Kasi Nkhondo ya Haramagedoni Yizenge Pawuli?

“Nkhalaŵiska, ndipo wonani! mzinda ukuru, uwo pakaŵavya munthu wakamanya kupenda, kufuma mu mitundu yose na mafuko na ŵanthu na malulimi . . . ŵafuma mu suzgo yikuru.”—UVUMBUZI 7:9, 14.

NYENGO yiliyose sono, Haramagedoni yingamba. Cifukwa wuli?

Panyengo yasono, pa caru cose pali kale gulu la ŵanthu awo ŵakuteŵetera Yehova na kulondezga fundo zapacanya za mu Baibolo. Mwakovwirika na Ciuta, ŵanthu mamiliyoni ghanandi ŵakufuma mu mitundu, mafuko na malulimi ŵakuwunganyika kupanga gulu ilo likutemwana zanadi. Gulu ili Mbakaboni ŵa Yehova.—Yohane 13:35.

Sonosono apa Satana wawunganyenge ŵasilikari ŵake kuti ŵawukire ŵanthu ŵamtende aŵa, ŵeneawo ŵakuwoneka nga ni para ŵalije civikiliro. (Ezekiel 38:8-12; Uvumbuzi 16:13, 14, 16) Kasi mungasimikizga wuli kuti ivi vicitikenge nadi? Baibolo likuzunura vinthu vinyake ivyo vikutovwira kumanya kuti Haramagedoni yili pafupi. Vinandi mwa vinthu ivi vikufiskika sono nthena.

Vinthu Ivyo Mukuwona Kuti Vikufiskika

Ŵasambiri ŵakafumba Yesu umo ŵanthu ŵangazakamanyira kuti “umaliro wa mgonezi” uli pafupi. (Mateyu 24:3) Pakuzgora fumbo lawo, Yesu wakati: “Mtundu uzamuwuka kwimikana na mtundu ndipo ufumu kwimikana na ufumu, ndiposo kuzamuŵa njara na vindindindi mu malo na malo.” Pamanyuma wakati: “Vinthu vyose ivi nkhwamba kwa masoka.” (Mateyu 24:7, 8) Mpositole Paulosi wakalongosoraso kuti nyengo iyi ni “mazuŵa ghaumaliro,” ndipo wakati mazuŵa agha ghazamuŵa “nyengo zinonono na zakusuzga.” (2 Timote 3:1) Kasi imwe mukuwona kuti ivyo maucimi agha ghakuyowoya vikucitika nadi mazuŵa ghano?

Cifukwa wuli nyengo izi zikwenera kuŵa zinonono comene? Mpositole Yohane wakupeleka zgoro. Wakayowoyerathu kuti Satana na viŵanda vyake ŵazamuŵa na “nyengo yifupi” yakucitira milimo yawo pa caru capasi. Satana  wakulongosoreka kuti wali na “ukali ukuru” pa nyengo iyi. (Uvumbuzi 12:7-12) Kasi imwe mukuwona yayi kuti mazuŵa ghano ŵanthu mbakali ndiposo ŵankhaza comene pa caru cose?

Yesu wakayowoyaso kuti mu nyengo ya masuzgo ghakuru iyi, mulimo ukuru comene uzamucitikanga. Iyo wakati: “Makani ghawemi agha gha ufumu [wa Ciuta], ghazamupharazgika mu caru cose kuti uŵe ukaboni ku mitundu yose; penepapo ndipo umaliro wizenge.” (Mateyu 24:14) Mazuŵa ghano mu vyaru vyakujumpha 235, Ŵakaboni ŵa Yehova ŵakupharazga makani ghawemi gha Ufumu wa Ciuta mu viyowoyero vyakujumpha 500. Magazini ghaŵiri ghakulongosora Baibolo, Gongwe la Mulinda na Galamukani!, agho Ŵakaboni ŵakusindikizga ndigho ghakugaŵirika comene kuluska magazini yiliyose pa caru. Kweniso Ŵakaboni ŵa Yehova ŵang’anamura Baibolo mu viyowoyero pafupifupi 100. Mulimo wawo ukucitika na Ŵakaboni ŵakujipeleka ndipo ndalama zakucitira mulimo uwu ni izo ŵanthu ŵakupeleka mwawanangwa. Kasi mulimo wapadera wa kupharazga uwu, ungaŵa kuti ukufiska ucimi wa Yesu?

Kweniso Baibolo likuyowoya vinthu ivyo vizamucitika pambere Yehova Ciuta wandarwe nkhondo na ŵalwani ŵake. Wonani maucimi ghatatu agho muwonenge kuti ghakufiskika.

Vinthu Ivyo Muwonenge Sonosono

Ucimi 1. Baibolo likuti mitundu yizamucemerezga kuti “bata na mtende!” Panji ŵazamughanaghana kuti ŵali pafupi kumazga masuzgo ghakurughakuru ghose. Ndipouli, ivyo vizamucitika para mazgu agha ghayowoyeka waka, vizamuŵa vyamtende yayi.—1 Ŵatesalonika 5:1-3.

Ucimi 2. Kufuma apo, maboma ghakupambanapambana ghazamuwukira magulu ghose gha visopa vyautesi. Mu Baibolo, maboma agha ghakuyelezgereka na cikoko; ndipo visopa vyose vyautesi ivyo vili mu caru vikuyelezgereka na mwanakazi uyo wakukwera pa musana wa cikoko. (Uvumbuzi 17:3, 15-18) Cikoko cakuyelezgera ici cizamucita ivyo Ciuta wakukhumba kuti cicite, mwa kuparanya visopa ivyo mwaupusikizgi vikuti vikwimira Ciuta.

Mpositole Yohane wakulongosora vyakucitika ivi kuti: “Masengwe khumi agho wanguwona, na cikoko, ivi vizamumutinkha mwanakazi muzaghali na kumuzgora wakuparanyika na wankhuli, ndipo vizamurya minofu ya thupi lake na kumocha thibu na moto. Cifukwa Ciuta wakaŵika ici mu mitima yawo kucita ghanoghano lake.”—Uvumbuzi 17:16, 17.

Ucimi 3. Para maboma ghaparanya cisopa cautesi, Satana wazamukhuŵilizga mitundu kuti yiwukire awo ŵakusopa Yehova Ciuta.—Uvumbuzi 7:14; Mateyu 24:21.

Kasi Imwe Vizamumukhwaskani Wuli?

Usange mundaŵazgepo comene Baibolo, cingaŵa cinonono kuti mugomezge kuti vinthu ivyo vyalongosoreka apa vizamucitika. Kweni pali cifukwa cakukwana cakugomezgera kuti cilicose ico calongosoreka apa cizamufiskika ndiposo kuti vinthu ivi vicitikenge sonosono. Maucimi ghanandi gha mu Baibolo agho ghali kufiskika kale mbukaboni wakuti maucimi agha nagho ghafiskikenge nadi. a

Mwalekeraci kupatura nyengo kuti mumanye cifukwa ico Ŵakaboni ŵa Yehova ŵakugomezgera kuti “nkhondo ya zuŵa likuru la Ciuta Mwenenkhongonozose” yili pafupi comene, ndiposo cifukwa ico mukwenera kulekera kufipa mtima na nkhondo iyi? Ŵapemphani kuti mudumbiskane ivyo Baibolo likuti mukwenera kucita kuti muŵe yumoza wa awo Yehova wazamuŵavikilira. (Uvumbuzi 16:14) Ivyo musambirenge vingamovwirani kuti muwonenge mwakwenelera ivyo vicitikenge munthazi.

[Mazgu ghamusi]

[Mazgu Ghakukhozgera pa peji 8]

Kasi mulimo wa Ŵakaboni ŵa Yehova ungaŵa kuti ukufiska ucimi wa mu Baibolo?