O NA ko te mea ko leva ne fakaaoga a te tugapati ko te “antichrists” [fili o Keliso] e pelā me se fakailoga o mea katoa mai i tino ma‵luga ki ata tamunei, tela la, se mea masani ke fesili atu: Ko oi te fili o te Keliso? E mata, e pokotia tatou i aso nei i te tugapati tenei? E mautinoa eiloa me i te koga e ‵tau o kamata o ‵sala atu tatou ki ei mō te fakamatalaga tonu o te fili o te Keliso, ko te Tusi Tapu, telā e sae mai ei fakalima taimi a te tugapati tenā.

A te tino tusitala e tokotasi fua o te Tusi Tapu ne fakaaoga ne ia te pati ko te “fili o te Keliso” ko te apositolo ko Ioane. Ne fakamatala mai pefea ne ia a te fili o te Keliso? Onoono la ki pati konei i tena tusi muamua telā e taku ki tena igoa: “Aku tama, ko te itula fakaoti tenei, e pelā eiloa mo te mea ko oti ne lagona ne koutou me ka oko mai te fili o Keliso. E tokouke a fili o Keliso ko oti ne oko mai i te taimi nei. Ko iloa ei ne tatou me ko oko mai te itula fakaoti. Ne olo keatea latou mai i a tatou, me i a latou e se ne tino o tatou. . . . Ko oi te tino loi, e se ko ia telā e fakafiti ne ia i a Iesu ko te Keliso? Tenei eiloa te fili o Keliso, ko te tino telā e fakafiti ne ia te Tamana mo te Tama.”—1 Ioane 2:18, 19, 22.

Ne a mea e tauloto ne tatou mai i pati konā? Ne taku mai ne Ioane me “e tokouke a fili o Keliso,” telā e fakaasi mai i ei me i te fili o te Keliso, e sē se tino tokotasi, kae se potukau o tino. E fakasalalau atu ne tino io me ko fakapotopotoga a fakamatalaga ‵loi, kolā e fakafiti i ei a te manatu me i a Iesu ko te Keliso io me ko te Mesia, kae taumafai ke ‵fuli ‵se ne latou a te fesokotakiga o te Atua mo Tena Tama, ko Iesu Keliso. Ko latou kolā e aofia i te fili o te Keliso e fai atu me i a latou ko te Keliso io me ko ana sui, kae ona ko te mea “ne olo keatea latou mai i a tatou,” ne ‵seke atu latou mai i akoakoga ‵tonu i te Tusi Tapu. E se gata i ei, ne sae aka a te potukau tenei i te taimi ne tusi mai ei ne Ioane tena tusi, i “te itula fakaoti,” kāti ko te gataga o taimi o te kau apositolo.

Ne a foki a mea ne tusi mai ne Ioane e uiga ki te fili o Keliso? Ne fakailoa mai a ia ke fakaeteete i pelofeta ‵loi: “A fakamatalaga katoa kolā e fakaasi ‵tonu mai i a Iesu Keliso ko oti ne vau i te foitino e māfua mai eiloa i te Atua. Kae ko fakamatalaga katoa kolā e se fakaasi ‵tonu mai e uiga ki a Iesu e se māfua mai i te Atua. E se gata i ei, konei eiloa a fakamatalaga a te fili o Keliso telā ne lagona ne koutou me ka oko mai, kae tenei ko leva ne nofo i te lalolagi.” (1 Ioane 4:2, 3) Kae i te lua o ana tusi, ne toe fai atu ne Ioane a te manatu tenei: “E tokouke a tino faitogafiti ko oti ne oko mai ki te lalolagi, ko tino kolā e se tali‵tonu i a Iesu ne vau i te foitino. Tenei eiloa te tino faitogafiti mo te fili o Keliso.” (2 Ioane 7) E manino i ei, ne iloa ‵lei ne Ioane me i te fili o te Keliso ko tino katoa kolā e fakasalalau atu ne latou mo te iloa tonu a fakamatalaga ‵se fakalotu e uiga ki a Iesu Keliso mo akoakoga a Iesu.

Ko leva ne fakailoa atu ne Iesu Keliso ki ana soko a koi tuai o tusi mai a Ioane e uiga ki vaegā tino fakalotu fakaloiloi penā: “Ke fakaeteete koutou i pelofeta ‵loi kolā e o‵mai ki a koutou e pelā me ne mamoe, kae i loto i a latou e fe‵kai eiloa e pelā me ne kuli vao.” (Mataio  7:15) Ne fakailoa atu a te apositolo ko Paulo ki Kelisiano i Tesalonia ke fakaeteete: “Ke mo a ma fakaloiloi koutou ne se tino i so se feitu, me e se mafai o oko mai te aso o Ieova seiloga ke oko muamua mai te aposetasi mo te fakaasimaiga o te tino solitulafono, telā ko te tama o te fakaseaiga.”—2 Tesalonia 2:3.

Tela la, i te senitenali muamua, ko leva ne gasue‵sue a pelofeta ‵loi mo aposetate, i te lotou taumafai ke fakavāivāi atu ki te fakapotopotoga Kelisiano. Ko latou katoa kolā ne aofia i te fakasalalauatuga o loi mo fakamatalaga ‵se fakalotu e uiga ki a Iesu Keliso mo ana akoakoga, ne aofia katoa i te tugapati a Ioane ko “te fili o te Keliso.” Ne fakaasi mai te kilokiloga a Ieova ki a latou i te taimi ne fakasino atu ei a Paulo ki a latou e pelā me ko “te tama o te fakaseaiga.”

Kae e a i aso nei? A tino mo fakapotopotoga kolā e aofia i te fili o te Keliso koi ‵teke atu eiloa latou ki a Keliso mo ana akoakoga. E fakasalalau atu ne latou mo te iloa tonu a loi mo fakamatalaga ‵se mo te fakamoemoega ke faka‵numi aka ei a te mea tonu e uiga ki te Tamana, ko Ieova te Atua, mo Tena Tama, ko Iesu Keliso. E maua ne matou a pogai ‵lei ke fakaeteete i vaegā fakamatalaga fakalotu ‵se penā. Ke onoono aka tatou ki fakaakoakoga e lua.

I te fia o senitenali, ne fakamalosi aka faeloa ne lotu a te akoakoga o te Tolutasi, telā e fai atu i ei me e fai eiloa te Tamana mo te Tama mo fai se tino e tokotasi kolā e ‵pau. E faka‵numi kae ‵funa aka ne te fili o Keliso a fakamatalaga ‵tonu e uiga ki a Ieova te Atua mo Iesu Keliso. E faka‵lave ne te akoakoga loi tenei a tino loto fakamaoni mai te tau‵tali atu ki a Iesu Keliso mo te fakapili‵pili atu ki te Atua, e pelā mo te mea e fakamalosi atu te Tusi Tapu ke fai ne latou.—1 Kolinito 11:1; Iakopo 4:8.

E fakaopoopo atu foki ne lotu a te ‵numi o tino mai te fakamalosi aka ne latou a te fakaaogaga o ‵fuliga o Tusi Tapu kolā ko oti ne ave keatea mai i ei a te igoa totino o te Atua, ko Ieova. E fai ne latou te mea tenei faitalia a te manatu tonu me toeitiiti ko kātoa te 7,000 taimi e sae mai ei te igoa tenā o Ieova i te ‵kopi muamua eiloa o te Tusi Tapu. Se a te mea ne iku mai i ei? Ne gasolo aka eiloa o galo atu a te fakamatalaga tonu e uiga ki te Atua tonu i te akoakoga loi tenā.

I te suā feitu, a te iloa o te igoa o te Atua, ko Ieova, ko oti ne fesoasoani atu ki tino tapuaki mo te loto fakamaoni ke momea aka te lotou fakapili‵pili atu ki te Atua. Tenā eiloa te mea ne tupu ki a Richard, telā ne masaua ne ia se sau‵talaga ne fai ne latou mo Molimau a Ieova e tokolua. “Ne fakaasi mai ne lāua mai te Tusi Tapu a te igoa o te Atua tonu ko Ieova,” ko te fakamatalaga a Richard. “Ne ofo au i te manatu me e isi se igoa totino o te Atua, se mea telā ne seki lagona aka eiloa ne au muamua.” Mai te taimi tenā o vau ki mua, ne fai ne ia a ‵fuliga i tena olaga ke fakafetaui aka ki tulaga o te Tusi Tapu kae ke fakafiafia atu foki ki a Ieova. “A te iloa atu o te igoa o te Atua ne fesoasoani mai ke ati aka se fesokotakiga pili mo ia.”

I te fia o senitenali, ne taofi eiloa ne te fili o Keliso a te fia miliona o tino i se koga pouli i te feitu faka-te-agaga. Kae mai te sukesuke ki te Muna a te Atua, ko te Tusi Tapu, ne mafai eiloa o iloa ne tatou a te fakamatalaga tonu e uiga ki te fili o Keliso kae fakasaoloto ei tatou mai i loi mo fakamatalaga ‵se fakalotu a te fili o Keliso.—Ioane 17:17.