Anitoni: Talofa Timi. Ko oko loa te gali ke toe fetaui tāua.

Timi: E gali ke toe fetaui tāua.

Anitoni: E isi ne lomiga ‵fou o Te Faleleoleo Maluga mo te Awake! konei ne puke mai ne au ma koe. E iloa ne au me ka fiafia malosi koe ki mataupu i loto i mekesini konei.

Timi: Fafetai. Ko ‵lei aka loa ke āsi mai koe penei me e isi saku fesili e fia fai atu ki a koe.

Anitoni: Fai koe, se a tau fesili?

Timi: E tasi te aso ne sau‵tala māua mo toku taugasoa i te galuega. Kae ne fai ne au ki ei e uiga ki mekesini kolā ne tuku mai ne koe, mo te ‵gali o mekesini konā. Kae ne fai mai a ia ke mo a e faitau au ki ei me i Molimau a Ieova e se tali‵tonu ki a Iesu. E tonu te mea tenā? Au ne fai ki toku taugasoa tenā me ka fesili atu ne au te mea tenei ki a koe māfai e toe āsi mai koe penei.

Anitoni: E fiafia au me ne fesili mai ne koe te mea tenā ki a au. Se mea gali ke fesili ‵tonu eiloa koe ki te tino e ‵tau o fesili ki ei. E mata, e isi aka foki se auala e mafai ei o iloa ne koe a mea e talitonu ki ei se tino, māfai e se fesili ‵tonu atu koe ki te tino tenā?

Timi: Tenā eiloa te mea ne mafaufau au ki ei.

Anitoni: A te ‵tonuga loa, e tali‵tonu katoatoa a Molimau a Ieova ki a Iesu. E tali‵tonu matou me i te fakaasiatuga o te fakatuanaki ki a Iesu e tāua ki te mauaga o te fakaolataga.

Timi: Tenā eiloa te mea ne mafaufau au ki ei, kae i te faimaiga a toku taugasoa me i a koutou e se tali‵tonu ki a Iesu, ne fia iloa ‵ki ne au me tonu te mea tenā io me ikai. E pelā me seki sau‵tala aka eiloa koe mo au ki ei muamua.

Anitoni: E ‵lei ki a koe ke fai‵tau tāua ki ne tusi faitau mai te Tusi Tapu kolā e faka‵mafa mai ei te tāua ke fakaasi atu te fakatuanaki ki a Iesu? A tusi fai‵tau konei e fakaaoga faeloa ne Molimau a Ieova i te galuega talai.

Timi: Io e ‵lei.

Anitoni: A te tusi muamua e gali ke fai‵tau ki ei ko pati eiloa a Iesu i te Ioane 14:6. A pati konei ko pati i te sau‵talaga ne fai ne Iesu mo se apositolo e tokotasi a ia. E fai mai penei: “Ne fai atu Iesu ki a ia: ‘Au ko te auala mo te munatonu mo te ola. E seai se tino e fano ki te Tamana manafai e se ui mai i a au.’” E ‵tusa mo te fuaiupu tenā, se a te auala fua e tasi e mafai ei o olo atu tatou ki te Tamana?

Timi: E auala i a Iesu.

Anitoni: E tonu koe. Kae tenā loa te mea e tali‵tonu ki ei a Molimau a Ieova. Ke fai atu ne au se fesili: Mai mea kolā e iloa ne koe e uiga ki te Atua, se a tau faka‵tau i o oi te igoa e ‵tau o fakaaoga ne tatou ke ui atu i ei a ‵tou ‵talo?

Timi: I te igoa o Iesu.

Anitoni: Ko ia loa tenā. Kae tenā loa te pogai e fai ei ne au aku ‵talo katoa e auala i te igoa o Iesu. Kae penā foki eiloa mo ‵talo a Molimau a Ieova katoa.

Timi: Tapa ko ‵lei aka loa ke iloa atu te mea tenā.

Anitoni: A te suā tusi faitau e mafai o onoono tāua ki ei ko te Ioane 3:16. E tāua ‵ki eiloa te fuaiupu tenā kae ko oti ne fai pelā me ko te fakatoetoega o tusi Evagelia katoa. Ko tena uiga kafai e puke ne koe a mea katoa kolā ne tusi e uiga ki te olaga o Iesu mo  tena galuega i te lalolagi kae fai ki se fuaiupu e tasi, tenei loa te fuaiupu e fetaui ‵lei ki ei. E fiafia koe ke faitau mai ne koe te fuaiupu tenā?

Timi: Ao. E fai mai penei: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.”

Anitoni: Fafetai. E a, e masani ‵lei koe mo te fuaiupu tenā?

Timi: Ao, ko lagona fakafia ne au, kae lavea sāle foki ne au i fakailoga mo faka‵pulaga i auala.

Anitoni: A te tusi faitau tenā e lauiloa ‵ki. Kafai e onoono faka‵lei ki ei, e matea ne koe i ei a pati a Iesu. Ana muna me ona ko te alofa o te Atua ko mafai ei o maua ne tino a te ola se-gata-mai—kae mafai fua o fai penā māfai tatou e a?

Timi: E fakatuanaki.

Anitoni: Ao. Ko te fakatuanaki ki te Tama e tokotasi, ko Iesu Keliso. Kae ko te manatu tenei—a te fakatuanaki ki a Iesu e ‵tala mai ei te auala ki te ola se-gata-mai—e fakaasi faka‵lei mai i te itulau e 2 o te mekesini tenā ne avatu ne au. E fai mai me e aofia i nisi pogai ne ‵lomi ei te mekesini ko Te Faleleoleo Maluga a te fakamalosi aka o “te fakatuanaki ki a Iesu Keliso, telā ne mate ko te mea ke maua ne tatou a te ola se-gata-mai kae telā ko pule mai nei e pelā me ko te Tupu o te Malo o te Atua.”

Timi: Kilo atu aka la. Tenā loa e fakaasi mai i loto i otou mekesini me i Molimau a Ieova e tali‵tonu ki a Iesu.

Anitoni: Ko ia loa tenā.

Timi: Kae kaia la e fai mai ei a tino me i a koutou e se tali‵tonu ki a Iesu?

Anitoni: Kāti e uke a pogai e fai mai ei latou penā. Kāti e fai atu a nisi tino penā ona ko mea ne lagona ne latou mai nisi tino. Io me kāti ne akoako latou ne olotou faifeau e uiga ki te manatu sē tonu tenā.

Timi: I toku mafaufau—me kāti e fai mai a nisi tino me e se tali‵tonu koutou ki a Iesu me e fakaigoa ne koutou a koutou ki Molimau a Ieova, kae e se ko Molimau a Iesu.

Anitoni: Kāti tenā foki te suā pogai.

Timi: Kaia e fai‵pati malosi ei koutou e uiga ki a Ieova?

Anitoni: Muamua la, e tali‵tonu matou me e tāua ‵ki ke fakaaoga te igoa totino o te Atua, ko Ieova—e pelā eiloa mo mea ne fai ne tena Tama ko Iesu. Ke mafaufau ki pati ne fai atu ne Iesu i tena ‵talo ki tena Tamana. E maua ne tāua i te Ioane 17:26. E mafai o faitau mai ne koe?

Timi: Ao. “Ko oti ne fakailoa atu ne au tou igoa ki a latou kae ka toe fakailoa atu ne au, ko te mea ke maua ne latou te alofa telā ne alofa mai ei koe ki a au a ko au ke ‵kau fakatasi foki mo latou.”

Anitoni: Fafetai. E lavea ne koe me ne fai mai Iesu me ne fakailoa atu ne ia te igoa o te Atua. Se a tau faka‵tau, kaia ne fai ei ne ia te mea tenā?

Timi: E se iloa ne au.

Anitoni: Io, e gali ke onoono tāua ki se isi tusi faitau ke tai maina tāua i te mea tenā. E mafaufau au ki te Galuega 2:21. E fai mai penei: “Kae ko tino katoa kolā e ka‵laga ki te igoa o Ieova ka ‵sao.” Kāti e lotomalie koe me e manakogina ke ka‵laga atu tatou ki te igoa o Ieova ko te mea ke ‵sao tatou, e se taumate ne iloa foki ne Iesu a te mea tenā.

Timi: E tonu eiloa.

Anitoni: Tela la, a te fakaolataga o ana soko se pogai e tasi ne tāua ‵ki ei ki a Iesu ke iloa ne latou a te igoa o te Atua kae ke fakaaoga foki ne latou. Kae tenā foki loa te pogai tāua e tasi e fai‵pati malosi ei matou e uiga ki a Ieova. E tali‵tonu matou me e tāua ‵ki ke fakailoa atu a te igoa totino o te Atua kae fesoasoni atu ki nisi tino ke ka‵laga atu ki te igoa tenā.

Timi: Kae kafai e se iloa ne tino a te igoa o te Atua io me fakaaoga ne latou, kae e iloa loa ne latou te tino e fakauiga latou ki ei māfai e fai‵pati latou e uiga ki te Atua.

Anitoni: E mafai o tonu te manatu tenā. Kae ko te fakailoamaiga ne ia ki a tatou a tena igoa totino, ko fai ne te Atua ke faigofie o fakapili‵pili atu tatou ki a ia.

 Timi: Se a te mea e fakauiga koe ki ei?

Anitoni: Ke mafaufau ki te mea tenei: E seki manakogina ke iloa ne tatou te igoa o Mose. E mafai fua o iloa ne tatou a ia e pelā me ko te tagata telā ne ‵vae ne ia te Tai ‵Kula io me ko te tagata telā ne tuku atu ki ei a Tulafono e Sefulu. E penā foki a Noa—kaia e ‵tau ei o iloa ne tatou tena igoa? E mafai fua o iloa ne tatou a ia e pelā me ko te tagata ne faite ne ia te vaka kae faka‵sao ne ia tena kāiga mo manu. Mai mea konā, ne mafai foki o fai atu tatou me i a Iesu Keliso ko te tagata telā ne fanaifo mai te lagi ke mate mō ‵tou agasala. E tonu au?

Timi: E tonu koe.

Anitoni: Ne fai ne te Atua ke iloa ne tatou a igoa totino o tino konā. E ‵kese eiloa māfai e iloa ne tatou a igoa totino o tino takitokotasi. E tiga eiloa e seki fetaui tatou mo Mose, Noa io me ko Iesu, kae ko te iloa ne tatou olotou igoa e fai ei ke fai a latou e pelā me ne tino ‵tonu ki a tatou.

Timi: Ne seki mafaufau au ki te mea tenā muamua, kae se manatu tonu eiloa!

Anitoni: Kae tenā foki te suā pogai e fakaaoga malosi ei ne Molimau a Ieova a te igoa totino o te Atua. E ma‵nako matou o fesoasoani ki tino ke ati aka te lotou fakatuanaki ki a Ieova te Atua e pelā me se Tino tonu telā e mafai o fakapili‵pili atu latou ki ei. I te taimi foki eiloa tenā, e faka‵mafa atu foki ne matou te tiute o Iesu ke maua i ei te fakaolataga. Kāti e mafai o fai‵tau tāua ki nisi tusi fai‵tau ke maina tāua i te manatu tenei.

Timi: Io ko ‵lei la.

Anitoni: Ne fai‵tau muamua tāua ki te Ioane 14:6. Masaua me ne fai mai a Iesu i a ia ko “te auala mo te munatonu mo te ola.” Ke foki tāua ki tua ki ana pati i te Ioane 14:1. E mafai o faitau mai aka ne koe a pati a Iesu i te vaega fakaoti o te fuaiupu tenā?

Timi: Io, e fai mai penei: “Fakatuanaki ki te Atua, kae fakatuanaki mai foki ki a au.”

Anitoni: Fafetai. E mata, e mafaufau koe me i te fakatuanaki tonu e aofia i ei a te filifiliga ke tali‵tonu fua ki a Iesu io me tali‵tonu fua ki a Ieova?

Timi: Ikai. Ne fai mai a Iesu me ‵tau o fakatuanaki ki tino e tokolua.

Anitoni: E tonu koe. Kae e talitonu au me e lotomalie koe me e se lava fua ke fai atu tatou me e fakatuanaki tatou ki te Atua mo Iesu. E ‵tau o ola tatou i se auala telā e fakamaoni atu ei me fakatuanaki tatou ki a lāua.

Timi: E tonu eiloa.

Anitoni: Kae e fakaasi atu pefea ne te tino me e fakatuanaki tonu a ia ki te Atua mo Iesu? Kāti e mafai o sau‵tala tāua ki te fesili tenā i te suā taimi. *

Timi: Ao, e fiafia au ki ei.