Ivyo Mungachita Para Mwamba Kusuzgika Maghanoghano Chifukwa cha Muliri

JULANI

Kasi muliri wa COVID-19 wamupangiskani kuti mujipulikenge ŵakuvuka chomene? Para ni nthena, manyani kuti muli mwekha yayi. Kwa myezi yinandi sono, ŵanthu pa charu chose chapasi ŵasintha vinthu vinandi pa umoyo wawo chifukwa cha muliri wakofya uwu. Dr. Hans Kluge, uyo ni Mulara wa wupu wa World Health Organization ku Europe wakati, ŵanthu ŵanandi “ŵajinora vinthu vinandi vyakuzirwa na chilato chakuti ŵachepeskeko kuthandazgika kwa matenda agha gha COVID-19. Nakuti para vyaŵa nthena ntchipusu kuti wamunthu wambe kuleka kukondwa na kukhalira waka kudandawura.”

Para mwamba kusuzgika maghanoghano chifukwa cha muliri, kutaya mtima yayi. Baibolo likovwira ŵanthu ŵanandi chomene kuti ŵalutilire kuŵa ŵakukondwa nangauli ŵakukhala mu nyengo zakusuzga izi. Namweso lingamovwirani.

Kasi kusuzgika maghanoghano chifukwa cha muliri ni vichi?

Kusuzgika maghanoghano chifukwa cha muliri, ni umo ŵanthu ŵakujipulikira chifukwa cha vinthu ivyo vyasintha pa umoyo wawo mu nyengo ya muliri kweniso wofi uwo ŵangaŵa nawo pakughanaghanira umo vinthu vizamuŵira munthazi. Nangauli ŵanthu ŵakupambana umo ŵangachitira para ŵali na suzgo ili, kweni kanandi vimanyikwiro vyakuti munthu wakusuzgika maghanoghano chifukwa cha muliri vikuyanako na ivi:

Kuleka kukondwa
Kusinthasintha pa nkhani ya kalyero na kugona
Ukali
Kwenjerwa na vinthu vyakuti vingachitika mwambura kusuzga
Kusuzgikira kuŵikako mahara ku ivyo ukuchita
Kuŵa na maghanoghano ghakuti kulijeso kawemi

Chifukwa wuli suzgo ili ni nkhani yamaseŵera yayi?

Suzgo ili lingaŵika umoyo withu kweniso wa ŵanji pa ngozi. Para tingaleka kuŵa maso, mbwenu pachoko na pachoko tingamba kusulako ulongozgi wa umo tingajivikililira ku muliri uwu wa COVID-19. Mukuluta kwa nyengo, tingaleka kuŵikako mahara ku muliri uwu, nanga vingaŵa kuti ukulutilira kuthandazgika kweniso kukoma ŵanthu. Pakuti tavuka kukhala mwakulondezga malango, mbwenu tingamba kukhumba kuchita vinthu mwakufwatuka, ivyo vingaŵika umoyo withu na wa ŵanji pa ngozi.

Mu nyengo zakusuzga izi, ŵanandi ŵajiwonera ŵekha kufiskika kwa mazgu gha mu Baibolo ghakuti: “Usange ukulopwa mu zuŵa la soka, nkhongono zako ziŵenge zichoko.” (Zintharika 24:10) Baibolo lili na fundo ziwemi izo zingatovwira kulimbana na masuzgo pa umoyo withu, kusazgapo muliri uwu.

Kasi ni fundo wuli za mu Baibolo izo zingamovwirani kulimbana na suzgo ili?

Mukhalenge mwakutalikirana na ŵanji—kweni kujipatura yayi

Fundo ya mu Baibolo: “Mubwezi wanadi . . . wali kubabikira kovwira mu suzgo.”—Zintharika 17:17.

Kuzirwa kwake: Ŵabwezi ŵanadi ŵakutikhozga. (1 Ŵatesalonika 5:11) Kweni para tikutemwa kujipatura na kukhala kwatekha nyengo yitali, umoyo withu ungaŵa pa ngozi.—Zintharika 18:1.

Yezgani fundo iyi: Nyengo zose muyowoyeskanenge na ŵabwezi ŵinu pa foni, imelu, mameseji na nthowa zinyake. Para vinthu vikwenda makora yayi zuŵa ilo, phaliraniko ŵanyinu ndipo muyowoyeskanenge nawo kaŵirikaŵiri kuti mumanye umo ŵaliri. Ŵaphaliraniko ivyo vikumovwirani kuti mulutilire kukondwa mu nyengo ya muliri iyi. Sangani nthowa izo mungalongolera lusungu ku ŵanji, ivyo vimovwiraninge kuti mose mujipulikeko makora.

Ivyo ŵanyake ŵakuyowoya

“Nkhuyezgeska kuti m’paka niyowoyeskanepo na ŵanyane kwizira pa pulogiramu yinyake ya pa kompyuta (videoconference). Nyengo zinyake tikuchezganga waka ŵaŵiri. Kweni nyengo zinyake, tikuŵanga kagulu ndipo tikuseŵelera lumoza gemu panji kuchezga waka. Nangauli vingayana yayi na kuwonana maso na maso, kweni vikovwira chomene. Muliri uwu wapangiska kuti umoyo uŵe wakusuzga, ntheura ntchakuzirwa kuti tiyowoyeskanenge na ŵabwezi ŵithu na kuŵaphalira umo tikujipulikira nadi. Ntchipusu yayi kuchita nthena, kweni unenesko ngwakuti tose tikukhumbikwira wovwiri.”—Megan, Canada.

“Tikuŵasoŵa ŵachibali na ŵabwezi ŵithu, kweni tasanga nthowa zakuŵalongolera kuti tikuŵatemwa. Nga mbumba, tikapanga makadi na tumathumba twa vyawanangwa na kupeleka ku ŵabwezi ŵithu ŵanandi kweniso tikaŵikangamo na mavesi ghakukhozga gha mu Baibolo mwakuti ŵamanye kuti tikuŵaghanaghanira. Ivi vikatovwira kuti tiŵe ŵakukondwa! Para tikumalira nyengo yithu kuchitira viwemi ŵanji, vikutovwira kuti tiluweko masuzgo ghithu.”—Emma na mfumu wake, Nathan, pamoza na ŵana ŵawo, Eli na Hope, United States.

Muŵe na vyakuchita vyakupambanapambana

Fundo ya mu Baibolo: “Mugwiliskirenge ntchito makora nyengo yinu.”—Ŵaefeso 5:16.

Kuzirwa kwake: Para mukugwiliskira ntchito makora nyengo yinu, vimovwiraninge kuti mulutilire kukondwa na kuleka kwenjerwa chomene.—Luka 12:25.

Yezgani fundo iyi: M’malo mwa kuŵika mtima pa ivyo mungachitaso yayi, ghanaghanirani vinthu viwemi ivyo mungachita pasono. Mwachiyelezgero, kasi pali ntchito zinyake izo mungakwaniska kuchita pasono panji vinthu vinyake waka ivyo mungatemwa kuchita? Kasi mungamalira nyengo yitali kuchezga na mbumba yinu?

Ivyo ŵanyake ŵakuyowoya

“Taŵa na m’pata wakuchitira vinthu vinandi chomene pa nyumba, nga kupanda mphangwe na mbewu zinyake, kupanga vinthu vinyake ivyo vikukhumba luso, na kutoweska vinthu.” Evan na muwoli wake, Samantha, pamoza na ŵana ŵawo, Eli na Adam, South Africa.

“Pasono ine na muwoli wane tikumalira nyengo yinandi lumoza kuluska kumasinda kose uku mu vyaka 30 ivyo taŵira lumoza. Ivi vyatovwira kuti titemwanenge chomene chifukwa tamanyana makora ivyo waliyose wakutondeka na ivyo wakuchita makora kuluska kumasinda uku. Nakuti pasono ndise ŵakunozgeka kovwirana mu nyengo zakusuzga izo tikumanenge nazo kunthazi.”—Ivan na muwoli wake, Eve, Italy.

Lutilirani kulondezga ndondomeko yinu

Fundo ya mu Baibolo: “Vinthu vyose vichitike . . . mu ndondomeko.”—1 Ŵakorinte 14:40.

Kuzirwa kwake: Ŵanthu ŵanandi ŵakujipulika makora para ŵali na ndondomeko yakuchitira vinthu.

Yezgani fundo iyi: Pangani ndondomeko iyo yikukolerana na umo vinthu viliri pasono. Patulani nyengo yakuchitira vinthu vya ku sukulu, ntchito, na ntchito za pa nyumba, kweniso nyengo yakuti muchitirenge vinthu vyauzimu. Lembaniso vinthu vinyake vyakovwira pa umoyo winu, nga kuchezga na mbumba yinu, kutembeya kuwaro kwa nyumba yinu na maseŵera ghakukhozga thupi. Nyengo na nyengo muyiwonengeso ndondomeko yinu na kusintha apo mphakwenelera.

Ivyo ŵanyake ŵakuyowoya

“Ningati waka mu nyengo ya muliri iyi, nichali kwendera ndondomeko yane yakale na kale ya umo nkhuchitira vinthu. Vinthu vinyake navisintha waka na kuŵikapo maseŵera ghakukhozga thupi, kweni nichali kuwuka nyengo yeneyiyo nkhawukiranga mulenji uliwose. Ndondomeko yane yikunovwira kuti nileke kuŵika waka maghanoghano ghane pa masuzgo gha mu nyengo ya muliri iyi, kweni niŵikenge mtima chomene pa ŵamumbumba yane na ŵabwezi ŵane.”—Kgaogelo, South Africa.

“Nkhutemwa kuwuka na kuphika chakurya cha mulenji kweniso kupanga khofi nga umo nkhachitiranga kale. Kufuma apo nkhunozgeka na kuvwara makora nga kuti nkhufumapo. Ivi vyanovwira kuti nijipulikenge makora kweniso kuti nileke kuvuka chomene.”—Carmel, France.

Para nyengo yasintha, namwe musinthenge vyakuchita vinu

Fundo ya mu Baibolo: “Munthu wakuchenjera wakuwona ulwani na kubisama.”—Zintharika 22:3.

Kuzirwa kwake: Kuyana na uko mukukhala, para nyengo yasintha vingakhwaskaso umo mukachitiranga vinthu vinyake nga nkhutembeya kuti mukasange tumphepo tuwemi na zuŵa ivyo vikovwira kuti muŵe na umoyo uwemi.

Yezgani fundo iyi: Para nyengo yakuzizima yafika, yezgani kusintha vinthu vinyake mu chipinda panji malo ghinu gha ntchito mwakuti ungweru wa zuŵa ufikenge. Sangani vyakuchita vinyake vyakuti vimovwirani kukatembeya kuwaro nanga kungaŵa kuti kukuzizima. Para mungafiska, sangani vyamphepo ivyo vingamovwirani kukhala nyengo yitali kuwaro kwa nyumba.

Para nyengo ya chithukivu yafika, ŵanthu ŵanandi ŵakutemwa kutembeya kuwaro kwa nyumba zawo, ntheura mukwenera kuŵa maso. Sankhani uko mulutenge, ndipo mukwenera kuwoneseska kuti nyengo iyo mulutirenge mwamusanga ŵanthu ŵanandi chomene yayi.

Ivyo ŵanyake ŵakuyowoya

“Nkhukhala uko kukutemwa kulokwa vula kanandi, ntheura kuŵa na ndondomeko yakuti ungayisintha mwambura kusuzga nkhwakovwira chomene. Para nawona waka zuŵa laŵala, nyengo yeneyiyo nkhufuma mu nyumba na kuluta kuwaro. Nanga ningatembeya mtunda uchoko waka panji kwendeska njinga ku zuŵa, vikunovwira kuti nijipulikeko makora.”—Sameena, France.

“Nyengo ya kotcha, chikaŵanga chipusu kusanga mipata ya kuchita vinthu kuwaro kwa nyumba, kweni sono apo nyengo yakuzizima yayamba, nkhupanga ndondomeko ya vinthu ivyo ningachita mukati mwa nyumba yane.”—Tiffany, Canada.

Lutilirani kulondezga malango ghakujivikilira ku muliri wa COVID-19

Fundo ya mu Baibolo: “Chindere chikupwelerako yayi ndipo chikujithemba.”—Zintharika 14:16.

Kuzirwa kwake: Muliri wa COVID-19 ngwakofya chomene, ndipo tingatora matenda agha usange taleka kuŵa maso.

Yezgani fundo iyi: Nyengo zose muwonenge malango agho ghaŵikika ndipo mujisandenge usange muchali kulutilira kughalondezga. Ŵikani mtima pa umo vyakuchita vinu vingakhwaskira imwe, ŵamumbumba mwinu, na ŵanji.

Ivyo ŵanyake ŵakuyowoya

“Nkhuchita chigaŵa chane kuti nichepeskeko kuthandazgika kwa muliri uwu. Nangauli ŵanyake ŵakusulako malango agho ŵapika, ine nkhuŵika mtima pa ivyo ningachita kuti ine na ŵamumbumba mwane tiŵe ŵakuvikilirika.”—Daryn, South Africa.

Khozgani ubwezi winu na Chiuta

Fundo ya mu Baibolo: “Sendelerani kwa Chiuta, ndipo iyo wasendelerenge kwa imwe.”—Yakobe 4:8.

Kuzirwa kwake: Chiuta wangamovwirani kuzizipizga suzgo la mtundu uliwose.—Yesaya 41:13.

Yezgani fundo iyi: Zuŵa lililose muŵerengenge mazgu gha Chiuta, Baibolo. Ndondomeko ya kuŵerenga Baibolo yingamovwirani chomene.

Para mungatemwa, mungafumba Ŵakaboni ŵa Yehova kuti mumanye ivyo mungachita kuti namwe musangenge chandulo na ndondomeko iyo ŵapanga yakulutilira kuwungana mu nyengo ya muliri wa COVID-19 iyi. Mwachiyelezgero, Ŵakaboni pa charu chose ŵakugwiliskira ntchito mapulogiramu ghanyake gha pa kompyuta (videoconferencing) kuti ŵachite maungano gha mpingo, Chikumbusko cha nyifwa ya Yesu Khristu, na ungano wachigaŵa.

Mavesi gha mu Baibolo agho ghangawovwira pa suzgo ili

Yesaya 30:15: “Musangenge nkhongono chifukwa cha kukhala mwakufwasa na kugomezga.”

Ng’anamuro lake: Para tikugomezga ulongozgi wa Chiuta, vitovwirenge kuti tikhale mwakufwasa mu nyengo zakusuzga izi.

Zintharika 15:15: “Mazuŵa ghose gha munthu wakusuzgika ngaheni, kweni munthu wa mtima wakusangwa wakuŵa na chiphikiro nyengo zose.”

Ng’anamuro lake: Para tikuŵika mtima pa vinthu viwemi vitovwirenge kuti tilutilire kuŵa ŵakukondwa nanga ni mu nyengo zakusuzga izi.

Zintharika 14:15: “Munthu muzeleza wakugomezga mazgu ghalighose, kweni wakuchenjera wakulanguruka pa mendero ghake ghose.”

Ng’anamuro lake: Mupulikirenge ulongozgi wakufuma ku ŵa vyaumoyo, lekani kuchimbilira kughanaghana kuti ulongozgi uwo mwapika ngwambura kukhumbikwa.

Yesaya 33:24: “Pazamuŵavya munthu wakukhala mu charu uyo wazamuti: ‘Nalwara.’”

Ng’anamuro lake: Chiuta wakulayizga kuti wafumiskengepo ulwari wa mtundu uliwose.

Nkhani Zinyake

Umoyo Uwemi Mtende na Chimwemwe

Panji Mungatemwa Kuŵerengaso Nkhani Izi

MAFUMBO AGHO BAIBOLO LIKUZGORA

Kasi Baibolo Lingamovwirani Kumarana na Suzgo Lakutondeka Kukhala Makora Para Mundagwiliskire Ntchito Munkhwala Wakutimbanizga Wongo?

Vinthu vinayi vya mu Baibolo ivyo vingamovwirani kutonda suzgo ili.

NKHANI ZINYAKE