ŴANYAKE ŵakuti nkhwananga. Ŵangaghanaghana kuti ni nchindi yayi kufumba cifukwa ico Ciuta wazomerezgera panji walekera kuzomerezga kuti vinthu vinyake vicitike. Kasi namwe ndimo mukughanaghanira?

Para mukughanaghana nthena, mungazizikika kumanya kuti ŵanthu ŵawemi ŵanandi ŵakamufumbapo Ciuta. Wonani mafumbo ghakulondezgapo agha agho ŵakafumba:

Mwanalume wakugomezgeka Yobu wakati: “Nchifukwa uli ŵabendezi ŵakukhala ŵamoyo na kucekura, enya, [mbasambazi comene, NW]?”​—Job 21:7.

Nchimi yakugomezgeka Habakuku yikati: “Kasi mukulaŵiskiraci pa ŵanthu ŵambura magomezgeka, na kukhala waka cete para muheni wakumira munthu murunji wakuluska iye?”​—Habakuk 1:13.

Yesu Khristu wakati: “Ciuta wane, Ciuta wane, kasi mwanisidiraci?”​—Mateyu 27:46.

Para mukuŵazga mavesi ghakuzingilira apo pafuma mazgu agha, muwonenge kuti palije apo Yehova * Ciuta wakakhuŵara ŵati ŵafumba mafumbo agha. Nchakuzizika yayi kuti Yehova wakacita nthena. Nakuti Ciuta wakukwiya yayi para tamupempha vinthu vyakukhumbikwa pa umoyo. Mwakukondwa, wakutipa ivyo tapempha. (Mateyu 6:11, 33) Kweniso wakutipa ulongozgi uwo ungatovwira kuti tiŵe na maghanoghano ghawemi. (Ŵafilipi 4:6, 7) Yesu wakaphalira ŵasambiri ŵake kuti: “Lutilirani kulomba, ndipo kupikenge kwa imwe.” (Mateyu 7:7) Apa Yesu wakayowoyanga za kupika vinthu vyakuthupi na mazgoro gha mafumbo ghakuzirwa.

Usange mungapika mwaŵi wakumufumba Ciuta, kasi ni fumbo ndi pa mafumbo agha ilo mungatemwa kumufumba?

• Kasi cilato ca umoyo wane nchakuti wuli?

• Kasi nchivici cizamucitika para nafwa?

• Cifukwa wuli mukuzomerezga kuti nisuzgikenge?

“Malemba ghose ngakupelekeka na Ciuta.” Ntheura, mazgoro gha mafumbo agha mungaghasanga mu Baibolo. (2 Timote 3:16) Sandani vifukwa ivyo ŵanji ŵakafumbira mafumbo ghapacanya agha kweniso mazgoro agho Baibolo likupeleka.