Kuŵa na Banja Liwemi na Ŵabwezi
Ŵanthu ŵanandi ŵakukayika kuti ŵangaŵa paubwezi uwemi na ŵa mu banja lawo panji ŵabwezi ŵawo. Wonani fundo zinyake za mu Baibolo izo zingamovwirani kuti muŵe paubwezi uwemi na ŵanji.
MUGHANAGHANIRENGE ŴANJI
FUNDO YA MU BAIBOLO: “Kulaŵiska pa ivyo imwe mukukhumba pera yayi, kweniso ivyo ŵanyinu ŵakukhumba.”—Ŵafilipi 2:4.
IVYO FUNDO IYI YIKUNG’ANAMURA: Tingaŵa paubwezi uwemi na ŵanji usange tikupeleka kuluska kupokera. Para mukujighanaghanira mwekha, mungananga ubwezi winu na ŵanji. Mwachiyelezgero, usange mfumu panji muwoli wakujighanaghanira waka yekha wangaleka kugomezgeka kwa munyake. Kweniso palije uyo wangatemwa kuŵa paubwezi na munthu uyo nyengo zose wakujilumba na kuyowoya waka ivyo wali navyo. Buku linyake likuti “munthu uyo wakujighanaghanira waka yekha wakusangana na masuzgo ghanandi.”—The Road to Character
IVYO MUNGACHITA
-
Movwirenge ŵanyinu. Ŵanthu awo ŵali paubwezi wakukhora ŵakugomezgana kweniso ŵakovwirana. Kafukufuku munyake wakulongora kuti kanandi ŵanthu awo ŵakovwira ŵanyawo ni viŵi yayi kusuzgika maghanoghano ndipo ŵakuŵa ŵakukondwa.
-
Mulengerenge lusungu ŵanji. Lusungu ni para munthu wakukhwaskika mu mtima wake na suzgo ilo munyake wasangana nalo. Usange muli na lusungu mugegenge kuyowoya mazgu agho ghangakhuŵazga ŵanyinu, kweniso kuyowoya milangwe yiheni.
Para muli na lusungu, chiŵenge chipusu kuzomerezga maghanoghano gha ŵanyinu na vyakukhumba vyawo. Ntheura para muli na lusungu muŵavyenge sankho ndipo mungaŵa paubwezi na ŵanthu ŵaviyowoyero vyakupambanapambana.
-
Muchezgenge na ŵanji. Para mukuchezga chomene na ŵanji ndipo mukuŵamanya makora. Para mukukhumba kuŵa na ŵabwezi ŵanadi, mukwenera kuyowoya vinthu ivyo nawo ŵakutemwa. Ntheura mutegherezgenge chomene para ŵakuyowoya vya ku mtima kwawo. Kafukufuku munyake wakulongora kuti “ŵanthu ŵakuŵa ŵakukondwa para ŵakudumbiskana mwakufwatuka ivyo waliyose wakutemwa.”
MUSANKHENGE MAKORA ŴABWEZI
FUNDO YA MU BAIBOLO: “Mendezgano ghaheni ghakunanga makhaliro ghawemi.”—1 Ŵakorinte 15:33.
IVYO FUNDO IYI YIKUNG’ANAMURA: Ŵanthu awo mukuchezga nawo ŵangamunangani panji kumovwirani. Ŵanthu awo ŵakusanda za umo ŵanthu ŵakukhalira ŵakuzomerezga kuti ŵanthu awo tikuchezga nawo ŵangatinanga panji kutovwira. Mwachiyelezgero, ŵakuyowoya kuti para tikutemwa kuchezga na ŵanthu awo ŵakukhweŵa panji awo ŵakumazga nthengwa zawo nase tingamba kuchita mwakuyana waka.
IVYO MUNGACHITA: Ŵani paubwezi na ŵanthu awo ŵali na mikhaliro yiwemi iyo namwe mungatemwa kuŵa nayo. Mwachiyelezgero, ŵani paubwezi na ŵanthu awo ŵakuchita vinthu mwamahara, ŵakuchindika ŵanyawo, ŵakupa kweniso ŵanthu awo ŵakutemwa kupokelera ŵalendo.
FUNDO ZINYAKE ZA MU BAIBOLO
Wonelerani mavidiyo ghakufuma mu Baibolo agho ghakovwira mabanja, ŵachinyamata, kweniso ŵana ŵachoko kuti ŵaŵe na umoyo uwemi
GEGANI KUYOWOYA MAZGU AGHO GHANGAKHUŴAZGA ŴANJI.
“Kayowoyero kawakawaka kali nga nkhulasa kwa lupanga.”—ZINTHARIKA 12:18.
MUPENGE.
“Uyo wakupa mwawanangwa vimwenderenge makora.”—ZINTHARIKA 11:25.
MUCHITIRENGE ŴANJI VINTHU IVYO NAMWE MUNGATEMWA KUTI ŴAMUCHITIRANI.
“Ntheura, vinthu vyose ivyo mukukhumba kuti ŵanthu ŵamuchitiraninge, ndivyo namwe muŵachitirenge.”—MATEYU 7:12.
