“A TE Atua se Agaga,” telā e se lavea ki mata o tino. (Ioane 4:24) Kae e lipoti mai te Tusi Tapu me ko oti ne lavea ne nisi tino a te Atua i se auala fakatusa. (Epelu 11:27) E mafai pefea o tupu te mea tenā? E mata, e mafai eiloa o matea ne koe a “te Atua telā e se lavea”?—Kolose 1:15.

Ke fakatusa ‵tou tulaga ki se tino telā ne ‵kivi mai te fanaumaiga. E mata, e taofi aka ne tena ‵kivi katoatoa a ia mai te malamalama i te lalolagi i ana tafa? Ikai. E maua ne se tino ‵kivi a fakamatalaga i auala kese‵kese kolā e mafai ei o malamalama a ia i tino, mea valevale, mo faifaiga i ana tafa. E fai mai se tagata ‵kivi e tokotasi: “A te matea atu e se maua i mata. E maua eiloa i te mafaufau.”

I se auala tai ‵pau, e tiga eiloa e se mafai o fakaaoga ne tatou ‵tou mata faka-te-foitino ke matea atu te Atua, e mafai o fakaaoga ne koe a te ‘mainaga i tou loto’ ke lavea ne koe a Ia. (Efeso 1:18) Mafaufau ki auala e tolu e mafai ne koe o fai penā.

E masani o ma‵losi atu a te lagona mo te fakapatele a te tino ‵kivi, kolā e fakaaoga ne ia ke matea ne ia a mea kolā e se mafai o matea ne ia. E penā foki loa, e mafai o fakaaoga ne koe a mea e mafai o fai ne te foitino ke iloilo aka ei ne koe a te lalolagi i ou tafa kae ke matea atu a te Atua sē lavea telā ne faite ne ia te lalolagi. “E lavea faka‵lei atu ana uiga sē lavea talu mai te faitega o te lalolagi, me e mafai o lavea atu i ana mea ne faite.”—Loma 1:20.

E pelā mo ‵tou fale. Ne faite fakapitoa eiloa te lalolagi mō tatou, ke se ‵nofo atu fua i ei kae ke fia‵fia foki ki te olaga. Kafai e lagona ne tatou a te agi gali mai o te matagi, te mafanafana o te la, te gali o se fuagalakau, io me ko te lagona atu o pese ‵gali a manu, e fia‵fia eiloa tatou. E mata, e se fakaasi mai ne meaalofa konei a te mafaufau mai, te alofa atafai mo te kaimalie o te ‵tou Mafuaga?

Ne a mea e mafai o tauloto ne koe e uiga ki te Atua mai mea e lavea ne koe i te iunivesi? E tasi mai i ei, e fakaasi mai i te lagi a te ‵mana o te Atua. E fakaasi mai ne fakamaoniga ‵fou i mea fakasaienisi me e se gata fua i te gasolosolo faeloa o lasi te iunivesi kae e gasolo loa o makini tena fanaka! I te taimi e onoono atu ei koe ki te lagi i te po, mafaufau: Se a te pogai o te malosi tenei e māfua mai i ei a te gasolosolo aka o lasi mo te makini o te iunivesi? E fai mai te Tusi Tapu me i te “‵mana” o te Mafuaga “e se faka‵tau eiloa i te malosi.” (Isaia 40:26) E fakaasi mai me i a ia “ko oko eiloa i te maluga”—ko te Tino telā e “‵mana.”—Iopu 37:23.

E fai mai se mātua o tamaliki ‵kivi e tokolua: “A te faipati ko te ‵toe vaega tāua eiloa ki mea e tauloto ne lāua. E fai atu ne koe ki a lāua a mea e lavea kae lagona, [kae] ke toka o fakamatala atu faeloa a mea katoa e matea ne koe. A koe ko lā mata.” E penā foki loa, faitalia me “e seai se tino kai lavea ne ia te Atua i se taimi e tasi,” a te Tama a te Atua, ko Iesu, telā e “nofo i te fatafata o te Tamana, e fakamatala mai ne ia a te Tamana.” (Ioane 1:18) E pelā me ko te mea muamua eiloa a te Atua ne faite mo te Tama fagasele eiloa e tokotasi, ne fai a Iesu mo fai ‵tou “mata” ke kilo‵kilo atu tatou ki mea i te lagi. A ia ko te ‵toe māfuaga ‵lei o fakamatalaga e uiga ki te Atua telā e se lavea.

Mafaufau ki nai mea kolā ne fakamatala mai e uiga ki te Atua ne Iesu, telā ne fakamāumāu ne ia te fia piliona o tausaga mo tena Tamana.

• Ne galue faeloa a te Atua e aunoa mo te fi‵ta. “A toku tamana e galue faeloa ke oko mai eiloa ki te taimi nei.”—Ioane 5:17.

• E iloa ne te Atua a mea kolā e manakogina ne tatou. “E  iloa ne te Atua a mea kolā e ma‵nako koutou ki ei a koi tuai o fakatagi atu koutou.”—Mataio 6:8.

• E tuku mai eiloa mo te kaimalie ne te Atua a mea mō tatou. “A te otou Tamana telā i te lagi, . . . e fakamaina ne ia a te la ki luga i tino ma‵sei mo tino ‵lei kae e faka‵to ne ia te vaiua ki luga i tino amio‵tonu mo tino sē amio‵tonu.”—Mataio 5:45.

• E fakatāua ne te Atua a tino katoa. “E a, e se ‵togi fua a manu eva fo‵liki e lua ki se sene e tasi? Kae e se mafai o to se manu e tasi i manu konā ki lalo i te laukele kae se iloa ne te otou Tamana. E iloa foki ne ia te aofaki katoa o laulu i otou ulu. Tela la, sa ma‵taku me e tāua atu fakafia koutou i lō manu eva fo‵liki e uke.”—Mataio 10:29-31.

A tino ‵kivi e masani o malamalama i manatu i auala kolā e ‵kese mai i tino kolā e ‵kite. E mafai o lavea ne se tino ‵kivi se ata, e se i se koga pouli e aunoa mo te la, kae i se koga ‵moko telā e malu mai i te mafanafana o te la. E pelā eiloa mo te sē mafai ne se tino telā e ‵kivi katoatoa o lavea se ata pouli io me se mainaga, e se mafai o iloa ‵lei ne tatou a Ieova i a tatou eiloa. Tela la, ne tuku mai ne Ieova se tino telā ka fakaasi mai ne ia Ana uiga mo ana kilokiloga i se auala ‵lei katoatoa.

A te tino tenā ko Iesu. (Filipi 2:7) Ne seki faipati mai fua a Iesu e uiga ki tena Tamana kae ne fakaasi mai foki ne ia ki a tatou me ko te Atua se vaegā tino pefea. Ne fesili atu a te soko o Iesu, ko Filipo: “Te Aliki, fakaasi mai ki a matou te Tamana.” Ne tali atu a Iesu: “A te tino telā ko kilo mai ki a au ko kilo foki ki te Tamana.” (Ioane 14:8, 9) Ne a mea e mafai o “lavea” ne koe e uiga ki te Tamana e auala i faifaiga a Iesu?

A Iesu ne loto alofa, loto maulalo, kae uiga faigofie. (Mataio 11:28-30) Ko ana uiga ‵gali ne fai ei a tino ke olo atu ki a ia. Ne pokotia a lagonaga o Iesu i logo‵maega o nisi tino, kae ne fiafia foki a ia māfai e fia‵fia latou. (Luka 10:17, 21; Ioane 11:32-35) I te taimi e faitau io me e fakalogologo ei koe ki tala i te Tusi Tapu e uiga ki a Iesu, taumafai ke aofia ou lagonaga i ei kae ke fakaataata i tou mafaufau me se mea tonu eiloa. Kafai e mafaufau ‵loto koe ki faifaiga a Iesu ki tino, ka mafai o matea faka‵lei atu ne koe a uiga ‵gali o te Atua kae ka fia fakapilipili atu ei ki a Ia.

A te mafaufau ki te auala ne fakafesagai atu ei se tino ‵kivi ki te lalolagi, e fai mai se tino tusitala e tokotasi: “E maua takitatasi ne ia a fakamatalaga, mai i auala kese‵kese (patele, ‵sogi, lagona, mo nisi mea penā), kae e tuku fakatasi ne ia a fakamatalaga konā, ko maua ei ne ia te ata kātoa.” E penā foki loa, i te taimi e onoono ei tatou ki mea ne faite ne te Atua, fai‵tau tatou ki mea ne fai mai ne Iesu e uiga ki tena Tamana, kae iloilo aka te auala ne fakaasi mai ei ne Iesu a uiga o te Atua, ka maua ne tatou se ata gali kātoa o Ieova. Ko momea aka ei tena fai mo fai se tino tonu ki a koe.

A Iopu, telā ne ola i aso mua, ne fai foki penā. I te taimi muamua ne faipati atu a ia mo te “sē malamalama.” (Iopu 42:3) Mai tua o te mafaufau faka‵lei ki mea fakaofoofogia ne faite ne te Atua, ne fakaosofia ei a Iopu ke fai atu: “Ne iloa ne au a koe i tala a tino, kae nei ko lavea eiloa ne au koe ki oku mata.”—Iopu 42:5.

E mafai foki o fai koe penā. ‘Kafai e tautali koe i a ia, kae ka talia ne Ieova a koe.’ (1 Nofoaiga Tupu 28:9) Ka fia‵fia eiloa a Molimau a Ieova ke fesoasoani atu ki a koe i te ‵sala atu ke maua a te Atua telā e se lavea.