Kamalielu: Ko oko eiloa i toku fiafia ke toe fetaui tāua, e Sioni. E olioli faeloa au ki te taimi e fai ei ‵ta akoga faka-te-Tusi Tapu i vaiaso takitasi. * E a mai koe?

Sioni: Au e ‵lei fua fakafetai.

Kamalielu: Fakafetai me e malosi fua koe. A te ‵toe taimi ne vau ei au, ne fai‵pati eiloa tāua ki te pogai e fai atu ei a Molimau a Ieova, me i te Malo o te Atua ne kamata o pule mai i te 1914. * I ‵ta sau‵talaga ne maua ne tāua se fakamatalaga tāua i se valoaga i te mataupu e 4 o te tusi ko Tanielu i te Tusi Tapu. E mata, e masaua ne koe me se a te mea e fakaasi mai i ei?

Sioni: Ko te moemiti o Nepukanesa e uiga ki te lakau lasi.

Kamalielu: Ko ia eiloa tenā. I te moemiti o Nepukanesa ne lavea ne ia se lakau lasi ‵ki telā e oko atu ki te lagi. Ne lagona ne ia te avefekau a te Atua e fakatonu atu ke ‵kati ki lalo a te lakau tenā, kae ke tuku penā tena tafito i te laukele. Mai tua o se vaitaimi o ‘taimi e fitu,’ ka toe ola aka te lakau tenā. Ne sau‵tala foki tāua ki vaega e lua o te fakataunuga o te valoaga tenā. * E mata, e masaua ne koe a te vaega muamua o te fakataunuga?

Sioni: Se mea eiloa ne tupu ki a Nepukanesa, ne? Ne fakavalevale eiloa tou tagata mō se fitu tausaga.

Kamalielu: Ko ia loa tenā. Ona ko te fakavalevale o Nepukanesa mō se vaitaimi, ne taofi malie aka ei tena pulega. Kae ko te fakataunuga tai lasi atu o te valoaga, ko te taofiga o te pulega a te Atua mō se vaitaimi o taimi e fitu. E pelā mo te mea ne lavea atu ne tāua, ne kamata eiloa a taimi e fitu ki te fakamaseiga o Ielusalema i te 607 T.L.M. Mai te taimi tenā o vau ki mua, ne seki toe ai ne tupu i te lalolagi ne mafai o sui ne latou a te pulega a Ieova te Atua ki luga i ana tino. Kae i te fakaotiga o taimi e fitu, ka fakasopo aka ne te Atua se Pule fou ki luga i ana tino—se tino mai te lagi. I nisi tugapati, ka fakamailoga eiloa a te gataga o taimi e fitu ki te kamataga o te pulega a te Malo faka-te-lagi o te Atua. Nei la, ko oti ne sau‵tala tāua ki te taimi ne kamata ei a taimi e fitu. Kafai ko iloa ne tāua te leva o te taimi tenā ko mafai foki o iloa ne tāua te taimi ne kamata ei o pule mai te Malo o te Atua. E a, e maina koe?

Sioni: Ao, ko oko eiloa te gali aka ke toe mafau‵fau ki manatu katoa konei.

Kamalielu: Gali. Ke na sukesuke ‵loto atu nei tāua ki te leva o taimi e fitu. Ne fatoa oti ne faitau au ki te mataupu tenei ko te mea ke toe fakamasaua mai a manatu tāua. Ka taumafai eiloa au ki te ‵toe mea e mafai ne au o fakamatala atu.

Sioni: ‵Lei la.

Kamalielu: I te fakataunuga muamua o te valoaga telā ne aofia ei a Nepukanesa, ne fakasino atu eiloa a taimi e fitu ki te fitu tausaga. A ko te fakataunuga tai lasi atu telā e aofia i ei te Malo o te Atua, e ‵tau eiloa o leva atu a taimi e fitu i lō te fitu tausaga.

Sioni: Kaia?

Kamalielu: A te pogai e tasi, masaua me i taimi e fitu ne kamata i te fakamaseiga o Ielusalema i te 607 T.L.M. Tela la, kafai e kamata o lau aka ne tāua a tausaga e fitu mai te taimi tenā, ko oko atu ei tāua ki te tausaga ko te 600 T.L.M. Kae e seai eiloa se mea tu ‵kese ne tupu i te tausaga tenā e uiga loa ki te pulega a te Atua. I tafa i ei, i senitenali fakamuli ifo i te taimi ne nofo ei a Iesu i te lalolagi nei, ne fakaasi mai ne ia me seki oti atu a taimi e fitu.

Sioni: Ao e tonu, ko masaua nei ne au a te mea tenā.

Kamalielu: Tela la, i lō te fakauiga ki tausaga ‵tonu, e ‵tau eiloa o fakasino atu a taimi e fitu ki se vaitaimi leva.

Sioni: E pefea tena leva?

Kamalielu: A te tusi i te Tusi Tapu ko Fakaasiga telā e isi sena sokoga ki te tusi ko Tanielu e fesoasoani mai ke iloa aka ne tatou a te leva o taimi e fitu. E fakaasi mai ei a te tolu mo te āfa taimi telā e ‵tusa mo te 1,260 aso. * Tela la, a taimi e fitu—e tapolo te aofaki o te tolu mo te āfa taimi—telā e iku atu ki te 2,520 aso. E a, e maina koe?

Sioni: Ao, e maina au. Kae e se maina au me fakaasi mai pefea ne te mea tenei, me ne kamata o pule mai te Malo o te Atua i te 1914.

Kamalielu: Kāti e ‵lei ke onoono tāua me ‵soko pefea a mea konei. I nisi taimi i te Tusi Tapu, e sui a te aso ki te tausaga. * Kafai e fakagalue aka ne tāua a te faifaiga tenā ke sui a aso ki tausaga, ko tena uiga, a taimi e fitu e ‵tusa mo te 2,520 tausaga. Kafai e kamata o lau aka a te 2,520 tausaga mai te 607 T.L.M., ko oko atu ei tāua ki te tausaga ko te 1914. * Tenā te auala e fai atu ei tatou me i te 1914 ko te tausaga ne oti atu ei a taimi e fitu, ko te kamataga o te Pulega a Iesu e pelā me ko te Tupu i te Malo o te Atua. Kae sili atu la i ei, e isi ne mea fakaofoofogia ne ‵tupu i te lalolagi talu mai i te 1914—ko mea kolā ne folafola mai i te Tusi Tapu me e ‵tau o ‵tupu i aso fakaoti.

Sioni: Ne a vaegā mea e ‵tau o ‵tupu?

Kamalielu: Ke onoono ki pati a Iesu kolā ne fakamau ki lalo i te Mataio 24:7. Ne fai mai a Iesu e uiga ki te taimi ka kamata ei tena pulega i te lagi: “Ka fai taua te suā atufenua ki te suā atufenua, mo te suā malo ki te suā malo. Ka oko mai a oge meakai mo mafuie ki koga katoa.” Onoono la me ne fai mai a Iesu me i te vaitaimi tenā ka isi ne oge mea‵kai mo mafuie. E mata, ne lavea ‵lei ne te ‵tou lalolagi a vaegā fakalavelave penā i te fia o senitenali ko ‵teka atu nei?

Sioni: E tonu.

Kamalielu: Ne fakamatala mai foki ne Iesu i te fuaiupu tenei, me ka isi ne taua i te taimi e fai ei a ia mo fai te Tupu i te Malo o te Atua. Kae e fakamatala mai foki i te tusi ko Fakaasiga i te Tusi Tapu me ka se ‵tupu fua a taua i se koga e tasi kae ka ‵tupu foki a taua kolā e pokotia i ei te lalolagi kātoa i te taimi tenei o te gataga. * E mata, koi masaua i a koe te tausaga ne tupu ei te taua muamua a te lalolagi?

Sioni: I te 1914, ko te tausaga foki eiloa telā ne fai mai koe me ne kamata ei a te pulega a Iesu! Au seki mafaufau aka eiloa penei muamua ki te mea tenei.

 Kamalielu: Kafai e tuku fakatasi aka ne tāua a fakamatalaga konei—te valoaga e uiga ki taimi e fitu e penā foki mo nisi valoaga i te Tusi Tapu e uiga ki taimi fakaoti—e fetaui ‵lei eiloa. Ne iloa aka ne Molimau a Ieova me ne kamata o pule mai a Iesu i te Malo o te Atua i te 1914 kae ko te taimi foki eiloa tenā ne kamata ei a aso fakaoti. *

Sioni: Tenei eiloa koi taumafai au ke malamalama i ei.

Kamalielu: Ao e maina katoatoa au i te feitu tenā. E pelā mo aku pati muamua, ne tai leva foki loa te taimi ne taumafai ei au ke malamalama katoatoa foki i ei. Kae ko te ‵toe mea tāua, ne fakamoemoe au me ko lavea ‵lei ne koe me e tiga eiloa e se taku tonu mai i teTusi Tapu, a te tausaga ko te 1914, ne fakavae eiloa ne Molimau a Ieova olotou talitonuga ki te Tusi Tapu, e uiga ki te tausaga tenā.

Sioni: Ao, me tenā foki loa te pogai e gali ei ki a au a koe—me faitalia me ne a au fakamatalaga e fai, e fakaaoga faeloa ne koe se tusi siki ke ‵lago atu ki ei. Kae e se ko ou manatu totino eiloa. Ne mafaufau au ki te pogai ne fakaukeuke katoa ei penei a fakamatalaga. Kae kaia fua la te Atua e se na fakaasi mai ne ia i te Tusi Tapu me i te 1914 ko te tausaga telā ne kamata ei a Iesu o pule mai i te lagi?

Kamalielu: Ko se faka‵tau eiloa i te gali o tau fesili tenā, e Sioni. A te ‵tonuga loa e uke a mea i te Tusi Tapu e se fakamatala katoatoa mai. Tela la, e manakogina a taumafaiga e uke ke maina a tino i ei? Kāti e ‵lei ke fai‵pati tāua ki te mea tenā i te suā taimi e asi mai ei au.

Sioni: Ao e gali ki a au te manatu tenā.