponoskera ŵanthu.

[Cithuzithuzi pa peji 3]

Photo by Gene J. Puskar-Pool/Getty Images