Ŵanthu pa charu chose ŵakuzizipizga suzgo la kotcha kweniso kusintha kwa nyengo nako kwatalulira chomene. Wonani malipoti ghakulondezgapo agha:

•   “Mu mwezi wa June charu chawotcha chomene. Kotcha uku kwaluska chomene para tayaniska na kotcha uko kwaŵangako mu vyaka 174 ivyo vyajumpha.”—National Oceanic and Atmospheric Administration, U.S. Department of Commerce, July 13, 2023.

•   “Vyaru nga Italy, Spain, France, Germany na Poland vyasangana na suzgo la kotcha chomene kwa charu, mwakuti ŵakukhazga kuti mphepo zakotcha zifikenge m’paka 48°C pa virwa vya Sicily na Sardinia. Aka nkhakwamba kuti vyaru vya ku Europe viwotche nthena.”—European Space Agency, July 13, 2023.

•   “Apo charu chikuthukira, tikukhazga kuti vula yilokwenge mwakujumphizga. Ivi vipangiskengeso kuti maji ghatutuke chomene.”—Stefan Uhlenbrook, director of hydrology, water and cryosphere at the World Meteorological Organization, July 17, 2023.

 Kasi malipoti ghakusintha kwa nyengo agha ghakumufipiskani mtima? Wonani ivyo Baibolo likuyowoya pa nkhani ya kusintha kwa nyengo.

 Enya. Kotcha chomene kwa charu chose kweniso kusintha kwa nyengo vikufiska vinthu ivyo Baibolo likayowoyerathu kuti vizamuchitika mu nyengo yithu yino. Mwachiyelezgero, Yesu wakachima kuti tizamuwona vinthu “vyakofya,” panji kuti “vyachilendo na vyakutenthemeska.” (Luka 21:11; Good News Translation) Kotcha chomene kwa charu kukupangiska kuti ŵanthu ŵanandi ŵambe kufipa mtima kuti ŵanthu ŵanangirengethu charu chapasi.

 Yayi. Chiuta wakalenga charu chapasi kuti chiŵe chikaya cha ŵanthu muyirayira. (Salimo 115:16; Mupharazgi 1:4) Kweni Chiuta wakulayizga kuti wazamuparanya “awo ŵakunanga charu chapasi.”—Chivumbuzi 11:18.

 Baibolo likuti Chiuta wali na nkhongono ndipo wavikilirenge charu kuti chileke kufika pa kunangikirathu.

•   “[Chiuta] wakuchetamiska chimphepo, majigha gha nyanja ghakukhala bata.” (Salimo 107:29) Chiuta wali na nkhongono kulekeska masoka ghachilengiwa. Iyo wazamuwuskapo masoka ghose ghachilengiwa agho ghakupangiska kuti ŵanthu ŵasuzgikenge na kusintha kwa nyengo.

•   “Mukupwelelera charu chapasi, mwachipa vipasi vyakuzara na usambazi unandi.” (Salimo 65:9) Yehova wazamutumbika charu chapasi ndipo chizamuzgoka paradiso.

 Kuti mumanye vinandi vyakukhwaskana na ivyo Baibolo likulayizga pa nkhani yakunozga charu kuti chiŵe chiwemi, ŵerengani nkhani yakuti, “Ninjani Waponoskenge Charu Ichi?”