• CILIMIKA ICO WAKABABIKIRA: 1941

• UKO WAKABABIKIRA: BENIN

• IVYO WAKACITANGA: WAKATORA MITALA, WAKATINKHANGA ŴAKABONI ŴA YEHOVA

UMO NKHAŴIRA KALE:

Kukwithu nkhu Cotonou, msumba ukuru comene wa ku Benin. Nkhaŵa mukatolika kweni nkhalutanga viŵi yayi ku chalichi. Uko nkhakhalanga, Ŵakatolika ŵanandi ŵakatoranga mitala ndipo panyengo iyo mitala yikaŵa yakuzomerezgeka na boma. Nkhatora ŵanakazi ŵanayi.

M’ma 1970, apo ŵanthu ŵakamba kucita vinthu vyakulongora kukwiya na boma ilo likaŵapo, nkhaghanaghananga kuti vinthu visinthenge mu caru cithu. Nane nkhakolerana nawo ŵanthu aŵa ndipo nkhayamba kucitako ndyali. Ŵanthu awo ŵakacitanga vinthu ivi ŵakatinkhanga Ŵakaboni ŵa Yehova cifukwa cakuti ŵakanjilirangapo yayi pa vya ndyali. Nane nkhayuzgangako Ŵakaboni ŵa Yehova. Pa nyengo iyo ŵamishonale ŵakacimbizgikanga mu caru cithu mu 1976, nkhaghanaghana kuti ŵamuweraso yayi.

UMO BAIBOLO LIKASINTHIRA UMOYO WANE:

Viwawa vikamara mu 1990. Nkhazizwa comene kuti ŵamishonale ŵakizaso. Nkhamba kughanaghana kuti panji Ciuta wali na ŵanthu aŵa. Panyengo iyi, nkhaŵa kuti nasintha malo ghakugwilirako nchito. Yumoza mwa awo nkhagwiranga nawo nchito wakaŵa Kaboni wa Yehova ndipo mwaluŵiro wakamba kuniphalirako ivyo wakugomezga. Wakanilongora mavesi gha mu Baibolo agho ghakulongosora kuti Yehova ni Ciuta wacitemwa ndiposo ni murunji. (Duteronome 32:4; 1 Yohane 4:8) Mikhaliro iyi yikanikondweska comene. Nkhakhumbanga kumanya vinandi vyakukhwaskana na Yehova, ntheura nkhazomera kuti nisambire Baibolo.

Mwaluŵiro nkhamba kuluta ku maungano gha Ŵakaboni ŵa Yehova. Nkhakondwa comene kuwona citemwa ico ŵakalongorananga. Pakaŵavya kusankhana cifukwa ca fuko la munthu panji kuwona kuti ŵanji mbakuzirwa comene kuluska ŵanyake. Apo nkhacezganga na Ŵakaboni ŵa Yehova, nkhawona kuti ŵakaŵa ŵalondezgi ŵaunenesko ŵa Yesu.—Yohane 13:35.

Nkhawona kuti usange nkhukhumba kuteŵetera Yehova, nkhwenera kulileka Chalichi la Katolika. Cikaŵa cipusu yayi kucita nthena cifukwa nkhawopanga kuti ŵanji ŵaniwonenge makora yayi. Kweni nyengo yitali yikati yajumphapo ndipo Yehova wati  wanovwira, nkhaŵa na cikanga ndipo nkhafumamo mu chalichi ili.

Kweni pakaŵaso cinthu cinyake cikuru ico nkhenera kusintha. Cifukwa ca kusambira Baibolo, nkhamanya kuti Yehova wakuzomerezga yayi mitala. (Genesis 2:18-24; Mateyu 19:4-6) Kwa Ciuta, nthengwa yikaŵa ya muwoli wane wakwamba. Ntheura nkhalembeska nthengwa na muwoli wane wakwamba na kuŵawezga ŵawoli ŵane ŵanyake, ndipo nkhaŵapa vinthu vyakuti viŵawovwirenge pa umoyo wawo. Pakati pajumpha nyengo, ŵaŵiri mwa ŵawoli ŵane ŵakale ŵakazgoka Ŵakaboni ŵa Yehova.

UMO NASANGIRA CANDULO:

Nangauli muwoli wane wacali Mukatolika, kweni wakucindika ivyo nili kusankha kuti niteŵetere Yehova. Muwoli wane wawona kuti sono nili mfumu muwemi, ndipo nane ndimo nkhuwonera.

Kale nkhaghanaghananga kuti para ningacitako ndyali, mbwenu novwirenge caru cane, kweni nkhajipusikanga waka. Sono nkhuwona kuti Ufumu wa Ciuta ndiwo wekha ungamazga masuzgo gha ŵanthu. (Mateyu 6:9, 10) Nkhuwonga comene Yehova cifukwa ca kunilongora umo ningaŵira wakukondwa na umoyo.

• CILIMIKA ICO WAKABABIKIRA: 1977

• UKO WAKABABIKIRA: BRAZIL

• IVYO WAKACITANGA: WAKAŴA MULISKA WA PENTEKOSITI

UMO NKHAŴIRA KALE:

Nkhakulira ku Itu, cigaŵa ico cili mu msumba wa São Paulo. Ucigeŵenga ukaŵa wakuzara comene mu cigaŵa ici.

Nkhaŵa wankhaza comene ndiposo nkhacitanga uzaghali. Kweniso nkhaguliskanga munkhwala wakukanizgika. Pamanyuma nkhawona kuti umoyo wa nthena unganitolera ku jele panji ku dindi, ntheura nkhawuleka. Pamanyuma nkhanjira Chalichi la Pentekositi, ndipo nkhazakaŵa muliska.

Nkhaghanaghananga kuti ningawovwira ŵanthu mwa kuteŵetera mu chalichi ili. Kweniso nkhapharazganga pa wayilesi ndipo nkhamanyikwa comene mu cigaŵa cithu. Kweni mwapacokopacoko nkhamba kuwona kuti chalichi ili likapwelerangako yayi za mberere zake, kweniso likacindikanga yayi Ciuta. Nkhawona kuti cilato ca chalichi ili nkhupanga waka ndalama. Nkhasankha kulireka chalichi ili.

UMO BAIBOLO LIKASINTHIRA UMOYO WANE:

Nkhati namba kusambira Baibolo na Ŵakaboni ŵa Yehova, nyengo yeneyiyo nkhawona kuti ŵakupambana na visopa vinyake. Vinthu viŵiri vikanikondweska comene. Cakwamba, Ŵakaboni ŵa Yehova ŵakuyowoya waka pamlomo yayi kuti ŵakutemwa Ciuta ndiposo ŵanyawo, kweni ŵakulongora citemwa cawo. Caciŵiri nchakuti ŵakunjizgikamo yayi mu ndyali nesi nkhondo. (Yesaya 2:4) Fundo ziŵiri izi zikanikhorweska kuti nasanga cisopa caunenesko, ico ni nthowa yifinyi yakulongozgera ku umoyo wamuyirayira.—Mateyu 7:13, 14.

Nkhamanya kuti usange nkhukhumba kukondweska Ciuta, nkhwenera kusintha vinthu vinandi. Nkheneranga kuŵika mtima comene ku mbumba yane. Kweniso nkhakhumbikwiranga kuŵa wakujiyuyura comene. Cikaŵa cipusu yayi kusintha, kweni Yehova wakanovwira kuti nisinthe. Muwoli wane wakakopeka na umo nkhasinthira. Iyo ndiyo wakamba kusambira Baibolo pambere ine nindambe, kweni sono wakamba kuŵikapo mtima  comene. Mwaluŵiro, tose tikamanya kuti tikwenera kuŵa Ŵakaboni ŵa Yehova. Tikabapatizikira pa zuŵa limoza.

UMO NASANGIRA CANDULO:

Ine na muwoli wane tili ŵakukondwa kuti tawovwira ŵana ŵithu ŵatatu kuti nawo ŵaŵe paubwezi na Yehova. Mbumba yithu njakukondwa. Nkhuwonga Yehova pakuniguzira ku unenesko uwo ukusangika mu Mazgu ghake, Baibolo. Baibolo likusintha nadi umoyo wa ŵanthu. Ukaboni wake ndine.

• CILIMIKA ICO WAKABABIKIRA: 1957

• UKO WAKABABIKIRA: AUSTRALIA

• IVYO VIKAMUCITIKIRA: ŴAKAMUCITIRA NKHAZA PA WANICI

UMO NKHAŴIRA KALE:

Nkhakulira ku New South Wales mu cigaŵa ca Newcastle. Ndine wakwamba pa ŵana ŵankhondi na ŵaŵiri. Adada ŵakaŵa ŵankhaza comene ndiposo ŵaloŵevu. Amama nawo ŵakaŵa ŵankhaza comene, ŵakanitimbanga comene na kunituka. Kanandi ŵakaniphaliranga kuti ndine muheni comene ndipo namuphya kucanya. Ivyo ŵakayowoyanga vikanofyanga comene.

Cifukwa cakuti amama ŵakanipwetekanga comene, kanandi nkhakhalanga ku sukulu. Apo nkhaŵa na vilimika 11, ŵaboma ŵakanitora ku ŵapapi ŵane na kuniŵika ku malo ghakulelerako ŵana ŵakusuzgika ndipo pamanyuma nkhakhalanga mu nyumba ya ŵamayi. Apo nkhaŵa na vilimika 14 nkhacimbira mu nyumba iyi. Nkhaweleraso ku nyumba yayi, kweni nkhakhalanga mu misewu ya Kings Cross, iyo yili mu mizi ya mu msumba wa Sydney.

Apo nkhakhalanga mu misewu, nkhamwanga comene minkhwala na moŵa, ndiposo nkhawonanga vithuzithuzi vyamuziro na kucita uhule. Zuŵa linyake nkhacita wofi comene. Nkhakhalanga mu nyumba ya munthu munyake uyo wakaŵa na bara. Zuŵa linyake usiku ŵanalume ŵaŵiri ŵakiza kuzakakumana nayo. Mweneco wa bara wakati nkhakhale ku cipinda, kweni nkhapulikangako ivyo ŵakadumbiskananga. Wakapangananga nawo kuti waniguliske ku ŵanalume aŵa. Ŵakatenge ŵanibise mu sitima yakunyamura katundu na kunitumizga ku Japan kuti nkhagwirenge nchito mu bara. Nkhacita wofi comene ndipo nkhadukira pa windo na kucimbira kuti ŵanji ŵanovwire.

Nkhasangana na mwanalume munyake uyo wakiza waka ku Sydney, ndipo nkhamuphalira ivyo vikanicitikira, nkhakhazganga kuti wanipenge ndalama. M’malo mwake wakanitolera uko wakakhalanga mwakuti nkhageze na kurya cakurya. Mbwenu nkhakhalirathu kwenekuko. Pakati pajumpha cilimika cimoza tikatorana.

UMO BAIBOLO LIKASINTHIRA UMOYO WANE:

Nkhati namba kusambira Baibolo na Ŵakaboni ŵa Yehova, nkhamba kuŵa na maghanoghano ghakupambanapambana. Nkhakwiya comene nkhati namanya kuti Satana ndiyo wakupangiska viheni. Kumanyuma kose uku nkhaghanaghananga kuti Ciuta ndiyo wakupangiska kuti tisuzgikenge. Mtima ukakhira pasi nkhati namanya kuti Ciuta wakulanga ŵanthu ku moto yayi. Cisambizgo cautesi cakuti Ciuta wakulanga ŵanthu ku moto cikanofyanga kwamba waka pa wanici.

 Nkhakondwa comene kuwona umo Ŵakaboni ŵa Yehova ŵakulongozgekera na Baibolo pa cilicose ico ŵakucita. Ŵakuyowoya waka pamulomo yayi ivyo ŵakugomezga, kweni ndivyo ŵakucita. Nangauli nkhasuskikanga yayi, kweni Ŵakaboni ŵa Yehova ŵakanicindikanga na kunilongora citemwa mwambura kupwelerako za ivyo nayowoya panji kucita.

Suzgo lane likuru likaŵa lakuti nimazge maghanoghano gha kujiwona kuti ndine wawakawaka. Nkhajitinkhanga comene, ndipo nkhalutilira kujipulika nthena nanga ni apo nkhabapatizika kuŵa yumoza wa Ŵakaboni ŵa Yehova. Nkhamanyanga kuti nkhutemwa Yehova, kweni nkhakhorwanga yayi kuti wanganitemwa.

Kweni vinthu vikasintha pakati pajumpha vilimika 15 kufuma apo nkhabapatizikira. Apo nkhani yikayowoyekanga mu Nyumba ya Ufumu ya Ŵakaboni ŵa Yehova, muyowoyi wakazunura lemba la Yakobe 1:23, 24. Lemba ili likuyaniska Mazgu gha Ciuta na gilasi, ilo tingajiwonapo mwakuyana na umo Yehova wakutiwonera. Nkhamba kujifumba usange Yehova wakuniwona mwakupambana na umo ine nkhujiwonera. Pakwamba nkhagomezga yayi fundo yiphya iyo yikayowoyeka mu nkhani. Nkhaŵa nicali kujiwona kuti Yehova wanganitemwa yayi.

Mazuŵa ghakati ghajumphapo nkhaŵazga lemba linyake ilo likasintha umoyo wane. Lemba lake likaŵa la Yesaya 1:18, apo pali kulembeka kuti Yehova wakuti: “Zaninge pera, tilanguruke na kupana fundo, . . . nanga zakwananga zinu zikuŵa ngati nziswesi, tiziŵenge zituŵa ngati matalala.” Nkhaŵa nga nkhupulika Yehova wakuyowoya nane kuti: “Zanga Vicky, tiye tinyoloske vinthu pakati pithu. Nkhukumanya, nkhumanya zakwananga zako, nkhumanya mtima wako ndipo nkhukutemwa.”

Nkhagona yayi usiku uwu. Nkhakayikanga nipera kuti Yehova wakunitemwa, ndipo nkhamba kughanaghanira za sembe yakuwombora ya Yesu. Nyengo yeneyiyo nkhamanya kuti Yehova wazikira nane kwa nyengo yitali, ndipo wanilongora umo wakunitemwera mu nthowa zinandi. Kweni kumanyuma kose uku nkhuŵa nga namuphaliranga Ciuta kuti: “Munganitemwa ine yayi cifukwa citemwa cinu nchikuru yayi. Sembe yakuwombora ya mwana winu njakukwana yayi kubenekelera zakwananga zane.” Vikaŵa nga ni para nkhuyikana sembe yakuwombora iyo Yehova wanipa. Kweni nkhati namba kughanaghanira za sembe yakuwombora, iyo nchawanangwa, nkhamba kuwona kuti Yehova wakunitemwa.

UMO NASANGIRA CANDULO:

Nkhujiwonaso kuti ndine wakufipirwa yayi, wakufwa, nesi wakukwenyelera. Sono nkhukhala makora mu nthengwa ndipo nkhukondwa kovwira ŵanyane na ivyo vikanicitikira. Nkhuwona kuti nkhusendelera comene kwa Yehova.

• CILIMIKA ICO WAKABABIKIRA: 1974

• UKO WAKABABIKIRA: RUSSIA

• UMO WAKAŴIRA KALE: WAKATEMWANGA COMENE SUMU ZAKUTUKA

UMO NKHAŴIRA KALE:

Nkhababikira ku Votkinsk, ukoso kukababikira wakwimba wakumanyikwa zina lake Pyotr Ilich Tchaikovsky. Mbumba yakwithu yikaŵa yikavu. Adada ŵakaŵa munthu muwemi comene, kweni ŵakamwanga comene, ntheura kanandi tikakhalanga mwawofi pa nyumba.

Mu kilasi nkhawerangamo waka, ndipo apo vilimika vikajumphanga, nkhamba kujiwona kuti ndine wakutondeka. Nkhaleka kucezga na ŵanthu ndiposo kuŵagomezga. Para nkhuluta ku  sukulu, mbwenu mtima bi. Mwaciyelezgero, para ku sukulu ŵatiphalira kuti tiyowoye lipoti, kanandi nkhatondekanga kuyowoya vinthu ivyo nkhuvimanya makora ivyo pa nyengo yinyake nkhayowoyanga makora waka. Nkhati namalizga sukulu ya pulayimare, pa lipoti kadi lane ŵakalembapo kuti: “Wakumanya vinandi yayi, ndiposo wakutondeka kuyowoya maghanoghano ghake.” Mazgu agha ghakaniŵinya comene ndipo nkhajipulika kuti nkhaŵa wakutondekerathu. Nkhamba kujifumba cifukwa ico niliri wamoyo.

Nkhati nafika pa uwukirano, nkhamba kumwa comene. Pakwamba para namwa nkhajipulikanga makora. Kweni para namwa comene, njuŵi yikanisuzganga. Nkhawonanga umoyo wane kuti ngwawakawaka. Nkhamba kusuzgika comene maghanoghano ndipo nyengo zinyake nkhafumangapo yayi pa nyumba kwa mazuŵa ghanandi. Nkhamba kughanaghana kuti nijikome waka.

Nkhati nafika vilimika 20, nkhasanga kanthu kanyake ako kakaniluwiskangako masuzgo. Nkhamba kupulikizga sumu zakutuka zakucemeka heavy metal. Zikanipa nkhongono mwakuti nkhamba kupenja ŵanji awo ŵakuzitemwa. Nkhamba kusunga sisi, kudolora makutu, na kuvwara nga mbakwimba awo ŵakanikondweskanga. Mwapacokopacoko, nkhamba kucita vinthu mwambura kupwelerako kweniso nkhaŵa mukali, kanandi nkhapindananga na ŵa mu mbumba yakwithu.

Nkhaghanaghananga kuti niŵenge wakukondwa para nkhupulikizga sumu izi, kweni nkhaŵapo wakukondwa yayi. Nkharo yane yikamba kusintha. Nkhakhuŵara comene nkhati napulika vinthu viheni ivyo ŵakacitanga ŵakwimba awo nkhaŵatemwanga.

Nkhambaso kughanaghana kuti nijikome, ndipo pa ulendo uwu nkhasimikizga mtima. Kweni ico cikanitondeska nchakuti nkhaghanaghaniranga umo amama ŵajipulikirenge para nafwa. Ŵakanitemwanga comene, ndipo ŵakaŵa kuti ŵanicitira vinandi. Nkhasuzgika comene maghanoghano. Nkhakhumbanga yayi kulutilira kuŵa wamoyo, kweni nkhakhumbangaso yayi kujikoma.

Kuti nileke kughanaghanira comene ivyo vikanisuzganga, nkhamba kuŵazga mabuku ghakale gha ku Russia. Nkhani yinyake yikalongosoranga za munthu munyake wakumanyikwa uyo wakagwiranga nchito mu chalichi. Nyengo yeneyiyo, nkhamba kukhumba comene kumucitira cinthu cinyake Ciuta ndiposo kovwira ŵanthu ŵanyake. Nkhalomba kwa Ciuta, ndipo kakaŵa kakwamba kucita nthena mu umoyo wane. Nkhalomba Ciuta kuti wanilongore umo ningaŵira na umoyo wacandulo. Apo nkhaŵa mukati mwa lurombo lwane, nkhazizwa kuti namba kujipulika makora comene. Kweni cakuzizika comene ni ico cikacitika pamanyuma pake. Pakati pajumpha maora ghaŵiri, yumoza wa Ŵakaboni ŵa Yehova wakafika pa nyumba na kunipempha kuti wasambirenge nane Baibolo. Nkhugomezga kuti lurombo lwane lukazgoreka. Likaŵa zuŵa lakwamba kuti niŵe wakukondwa comene.

UMO BAIBOLO LIKASINTHIRA UMOYO WANE:

Nangauli cikaŵa cakusuzga comene, kweni nkhataya vyose ivyo nkhaŵa navyo vyakukhwaskana na sumu zakutuka. Kweni sumu izi zikakhalilira mu maghanoghano ghane kwa nyengo yitali. Para nkhujumpha pa malo apo pakwimba sumu izi, nkhakumbukanga umoyo wane wakale. Nkhakhumbanga yayi kusazga maghanoghano ghaheni agho nkhaŵa nagho kale na vinthu viwemi ivyo nkhasambiranga sono. Ntheura nkhageganga malo ghanthena. Para namba kughanaghanira vyakale, nkhalombanga comene. Kulomba kukanovwiranga kuti niŵe na “mtende wa Ciuta uwo ukuluska ghanoghano lililose.”—Ŵafilipi 4:7.

Apo nkhasambiranga Baibolo, nkhamanya kuti Ŵakhristu ŵali na mulimo wa kuphalirako ŵanji ivyo ŵakugomezga. (Mateyu 28:19, 20) Pakwamba nkhaghanaghananga kuti ningacita yayi mulimo uwu. Kweni vinthu ivyo nkhasambiranga vikanipangiskanga kuti niŵe wakukondwa kweniso niŵe na mtende wa mu mtima. Nkhamanya kuti ŵanji nawo ŵakwenera kusambira unenesko uwo ine nasambira. Nangauli nkhaŵa na wofi, nkhamba kuphalirako ŵanji ivyo nkhasambiranga. Kweni nkhazizwa comene kuti nkhaŵanga na cikanga para nkhuphalirako ŵanji za Baibolo. Mulimo uwu ukanovwiraso kuti nikhomerezge vigomezgo vyane mu mtima wane.

UMO NASANGIRA CANDULO:

Sono ndine wakukondwa na mbumba yane ndipo nawovwirapo ŵanthu ŵanyake kuti ŵasambire Baibolo, kusazgapo mudumbu wane na amama. Nili na umoyo wakukondweska cifukwa ca kuteŵetera Ciuta na kovwira ŵanthu kuti ŵasambire vya Ciuta.