Apo vinthu vikulutilira kusuzga ku Ukraine, ofesi ya munthavi ya Ukraine yaŵikapo mtima kuchita maulendo gha uliska mu charu ichi. Ŵabali ŵamaudindo ŵakulutilira kuŵikapo mtima kuchita maulendo gha uliska ku ŵapharazgi masauzandi ghanandi awo ŵali kuchimbira ku kwawo. Maulendo agha ghakovwira chomene mwauzimu. Pamanyuma pakuti mubali wa mu Komiti ya Munthavi wendera ŵabali na ŵadumbu awo ŵali kumanjiliro gha dazi kwa Ukraine, mudumbu munyake uyo pasono wakukhala dankha pa Nyumba ya Ufumu yinyake pamoza na ŵanyake pafupifupi 30, mu msumba wa Uzhgorod, wakati: “Nkhajipulikanga kuti Yehova wakunihaga.”

Ŵabali ŵakuŵikaposo mtima kuchita maulendo gha uliska ku ŵanthu ŵachikanga pafupifupi 100 awo ŵali mu Makomiti 27 Ghakovwira Para Kwachitika Soka. Ihor, uyo wali mu yimoza mwa makomiti agha, wakuti: “Apo nkhatumikanga kuti nkhateŵeterenge mu Komiti Yakovwira Para Kwachitika Soka, ine na muwoli wane tikaŵa kale kuti tachimbira kukwithu ndipo tikasungikanga mu nyumba yinyake. Apo tikaŵa kuti tavuka, mubali wa mu Komiti ya Munthavi, uyo ngwakutangwanika chomene, wakasanga nyengo kuti wazakatiyendere na kutitegherezga. Tikajipulika kuti nase tili ŵakuzirwa” Ihor wakutiso: “Para tili mu nyengo iyo tili nga ni ŵana, nyengo yakuti palije icho tingachitapo, tikulomba waka kwa Yehova na kumuthulira vyose, kanandi waka tikujiwonera tekha woko lake likutovwira.”

Pa nkhani ya Nyumba za Ufumu mu vigaŵa ivyo nkhondo yasuzga, pasono Nyumba za Ufumu zinayi zili kusakazikirathu, 8 zili kunangika chomene, ndipo 33 zili kunangika pachoko waka.

Kufika pa May 17, 2022,  tili kupokera chiŵelengero icho chili pasi apa kufuma ku Ukraine. Viŵelengero ivi vili kulembeka kutolera pa malipoti ghakufuma ku ŵabali ŵa mu mipingo. Ndipouli, chiŵelengero chenecho chikwenera kuŵa chakukwera, chifukwa pasono ntchakusuzga chomene kuyowoyeskana mu vigaŵa vyose vya charu ichi.

• Ŵapharazgi 37 ŵali kufwa

• Ŵapharazgi 74 ŵali kupwetekeka

• Ŵapharazgi 45,253 ŵali kuchimbira mu nyumba zawo na kuluta ku vigaŵa ivyo vinthu vili makorako mu charu chenechichi

• Nyumba 418 zili kusakazikirathu

• Nyumba 466 zili kunangika chomene

• Nyumba 1,213 zili kunangika pachoko waka

• Nyumba za Ufumu zinayi zili kusakazikirathu

• Nyumba za Ufumu 8 zili kunangika chomene

• Nyumba za Ufumu 33 zili kunangika pachoko waka

• Makomiti Ghakovwira Para Kwachitika Soka 27 ghali kwimikika ku Ukraine

• Ŵapharazgi 48,806 ŵakawovwirika na Makomiti Ghakovwira Para Kwachitika Soka kuti ŵasange pakukhala mu vigaŵa ivyo vinthu viliko makora

• Ŵapharazgi 21,786 awo ŵali kuchimbilira ku vyaru vinyake ŵakovwirika na Ŵakaboni ŵanyawo