ONA ko te mea e ola tatou i se lalolagi masei, e ‵tau o ga‵lue malosi tatou ke maua te filemu. Kae kafai foki e maua ne tatou se tamā filemu, e taumafai faeloa tatou ke fakatumau. Ne a pati i te Muna a te Atua kolā e mafai o fesoasoani mai ke maua ne tatou a te filemu tonu kae tumau ki te se-gata-mai? Kae e mafai pefea o fesoasoani atu tatou ki nisi tino ke fai penā?

Ko te mea ke maua a te filemu tonu, e ‵tau o saogalemu kae tokagamalie tatou. E ‵tau foki o ati aka ne tatou se vā fakataugasoa ma‵losi mo nisi tino. Kae sili atu i te tāua, ke maua te filemu tumau, e ‵tau o ati aka ne tatou se vā fakataugasoa ‵pili mo te Atua. E mafai pefea o fai ne tatou a te mea tenā?

Kafai e faka‵logo tatou ki fakatonuga mo fakatakitakiga amio‵tonu a Ieova, e fakaasi atu ei me tali‵tonu tatou ki a ia kae e ma‵nako tatou ke maua se fesokotakiga filemu mo ia. (Iele. 17:7, 8; Iako. 2:22, 23) Kae ko te ikuga, ka fakapilipili malosi mai a ia ki a tatou kae fakamanuia ne ia tatou ki se filemu i te loto. E fai mai te Isaia 32:17, penei: “E iku atu a te tinā amiotonu ki te filemu, kae ko fuataga o te tinā amiotonu ko te tokagamalie mo te saogalemu tumau.” E mafai o maua ne tatou te filemu i te loto mai te faka‵logo ki a Ieova mai te loto.—Isa. 48:18, 19.

Ne fesoasoani foki tatou i te atiakaga o te filemu tumau e auala i se meaalofa tāua mai te ‵tou Tamana i te lagi—ko tena agaga tapu.—Galu. 9:31.

Ne fakamau ne te apositolo ko Paulo a te filemu e pelā me ko te vaega i te tolu o “fuataga o te agaga.” (Kala. 5:22, 23) Ona ko te mea ne māfua mai te filemu i te agaga o te Atua, e ‵tau o talia ne tatou te fakamalosiga a te agaga tapu ke ati aka ei te filemu tonu. Ke na onoono nei tatou ki auala e lua kolā e mafai o fesoasoani mai te agaga o te Atua ke maua ne tatou a te filemu.

 A te mea muamua, telā e fesoasoani mai ke ati aka te filemu ko te fai‵tau ki te Muna fakaosofia a te Atua i aso katoa. (Sala. 1:2, 3) I te taimi e mafaufau ‵loto ei tatou ki te fekau mai te Tusi Tapu, e fesoasoani mai loa te agaga o te Atua ke malama‵lama tatou i mafaufauga o Ieova e uiga ki mea e uke. E pelā me se fakaakoakoga, e lavea ne tatou te auala e tumau ei a ia i te uiga filemu mo te pogai e tāua ‵ki ki a ia a te filemu. Kafai e fakagalue aka ne tatou a vaegā akoakoga penā mai te Muna a te Atua, e maua eiloa ne tatou a te filemu sili i ‵tou olaga.—Faata. 3:1, 2.

Te lua, e ‵tau mo tatou o ‵talo mō te agaga tapu o te Atua. (Luka 11:13) E tauto mai a Ieova me kafai e ‵sala atu tatou ki tena fesoasoani, “kae ko te filemu o te Atua telā e sili fakafia atu i mea katoa kolā e malamalama i ei a tino katoa ka puipui ne ia [‵tou] loto mo te malosi o [‵tou] mafaufau e auala i a Keliso Iesu.” (Fili. 4:6, 7) Kafai e ‵talo atu tatou mo te fakalagolago ki te agaga o Ieova, ka faka‵fonu ne te ‵tou Atua a tatou ki te filemu i te loto telā e maua fua ne latou kolā e isi se lotou vā fakataugasoa tāua mo ia.—Loma 15:13.

Ne fakagalue aka pefea ne nisi tino a pati fakatonutonu mai te Tusi Tapu kae fai a ‵fuliga kolā e manakogina ke mafai o maua ne latou a te filemu tumau—mo Ieova, latou, mo nisi tino aka?

E isi ne Kelisiano i te fakapotopotoga i aso nei ne masani o “vave o kaitaua” kae nei la ko fai latou mo tino mafaufau ‵lei, atafai, kufaki, kae uiga filemu i olotou faifaiga ki nisi tino. * (Faata. 29:22) Onoono aka la ki te ‵tonu o te mea tenei me ne fesoasoani atu eiloa ki tino talai o te Malo e tokolua ke manumalo i te kaitaua kae ke ati aka te filemu i te vā o lāua mo nisi tino.

Ne pokotia eiloa i faifaiga ma‵sei a David a ana pati. A koi tuai o tuku atu tena ola ki te Atua, ne fai masei faeloa a ia ki tino kae fakaaoga a pati ma‵sei ki tena kāiga. Fakamuli ifo, ne lavea ne David te manakoga ke ‵fuli kae ke uiga filemu. Ne maua pefea ne ia te filemu? E fai mai a ia, “Ne kamata o fakagalue aka ne au a fakatakitakiga mai te Tusi Tapu i toku olaga, kae ko te ikuga, ne gasolo aka eiloa o malosi a te uiga āva i toku vā mo toku kāiga.”

Ne pokotia eiloa a uiga o Rachel mai te auala ne puti aka ei a ia. E fai ‵tonu mai a ia, “Nei foki loa, e taua eiloa au mo lagonaga kaitaua ona ko te mea  ne tupu aka au i se kāiga kaitaua.” Se a te mea ne fesoasoani atu ki tou fafine ke uiga filemu? E tali mai a ia, “Ko te ‵talo mo te fakalagolago ki a Ieova.”

A David mo Rachel ne fakaakoakoga fua e lua o fuataga o te filemu telā e iku mai i te fakagalue aka o fakatakitakiga faka-te-Tusi Tapu kae fakalagolago ki te agaga o te Atua ke fesoasoani mai ki a tatou. E manino ‵lei, me faitalia e ola tatou i se lalolagi kaitaua, e mafai eiloa o maua ne tatou te filemu o te loto telā e fesoasoani mai ke maua se vā fealofani mo ‵tou kāiga penā foki mo taina Kelisiano. Kae e fakamalosi mai a Ieova ki a tatou ke “tausi te filemu i te vā o [tatou] mo tino katoa.” (Loma 12:18) E mata, e mafai eiloa o tupu te mea tenā, kae ne a mea aoga e mafai o maua ne tatou mai ‵tou taumafaiga ke uiga filemu?

E auala i ‵tou galuega talai, e ‵kami eiloa ne tatou a tino ke maua ne latou a mea aoga mai ‵tou fekau filemu e uiga ki te Malo o te Atua. (Isa. 9:6, 7; Mat 24:14) Se mea fakafiafia, me e tokouke a tino e ‵saga mai ki ei. Tela la, ko se pokotia latou i lagonaga fakafanoanoa io me ko te kaitaua ona ko mea e ‵tupu i olotou tafa. I lō te fai penā, ko maua nei ne latou se fakamoemoega tonu mō aso mai mua kae ko gasue‵sue o “‵sala ki te filemu kae kausaki ki ei.”—Sala. 34:14.

Kae e se ko tino katoa e ‵saga tonu mai ki ‵tou fekau, e se i te taimi muamua. (Ioa. 3:19) E ui i ei, ne fesoasoani mai eiloa te agaga o te Atua ke talai atu ne tatou te tala ‵lei ki a latou i se auala filemu kae āva. I te auala tenei, e tau‵tali atu eiloa tatou ki te fakatonuga a Iesu ki te faiga o te galuega talai telā ne fakamau i te Mataio 10:11-13, telā ne fakatonutonu mai a ia, penei: “Kafai e ulu atu koutou ki se fale, fakatalofa atu ki tino i loto i ei. Kafai e talia ne latou, ke i luga i a latou te filemu; kae kafai e se talia ne latou, toe fakafoki mai la te filemu ki a koutou.” Kafai e tau‵tali tatou ki te fakatakitakiga a Iesu, ko mafai ei o tiakina ne tatou te koga tenā mo te filemu kae fakamoemoe me ka fakalogologo mai te tino tenā i te suā taimi.

E kausaki atu foki tatou ke maua te filemu māfai e talai atu tatou ki ofisa pule o te malo i se auala āva—e aofia i ei a latou kolā e mafai o ‵teke mai ki ‵tou galuega. E pelā me se fakaakoakoga, ne talia ne te malo o se fenua e tasi o Afelika a te fakailoga tino ke puipui i ei mai te mauaga o se taliaga ke faite a Fale Tapuaki a tatou. I fakamoemoega ke faka‵lei aka te fakalavelave i se auala filemu, ne ‵tofi aka se taina telā ne galue muamua e pelā me se misionale i te koga tenā o Afelika ke asi atu ki te Komisina Maluga i Lonitona i Egelani. Ne fai atu ne ia ki te tino pule tenā e uiga ki te galuega telā e fai ne Molimau a Ieova i tena fenua mo te filemu. Ne iku atu ki te a te asiga tenā?

“I te taimi ne oko atu au ki te taipola o te tino galue i te ofisa tenā,” ko ana muna, “ne iloa ne au me i te fafine tenā se tino mai te itukāiga telā ne tauloto ne au te lotou ‵gana, ona ko te auala e fai ei ana gatu. Tela la, ne fakatalofa atu au ki ei i tena ‵gana eiloa. Ne poi tou fafine, kae ne ‵sili mai ki a au, ‘Se a te pogai o tau asiga?’ Ne fai atu au mo te atafai me e manako au o fetaui mo te Komisina Maluga. Ne telefoni tou fafine ki ei, kae ne vau a ia ki tua o fakafetaui kae fakatalofa mai ki a au i te ‵gana eiloa o te itukāiga tenā. Mai tua ifo, ne fakalogologo faka‵lei mai a ia i te taimi ne fakamatala atu ne au ki a ia a galuega a Molimau a Ieova kolā e fai mo te filemu.”

Ne fai ne te fakamatalaga a te taina tenei mo te āva ke ave kea‵tea i ei a te uiga fakailoga tino mo te sē malamalama o te komisina maluga tenei e uiga ki ‵tou galuega. I se taimi mai tua ifo, ne toe talia ne te malo o te fenua tenā o Afelika ke ave kea‵tea a te fakataputapuga e uiga ki te faitega o ‵tou Fale Tapuaki. Ko oko eiloa i te fia‵fia o taina i te ikuga filemu tenā! E tonu, a te fakaasi atu o te āva ki nisi tino e iku atu eiloa ki te ‵lei—io me ko te filemu.

I aso nei, e maua eiloa ne tino o Ieova te palataiso faka-te-agaga telā e ‵fonu i te filemu. Ka maua eiloa ne koe te filemu tenā i te taimi e galue ei koe o ati aka te uiga tenā o fuataga o te agaga i tou olaga. Kae sili atu i te tāua, ka maua eiloa ne koe a te taliaga a Ieova mo te filemu tumau i te lalolagi fou a te Atua.—2 Pe. 3:13, 14.