Citemwa cikusazgapo kughanaghanira comene ŵanji. Munthu wakulongora kuti wali na citemwa kwizira mu vyakuyowoya na vyakucita vyake, nangauli nyengo zinyake wangakhumbikwira kujinora vinthu vinyake.

Mozesi wakalongora kuti wakatemwanga Ciuta. Wakalongora wuli? Kumbukani mazgu gha pa 1 Yohane 5:3 agho ghakuti: “Ili ni ng’anamuro la kutemwa Ciuta lakuti tisungilire malango ghake.” Mozesi wakapulikira fundo iyi. Pa vinthu vyose ivyo Ciuta wakamutumanga kuti wacite, Mozesi wakapulikiranga. Mwaciyelezgero, wakapulikira pa mulimo wakusuzga apo wakatumika kukayowoya na Faro, themba lakofya kweniso wakapulikira pa mulimo uwo ukawonekanga kuŵa upusu nga nkhutimba pa Nyanja Yiswesi na nthonga. Kwali ivyo wakatumika vikaŵa vyakusuzga panji yayi, Mozesi wakapulikiranga. Baibolo likuti: “Ndimo wakacitira.”—Exodus 40:16.

Mozesi wakatemwanga Ŵaisrayeli ŵanyake. Pakuti Ŵaisrayeli ŵakamanyanga kuti Yehova wakagwiliskiranga nchito Mozesi pakuŵalongozga, ŵakizanga kwa iyo na masuzgo ghawo. Baibolo likuti: “Ŵanthu ŵakizanga na kwimilira pamaso pa Mozesi kwambira mulenji mpaka mise.” (Exodus 18:13-16) Ghanaghanirani waka umo Mozesi wakwenera kuti wakavukiranga kutegherezga maora ghose agha apo Ŵaisrayeli ŵakamulongosoleranga masuzgo ghawo. Ndipouli, Mozesi wakaŵawovwiranga mwakukondwa cifukwa wakaŵatemwanga.

Padera pakutegherezga masuzgo ghawo, Mozesi wakaŵalomberangaso ŵakutemweka ŵake. Ndipo wakalomberanga nanga ni ŵanthu awo ŵakamubudiranga. Mwaciyelezgero, apo Miriyamu wakanyunyutira mudumbu wake Mozesi, Yehova wakamutimba na vyoni. M’malo mwakuti Mozesi wakondwe na cilango ico cikawira mudumbu wake, mwaluŵiro wakamulombera wakati: “Mwe Ciuta, mucizgani, naŵeya.” (Maŵazgo 12:13) Citemwa ndico cikamutuma Mozesi kuti walombe nthena.

Tingacita nga ni Mozesi para tikutemwa comene Ciuta. Citemwa canthena cikutovwira kuti tipulikirenge malango ghake “kufumira pasi pa mtima.” (Ŵaroma 6:17) Para tikupulikira Yehova na mtima wose, tikukondweska mtima wake. (Zintharika 27:11) Kweniso nase tikusanga candulo. Nakuti para tikuteŵetera Ciuta cifukwa cakuti tikumutemwa, ticitenge vinthu viwemi kweniso tikondwenge pakuvicita.—Salmo 100:2.

Nthowa yinyake iyo tingacitira nga ni Mozesi ni para tikujipata cifukwa ca kutemwa ŵanji. Para ŵabwezi panji ŵamumbumba yithu ŵatiphalira masuzgo ghawo, citemwa cizamuticiska kuti (1) titegherezge na mtima wose, (2) kuŵacitira citima panji kujipulika nga ndiwo, ndipo (3) tiŵalongore kuti tikuŵaghanaghanira.

Nga ni Mozesi, nase tingaŵalombera ŵakutemweka ŵithu. Para ŵatiphalira masuzgo ghawo, nyengo zinyake tingajipa mulandu cifukwa cakuti tindacitepo kanthu kuti tiŵawovwire. Nyengo zinyake tingafika napakuŵaphalira kuti, “Phepani, cekha ico ningafiska nkhumulomberani.” Kweni kumbukani kuti Baibolo likuti: “Ŵeyelero la munthu murunji, . . . lili na nkhongono yikuru.” (Yakobe 5:16) Malurombo ghithu ghangapangiska Yehova kucitira munthu cinthu cinyake ico mphanyi wangumucitira yayi. Ntheura, tingacita makora comene kuŵalombera ŵakutemweka ŵithu. *

Kasi mbunenesko yayi kuti tingasambirako vinandi kwa Mozesi? Nangauli nayo wakaŵa munthu nga ndise, kweni wakaŵa cakuwonerapo ciwemi comene pa nkhani yacipulikano, kujiyuyura na citemwa. Para tikufwilirapo kucita nga ndiyo ise pamoza na ŵanji tisangenge candulo.—Ŵaroma 15:4.