A te ‵toe mafaufau ki te taimi koi foliki ei au e fakafoki mai ei a aso fakafia‵fia i se tamā fale i te vao i te feitu ki saute o Falani, te koga telā ne ‵nofo atu ei oku mātua. Ne fai ne toku tamana se tītī mō oku, kae ne fiafia malosi foki au o teletele i te fatoaga. I te 1966, ne āsi mai a Molimau a Ieova ki te motou fale kae ne fai ne latou a sau‵talaga leva ‵ki mo toku tamana. I se fitu masina fua mai tua ifo, ne fakaiku aka ne tou tagata ke fai a ia mo fai se Molimau. E seki leva kae tautali atu toku mātua i kalafaga o tou tagata, kae ne puti aka ne lāua a au i se vaegā kāiga alofa.

Ne kamata eiloa oku fakalavelave mai tua o te taimi ne ‵foki atu ei matou ki Sepania, ko te fenua tonu o oku mātua. Ne kamata o lagona ne au a te ‵mae i oku lima mo fatugugu. Mai tua o se lua tausaga o āsiga ki tokita e uke, ne maua ne matou se tokita o ivi lauiloa, telā ne fai mai penei mo te fanoanoa, “Ko tō talimuli.” Ne kamata o tagi toku matua. Ne lagona ‵mao atu ne au mai i loto i te potu ‵moko a vaegā tugāpati pelā mo te “masaki tumau kolā ko se mafai o ‵teke ne te foitino” mo te “gugu foliki.” * E tiga eiloa ne seki malamalama malosi au e pelā me se tamaliki ko sefulu oku tausaga, ne iloa ne au me se tala fakafanoanoa.

Ne fai mai ei te tokita ke fai a togafiti ki a au i te fa‵kaimasaki o tama‵liki. I te taimi ne oko atu ei au ki konā, ne loto vāivāi au i te koga o tino ma‵saki malosi. Ne ‵mafa ‵ki a tulafono i ei: Ne ‵kati ne sina toku ulu kae fakapei ne latou au ki se togiga o vaegā gatu mua. ‘E mafai pefea o kufaki ne au te olaga nei?’ Ko te mea ne mafaufau au ki ei mo oku loimata e ‵sofi ifo faeloa.

Ona ko mea ko oti ne akoako mai ne oku mātua ke tavini atu ki a Ieova, ne ita fitifiti au ma aofia i faifaiga fakalotu a te kau Katolika i te fa‵kaimasaki o tama‵liki. Ne faigata eiloa ki sina ke malamalama latou i te pogai ne ita ei au. Ne fakamolemole malosi au ki a Ieova, ke mo a ma tiakina ne ia au, kae e seki leva kae lagona ne au tena puipuiga alofa, e pelā me se tamana alofa telā e ‵sai mai mo te alofa ki a au.

Ne talia ke āsi malie mai ki a au oku mātua i Aso Ono. Ne aumai ne lāua a tusi faka-te-Tusi Tapu mo oku faitau ke fakamalosi aka ei toku fakatuanaki. E se talia sāle ke isi ne tusi totino a tama‵liki, kae ne talia ne sina ke tausi aku tusi fakatasi mo taku Tusi Tapu, telā e faitau au ki ei i aso katoa. Ne faipati foki au ki nisi tamaliki fā‵fine e  uiga ki toku fakamoemoega ke ola ki te se-gata-mai i te lalolagi Palataiso, telā e seai se tino e toe masaki. (Fakaasiga 21:3, 4) Faitalia toku fanoanoa mo te sē sologa i nisi taimi, ne fiafia au me ne gasolo aka faeloa o malosi toku fakatuanaki mo te talitonu ki a Ieova.

Mai tua o te ono masina, ne uga atu ei au ne tokita ki te fale. Ne seki ‵fuli eiloa te tulaga o toku masaki, kae ne fiafia malosi au ke toe foki atu ki oku mātua. Ne momea aka te sē ‵lei o oku sokogā ivi, kae ne logo‵mae malosi au. Ne oko atu au ki te tulaga talavou mo te tulaga vāivāi ‵ki. Kae i te taimi ko 14 ei oku tausaga, ne papatiso au kae fakaiku aka ke tavini atu ki toku Tamana faka-te-lagi i te ‵toe mea e mafai ne au o fai. Kae i nisi taimi e maua ne au se lagonaga ita ki a ia. “Kaia la ko au? Fakamolemole faka‵lei mai au,” ne ‵talo atu au. “E a, e se lavea ne koe a te lasi o toku logo‵mae?”

A te tulaga talavou se taimi faigata ‵ki ki a au. Ne ‵tau o talia ne au te manatu me e se mafai o toe ‵lei au. Ne seki mafai o taofi aka a te fakatusatusa ne au a au eiloa ki oku taugasoa—kolā e malosi ‵ki kae fiafia katoatoa ki te olaga. Ne manatu fatauva au ki a au eiloa, kae ne kamata ei au o nofo ‵mu. E tiga eiloa te feitu tenā, ne fesoasoani mai eiloa toku kāiga mo taugasoa ki a au. E masaua faeloa ne au a Alicia—e 20 tausaga tena matua i a au—telā ne fai mo fai se taugasoa tonu. Ne fesoasoani mai tou fafine ke se mafaufau au ki toku masaki kae ke mafaufau ki nisi tino i lō te manavase ki oku fakalavelave.

I te taimi ko 18 ei oku tausaga, ne logo‵mae malosi au, kae ne fi‵ta malosi au mai tua o te kauatuga ki fakatasiga Kelisiano. E tiga eiloa te feitu tenā, ne fakaaoga faka‵lei ne au oku “taimi avanoa” i te fale ke sukesuke faka‵lei ki te Tusi Tapu. A te tusi o Iopu mo Salamo ne fesoasoani mai ke malamalama au i a Ieova e se puipui faeloa ne ia tatou i fakamaseiga faka-te-foitino, kae e atafai mai eiloa a ia o tuku mai a fakamalosiga kolā e manakogina ne tatou. Aku ‵talo kolā e fai atu faeloa ne maua ne au mai i ei a “te malosi telā e sili atu i te malosi masani” mo “te filemu o te Atua telā e sili fakafia atu i mea katoa kolā e malamalama i ei a tino.”—2 Kolinito 4:7; Filipi 4:6, 7.

I te taimi ko 22 ei oku tausaga, ne ‵tau o talia ne au te manatu me ko ‵tau o nofo atu au i luga i se nofoga fakatekateka mō tino ma‵saki. Ne mataku au i te mea ma lavea fua ne tino se fafine masaki i luga i te nofoga fakatekateka kae e se iloa ne latou me ko au. Kae ne tuku mai eiloa ne te nofoga fakatekateka se avanoaga ke mafai ne au o fai a nisi mea e aunoa mo te fakalagolago ki nisi tino, kae ne ‵fuli eiloa i ei a te mea ne mafaufau muamua au me se “malaia” ki se fakamanuiaga. Ne fai mai ne se taugasoa e igoa ki a Isabel ke fakatoka ne au se fakamoemoega ke fakamāumāu fakatasi ne māua a itula e 60 i te galuega talai mō se masina e tasi.

Muamua la, ne mafaufau au me ko oko eiloa i te sē ‵lei o te manatu tenā. Ne akai atu au ki a Ieova mō se fesoasoani, kae fakatasi mo te fesoasoani o toku kāiga mo oku taugasoa, ne mafai ei o fai ne au. Ne oti vave atu a te masina fakalavelave tenā kae ne iloa aka ne au me ne manumalo eiloa au i te mataku mo te ma. Ne fiafia malosi au ki ei telā ne fakaiku aka ne au i te 1996, ke fai au mo fai se paenia tumau—telā e ‵tau o fakamāumāu se aofaki mautinoa o itula i masina takitasi i te galuega talai. Se fakaikuga e tasi i toe fakaikuga ‵lei ne fai ne au, telā e fai ke fakapilipili atu au ki te Atua kae fakamalosi aka foki i ei au i te feitu faka-te-foitino. A te kau atu ki te galuega talai e maua ei ne au se avanoaga ke fakaasi atu toku fakatuanaki ki tino e tokouke kae fesoasoani atu foki ki nisi tino ke fai mo fai ne taugasoa o te Atua.

I te tau mafanafana i te 2001, ne logo‵mae malosi au i te fe‵pakiga o motoka kae ‵fati katoa ei oku vae. I te taimi ne takato atu ei au i te moega i te fa‵kaimasaki, ne ‵talo lēmū atu au mo te loto finafinau: “Fakamolemole Ieova, sa tiaki mai au!” I konā eiloa, ne fesili mai se fafine mai i te moega i oku feitu, “A koe se tokotasi o Molimau a Ieova?” E seai soku malosi ke tali atu, kae ne lū atu fua toku ulu. “E iloa ne au koutou! E masani sāle au o faitau ki otou mekesini,” ne fai mai tou fafine. Ne fakamafanafana malosi mai eiloa a pati konā ki a au. Ke oko foki eiloa ki toku toe tulaga sē ‵lei, ne mafai eiloa ne au o tuku atu se molimau e uiga ki a Ieova. Se tauliaga gali eiloa!

I te taimi ne tai feoloolo ei au, ne fakaiku aka ne au ke momea aka toku molimau atu. E ‵taki atu au ne toku matua i loto i te fa‵kaimasaki i luga i te nofoga mo oku vae e lua e fakapalasita. I aso takitasi, e āsi atu māua ki nāi tino ma‵saki, fesili atu me e a latou, kae tuku atu foki a nisi tusi faka-te-Tusi Tapu ki a latou. E fakafi‵ta a vaegā asiga penā, kae ne tuku mai ne Ieova te malosi e manakogina ne au.

I nai tausaga ko ‵teka atu, ne momea aka oku logo‵maega kae ne fakaopoopo atu foki ki toku loto mafatia a te galo atu o toku tamana. Kae koi taumafai eiloa au ke  maua se kilokiloga aoga. E pefea la? I so se taimi telā e ‵lei, e taumafai au ke ‵kau fakatasi mo taugasoa mo kāiga, me e fesoasoani mai te mea tenā ke ave keatea mai toku mafaufau oku fakalavelave. Kae kafai e nofo tokotasi au, e faitau au, sukesuke ki te Tusi Tapu, io me e talai atu ki nisi tino i te telefoni.

Ne taumafai foki au o fai a nai mea fakafia‵fia, e pelā mo te tuku faka‵sau atu oku mata ki te matagi io me ko pulalakau manogi ‵gali. E tuku mai ne mea konei a pogai ke maua ne au te loto fakafetai. E aoga malosi foki a te fai mea fa‵kata. I te aso e tasi ne olo atu ei i te galuega talai, ne tu malie toku taugasoa, telā ne ūsu ne ia toku nofoga fakatekateka, o tusi ana mea. E seki leva kae ne teka ifo au, kae ne pokomālō atu au ki te koga e faka‵tu i ei a motoka. Ne ‵poi tokolua māua, kae i te taimi ne lavea ne māua me e seai se mea lasi ne tupu, ne ‵kata ei māua.

E uke ‵ki a mea i te olaga ne seki mafai ne au o fai. E taku ne au a mea konā ki fakamoemoega mō aso mai mua. E masani o ‵moe oku mata kae fakaataata faeloa ne au i toku “mafaufau” a folafolaga a te Atua e uiga ki te lalolagi fou. (2 Petelu 3:13) E aofia i mea konā a te mauaga o te malosi, toe mafai o sasale, kae fiafia katoatoa ki te olaga. E masaua faeloa ne au a pati a te tupu ko Tavita: “Talitonu ki te Aliki [ko Ieova]. Fakatuanaki ki a ia kae sa loto vāivāi.” (Salamo 27:14) E tiga eiloa ko gasolo aka faeloa o vāivāi malosi toku foitino, ne fai ne Ieova ke malosi au. E maua faeloa ne au a te malosi i oku vāivāiga.