“Kafai e fakatagi atu koutou ki te Tamana mō so se mea, ka tuku atu eiloa ne ia ki a koutou a te mea tenā i toku igoa.”—Ioane 16:23.

E fakaasi manino mai i pati a Iesu me e se manako a Ieova ke ‵talo atu tatou ki a ia e auala i mea fakatusa, tino tapu, agelu, io me ko ‵tou tupuga kolā ko oti ne ‵mate, kae i te igoa o Iesu Keliso. Kafai e ‵talo atu tatou ki te Atua i te igoa o Iesu, e fakaasi atu ei me e iloa ne tatou te tulaga tāua o Iesu. Ne fai mai a Iesu: “E seai se tino e fanatu ki te Tamana māfai e se auala mai i a au.”—Ioane 14:6.

“‵Ligi atu ki tua a mea i otou loto ki ana mua.”—Salamo 62:8.

Kafai e ‵talo tatou ki a Ieova, e ‵tau o fai‵pati atu e pelā eiloa me fai‵pati tatou ki se tamana alofa. I lō te faitau atu mai se tusi io me fai a ‵talo fakaakoako, e ‵tau o fai‵pati atu tatou ki a ia mo te āva kae mai i ‵tou loto.

“Me ko so se mea e fakatagi atu tatou ki ei e ‵tusa mo tena loto, e lagona eiloa ne ia tatou.”—1 Ioane 5:14.

I te Tusi Tapu, e fakailoa mai ne Ieova te Atua a mea ka fai ne ia mō tatou, mo mea e manako a ia ke fai ne tatou mō ia. Ke talia ‵tou ‵talo ne te Atua, e ‵tau o ‵talo atu tatou e ‵tusa mo tena loto. Ke fai penā, e ‵tau o suke‵suke tatou ki te Tusi Tapu ko te mea ke iloa faka‵lei ne tatou a ia. Kafai e fai tatou penā, ka fiafia eiloa a ia o fakalogologo mai ki ‵tou ‵talo.

‵Talo atu mō ‵tou manakoga tāua. E mafai o ‵talo tatou ki te Atua mō ‵tou manakoga tāua i aso takitasi—mea‵kai, gatu mo fale. E mafai foki o ‵talo atu tatou mō te poto ke fai a fakaikuga ‵lei penā foki mo te malosi ke kufaki i ‵tou tofotofoga. E mafai o ‵talo atu tatou mō te fakatuanaki, mō se fakamagaloga kae penā foki mo te fesoasoani o te Atua.—Luka 11:3, 4, 13; Iakopo 1:5, 17.

‵Talo atu mō nisi tino. E fia‵fia eiloa a mātua atafai māfai olotou tama‵liki e fakatau a‵lofa. A Ieova foki e manako ko ana tama‵liki i te lalolagi nei ke fakatau atafai te suā tino ki te suā tino. E ‵tau foki o ‵talo atu tatou mō ‵tou avaga, ‵tou tama‵liki, ‵tou kāiga, mo ‵tou taugasoa. Ne tusi mai te soko ko Iakopo, penei: “Kae ‵talo te suā tino mō te suā tino.”—Iakopo 5:16.

Fakaasi Atu te Loto Fakafetai. E fai mai te Tusi Tapu e uiga ki te ‵tou Mafuaga, penei: “I mea ‵lei ne fai ne ia, mai te tuku atu ki a koutou a vaiua mai te lagi mo tau o aso aoga, e fakamalie ne ia koutou ki meakai kae faka‵fonu otou loto ki te fiafia.” (Galuega 14:17) Kafai e mafau‵fau tatou ki mea katoa ne fai ne te Atua mō tatou, ka fakamalosi aka tatou ke fakaasi atu te loto fakafetai ki a ia i ‵talo. E tonu, e ‵tau foki o fakaasi atu ‵tou loto fakafetai ki te Atua mai te auala e ola ei tatou.—Kolose 3:15.

I nisi taimi, e mafai o loto vāi‵vai tatou ona ko te fui tali mai o ‵tou talo kolā e fai atu mo te loto fakamaoni. E mata, e ‵tau o fakaiku aka ne tatou me e se fia saga mai te Atua? Ikai. Ka mafau‵fau tatou ki tala kolā e fakaasi mai ei a te tāua ke ‵talo faeloa tatou.

A Steve, telā ne taku mai i te mataupu muamua, ne fai mai penei, “Moi se ‵talo faeloa au, penei ko leva ne galo atu toku fakamoemoega ke fiafia i te olaga.” Se a te mea ne fai ei ke ‵fuli a ia? Ne kamata a ia o sukesuke ki te Tusi Tapu kae tauloto ki te tāua ke ‵talo kae ke fakatumau. “Ne ‵talo au ki te Atua kae fakafetai ki a ia mō te fesoasoani alofa ne maua faeloa ne au mai oku taugasoa pele,” ko pati a Steve. “Ko sili atu toku fiafia i te taimi nei i lō aso mua.”

Kae e a Jenny, telā ne mafaufau i a ia ko se aoga ke lagona ne te Atua ana ‵talo? Ne fai mai a ia penei, “I te taimi ne mafaufau ei au i a au ko se aoga, ne akai atu au ki te Atua ke fesoasoani mai ke malamalama i te pogai ne mafaufau ei au, i a au ko se aoga.” Ne fesoasoani atu pefea te mea tenā ki a ia? “A te faipati atu ki te Atua, ne fesoasoani mai ke ‵pau taku kilokiloga ki a au e pelā mo ia, ke lavea ne au me kafai foki loa e fakamaseigina au ne toku loto, kae e se fai eiloa a ia penā. Ne fesoasoani mai foki ki a au ke mo a ma ‵fiu vave kae ke taumafai faeloa.” Se a te ikuga? “Ne fesoasoani mai te ‵talo ke kilo atu au ki a Ieova e pelā me se Atua tonu, e alofa kae atafai, se Tamana mo se Taugasoa telā e toka o fesoasoani mai i te taimi e taumafai ei au o fai te mea e manako a ia ki ei.”

Mafaufau foki ki te mea ne tupu ki a Isabel. I te taimi ne faitama ei a ia, ne fakailoa atu a tokita ki a ia me i tena tama telā ka fanau mai ka sē katoatoa ‵lei. Ne fanoanoa ‵ki a ia. Ne fakamalosi atu foki a nisi tino ke fakatō tena pepe. “Ne mafaufau au me i a au ka mate ona ko te kaitaua.” Ne a mea ne fai ne ia? “Ne ‵talo faeloa au ki te Atua mō se fesoasoani,” ne fai mai a ia. Fakamuli loa, ne fanau mai ne ia se tamaliki tagata telā e se katoatoa ‵lei, ko Gerard. E mata ne mafaufau a Isabel me ne tali mai ne te Atua ana ‵talo? Ao! I te auala fea? “Kafai ko kilo atu nei au ki taku tama tagata telā ko 14 ana tausaga e fiafia i tena olaga faitalia tena sē katoatoa ‵lei,” ne fai mai a Isabel, “ne iloa ne au me tenā loa te ‵toe tali ‵lei ki aku ‵talo, ko te ‵toe fakamanuiaga sili ne tuku mai ne Ieova te Atua ki a au.”

E fai ne vaegā pati fakaotia loto penā ke mafau‵fau tatou ki pati a te faisalamo: “Ka lagona ne koe a te fakamolemole a te tino agamalu, e Ieova. Ka fai ne koe olotou loto ke ‵mautakitaki kae saga faka‵lei atu ki a latou.” (Salamo 10:17) Ko oko eiloa i te uke o pogai ‵lei ke tumau tatou i te ‵talo atu ki te Atua!

E fakamau i te Tusi Tapu a ‵talo e uke ne fai ne Iesu. A te ‵toe ‵talo lauiloa ko te ‵talo telā ne akoako ne ia ki ana soko. Ne a mea e mafai o tauloto ne tatou mai i ei?