CIWUKA ca Yesu nchimoza waka ca vyakucitika vyakale yayi, kweni cili na ng’anamuro kwa ise. Mpositole Paulosi wakalongora kuzirwa kwake apo wakalemba kuti: “Khristu wali kuwuskika ku ŵakufwa, cipambi cakwamba ca awo ŵali kugona tulo mu nyifwa. Pakuti nyifwa yikizira mwa munthu, ciwuka ca ŵakufwa naco cikwizira mwa munthu. Cifukwa nga umo mwa Adamu wose ŵakufwa, ntheuraso mwa Khristu wose ŵazamuzgoka ŵamoyo.”—1 Ŵakorinte 15:20-22.

Yesu wakawuskika pa Nisani 16, 33, C.E., pa zuŵa ilo Ŵayuda ŵakapelekeranga vipambi vyakwamba kuca kwa Yehova Ciuta pa tempele ku Yerusalemu. Apo Paulosi wakazunura Yesu kuti vipambi vyakwamba kuca, wakalongora kuti paliso ŵanji awo nawo ŵazamuwuskika.

Mazgu ghakulondezgapo gha Paulosi ghakulongora ivyo nyifwa ya Yesu yili kufiska. Wakati: “Pakuti nyifwa yikizira mwa munthu, ciwuka ca ŵakufwa naco cikwizira mwa munthu.” Tose tikufwa cifukwa ca kwananga uko tili kuhara kufuma kwa Adamu. Ndipouli, Yesu wakapeleka umoyo wake wakufikapo kuŵa sembe yakuwombora iyo yili kujura nthowa kuti ŵanthu ŵazakawuskike ku ŵakufwa na kufwatuka ku wuzga wa kwananga na nyifwa. Pakumalizga nkhani iyi pa Ŵaroma 6:23, Paulosi wakati: “Malipiro agho kwananga kukupeleka ni nyifwa, kweni cawanangwa ico Ciuta wakupeleka mbumoyo wamuyirayira mwa Khristu Yesu Fumu yithu.”

Yesu iyomwene wakalongosora umo nyifwa yake na ciwuka cake viliri vyakuzirwa kwa ise. Yesu wakati: “Mwana wa munthu nayo wakwenera kutumphuskika, mwakuti waliyose uyo wakugomezga mwa iyo waŵe na umoyo wamuyirayira. Pakuti Ciuta wakacitemwa comene caru, mwakuti wakapeleka Mwana wake wapadera yekha, ntheura kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.”—Yohane 3:14-16.

Ghanaghanirani waka umo vingaŵira kukhala umoyo wamuyirayira wambura masuzgo panji citima. (Uvumbuzi 21:3, 4) Ici nchigomezgo cakukondweska comene! Nkhwantha yinyake yikati: “Malaro ghakutikumbuska kuti umoyo ngufupi, apo ciwuka cikutisimikizgira kuti nyifwa yizamumara.” Nadi ciwuka ca Yesu cikung’anamura umoyo!