NKHANI YAKULONGOSORA UMOYO WA MUNTHU
Mtima Wane Ukaŵa Pakuteŵetera Yehova
NKhati namalizga sekondare mu Janyuwale 1937, nkhamba kusambira ku Yunivesite ya Iowa State ku America. Yunivesite iyi yikaŵa kufupiko na uko tikakhalanga. Nkhaŵanga na nyengo yicoko comene yakucitira vinyake, cifukwa cakuti nkhagwirangaso nchito kuti nijilipilirenge fizi. Kwambira waka pa wanici, nkhakhumbanga kuti nizakazengenge vinyumba vitalivitali kweniso maburiji ghapacanya.
Kukwambilira kwa 1942, caru ca America cikanjilirapo pa Nkhondo Yaciŵiri ya Caru Cose. Pa nyengo iyi, nkhakhala pacoko waka kuti nitore digiri ya vyakuzenga. Nkhakhalanga na ŵanyane ŵaŵiri. Munyane munyake wakaniphalira kuti nikumane na munthu munyake uyo wakizanga kuzakacezga na ŵanyamata, awo ŵakakhalanga mu cipinda capasi. Nkhaluta, ndipo nkhakumana na John O. Brehmer uyo wakaŵa Kaboni wa Yehova. Nkhazizwa na umo wakasangiranga zgoro la fumbo lililose mu Baibolo. Nkhacontheka comene, ntheura nkhazomera kuti wasambirenge nane Baibolo. Ndipo para nili na mpata tikalutilanga lumoza mu upharazgi.
Ŵawiske ŵa John ŵa Otto, ŵakazgoka Kaboni apo ŵakaŵa bwana mulara wa banki mu tawuni ya Walnut mu Iowa. Pamasinda, ŵakaleka udindo wawo na kwamba uteŵeti wanyengozose. Ivyo ŵakacita pamoza na mbumba yawo, vikanikhozga comene kuti nane nisankhe mwamahara.
NYENGO YAKUTI NISANKHE YIKAKWANA
Zuŵa linyake mulara wa pa Yunivesite wakaniphalira kuti magiredi ghane ghakukhira mwakuti ningatora yayi digiri. Nkhukumbuka kuti nkhalomba Yehova kuti wanovwire. Pakati pajumpha nyengo yicoko waka, asambizgi ŵane ŵakanicema. Ŵakapokera uthenga wakuti ŵakukhumba munthu wakumanya vyakuzenga. Kwambura kunifumba, ŵakazgora kuti walipo, kunena ine. Nkhaŵawonga, kweni nkhaŵalongosolera cifukwa ico nkhaŵikiranga mtima pakuteŵetera Yehova. Nkhabapatizika pa 17 Juni, 1942 ndipo nyengo yicoko waka nkhamba kupharazga nyengo zose panji kuti kucita upayiniya.
Mu 1942 mwenemumu, ŵakaniphalira kuti ninjire usilikari. Ntheura nkhakumana na ŵalara ŵaboma na kuŵalongosolera cifukwa ico njuŵi yane yikunikanira kurwa nkhondo. Nkhaŵalongora vimakalata vyakufuma kwa maprofesa gha ku koleji, ivyo vikalongosoranga kuti nili na nkharo yiwemi kweniso kuti nkhumanya kuzenga. Nangauli vikaŵa nthena, kweni vikaphura kanthu yayi. Ntheura, ŵakanilipiska ndalama zakukwana madola 10,000 gha U.S. Kweniso ŵakati nikhale vyaka vinkhondi mu jele la ku Leavenworth.
APO NKHAŴA MU JELE
Taŵanthu wakukwana 230 tikajalirika mu jele ili la Leavenworth ku U.S. ilo pasono likuwoneka nthe
Ŵakaboni ŵacinyamata ŵakujumpha 230, ŵakaŵajalira mu jele ili, ilo likaŵa na famu. Ku famu iyi ndiko tikagwiranga nchito, ndipo pakaŵa ŵalinda ŵanandi awo ŵakatilaŵiliranga. Ndipo ŵanandi ŵa iwo ŵakamanyanga kuti tikunjilirapo yayi pa nkhondo, ntheura ŵakatipulikiskanga.
Ŵalinda ŵanji ŵakatizomerezganga kuti tilutilire kucita maungano. Ndiwo ŵakatovwirangaso kuti mabuku ghakulongosora Baibolo ghanjirenge mu jele. Mulaŵiliri wa jele wakacemeskanga magazini gha Consolation, agho sono ni Galamukani!
KUFUMA MU JELE, NA KWAMBA UMISHONALE
Nkhati nagwira ukayidi kwa vyaka vitatu, ŵakanifumiska mu jele pa 16 Febuluwale, 1946. Apa pakaŵa kuti pajumpha myezi yicoko waka Nkhondo Yaciŵiri ya Caru Cose yati yamara. Mwaluŵiro nkhambaso kucita upayiniya. Ŵakanitumaso kuti nkhapharazgenge ku tawuni ya Leavenworth, Kansas. Nkhacita wofi comene, cifukwa ku malo agha ŵanthu ŵakatinkhanga comene Ŵakaboni ŵa Yehova. Cikaŵa cakusuzga comene kusanga nchito kweniso nyumba.
Nkhukumbuka kuti apo nkhapharazganga ku nyumba na nyumba nkhakumana na mulinda uyo wakacemerezga kuti: “Fumapo apa!” Pakuwona cisulo ico wakaŵa naco, nkhacita wofi ndipo nkhafumapo luŵiro. Pa nyumba yinyake, mwanakazi munyake wakati, “nkhwiza sonosono,” ndipo wakanjira mu nyumba na kujarako. Nkhati nalindilirapo, nkhasanga waka windo banankhu, vimaji vyakubinkha muthupi pese! Nangauli vikaŵa nthena, nkhatumbikika nipera. Pamasinda nkhapulika kuti awo nkhaŵapa mabuku, ŵazgoka Ŵakaboni.
Mu 1943, sukulu ya ŵamishonale yakucemeka Giliyadi yikambika ku New York. Nane ŵakanicema ku sukulu iyi. Nkhanjira kilasi la nambara 10, ndipo nkhamalizga pa 8 Febuluwale, 1948. Ntheura, ŵakanitumizga ku Gold Coast (Ghana).
Nkhati nafika ku Ghana, mulimo wane ukaŵa wa kupharazgira ŵalara ŵaboma na ŵanthu ŵa ku Europe. Kweni pa Cisulo na Sabata nkhapharazgiranga lumoza na mpingo ku nyumba na nyumba. Kweniso nkhenderanga tumagulu twa Ŵakaboni awo ŵakakhalanga kutali. Nkhenderangaso mipingo ya mu Ivory Coast.
Nkhasambira umoyo wa kuno ku Africa. Mwaciyelezgero, tikagonanga mu nyumba zakukuluŵa, kurya na mawoko, na kukajovwira pa thengere nga umo Ŵaisrayeli ŵakacitiranga. (Duteronome 23:12-14) Ivi vikawovwira ine na ŵamishonale ŵanyane kuti ŵanthu ŵatiwonenge mwakwenelera. Ŵawoli ŵanji ŵa ŵalara ŵaboma ŵakamba kusambira Baibolo. Ŵakususka ŵakati ŵatiwukira na kupempha boma kuti liticimbizge, ŵawoli ŵa ŵalara ŵaboma ŵakacicizga ŵafumu ŵawo kuti ŵayileke waka nkhani iyi. Ntheura yikalekeka.
Nga umo vikuŵira na ŵamishonale ŵanandi mu Africa, nane nkhalwara maleriya. Kweni nkhalutilira kukondwa na uteŵeti.
Kwa vyaka vinayi vyakwambilira mu Africa, tikalemberananga makalata na Eva Hallquist, uyo tikakumanapo ku United States. Wakaniphalira kuti nayo wakaluta ku sukulu ya Giliyadi. Wakanjira kilasi la nambara 21, ndipo wakamalizga pa 19 Julayi, 1953, pa nyengo ya ungano wa mitundu yose wa Ŵakaboni ŵa Yehova. Ungano uwu ukacitikira mu Stediyamu ya Yankee ku New York. Pakuti nkhaŵavya ndalama zakwendera, nkhapempha kapiteni wa sitima kuti niciteko ganyu mu sitima kuti ghaŵe malipiro ghakukafikira ku United States.
Nangauli, tikenda kwa mazuŵa 22, pa nyanja iyo nyengo zinyake yikavundukanga, kweni nkhakafika ku Brooklyn na kukumana na Eva. Ndipo tikati tadumbiskana, wakazomera kuti titorane. Nyengo yikati yajumphapo, ine na Eva tikamba kuteŵetera lumoza ku Ghana.
KUPWELELERA ŴAMUMBUMBA
Tati tateŵetera na Eva kwa vyaka vinandi ku Africa, nkhapokera uthenga kufuma kwa amama kuti adada ŵakulwara kansa. Tati tapempha kuti tilekezge dankha uteŵeti, tikawelera ku United States. Ŵadada ŵakalwara comene ndipo nyengo yicoko waka ŵakapotera.
Tati tawelera ku Ghana, pakajumpha vyaka pafupifupi vinayi, tikapulikaso kuti Amama mbalwari. Ndipo ŵanyithu ŵakatiphalira kuti tilute dankha ku nyumba kuti tikaŵapwelelere. Ici cikaŵa cipusu yayi. Tikawelera ku United States pamanyuma pakuti nateŵetera vilimika 15. Vilimika 11 nkhateŵetera lumoza na Eva.
Apo nkhakumana na fumu ku Ghana
Tikaŵapwelelera amama kwa vilimika vinandi ndipo tikalutanga nawo ku maungano para ŵaliko makora. Ndipouli, ŵakafwa pa 17 Janyuwale 1976, apo ŵakaŵa na vilimika 86. Kweni pati pajumpha vilimika 9 pakacitikaso cinthu cinyake cacitima comene. Muwoli wane Eva ŵakamusanga na kansa. Tikayezgayezga kuti tisange wovwiri kweni vikatondeka, ntheura wakafwa pa 4 Juni, 1985 apo wakaŵa na vilimika 70.
VINTHU VINANDI VIKASINTHASO PA UTEŴETI
Mu 1988, nkhacemeka kuti nkhaŵepo pa ungano wakupatulira ofesi ya munthavi ya Ghana iyo ŵakasazgirako. Ici cikaŵa cinthu cambura kuluwika. Vyaka 40 kumasinda apo nkhafikanga mu Ghana, Ŵakaboni ŵakaŵamo ŵacoko waka. Kweni mu 1988, ŵakaŵa ŵakujumpha 34,000. Ndipo pasono ŵakujumpha 114,000.
Pakati pajumpha vyaka viŵiri nati nawerako ku Ghana, nkhatorana na munyake wa Eva zina lake Betty Miller pa 6 Ogasiti 1990. Tose talutilira kuŵikapo mtima kuteŵetera Yehova. Ndipo tikulindilira nyengo apo tizamuwonanaso na ŵapapi, ŵasekuru, kweniso Eva para ŵazakawuskika mu caru ciphya ca paradiso.—Milimo 24:15.
Nyengo zinyake nkhuthiska na masozi wuwo para nkhukumbuka mwaŵi wapadera uwo Yehova wanipa kwa vyaka vyakujumpha 70, kuti nimuteŵetere. Nyengo zose nkhumuwonga cifukwa ca kunovwira kuti niŵikenge mtima pa uteŵeti. Nangauli sono nili na vyaka vya m’ma 90, Yehova uyo ni nkhwantha yikuru pa vyose, wakunipa nkhongono kuti nilutilire kuŵikapo mtima pa uteŵeti.
