A te Tusi Tapu e sē se tusi masani. E aofia i ei a pati fakatonutonu mai te ‵tou Mafuaga. (2 Timoteo 3:16) E mafai o fesoasoani malosi mai a te fekau i ei ki a tatou. A te ‵tonuga loa e fai mai te Tusi Tapu: “Te muna a te Atua e ola kae ‵mana.” (Epelu 4:12) E isi sena ‵mana ke fai ei ‵tou olaga ke momea aka te ‵lei i auala tāua e lua—e tuku mai ei a fakatakitakiga mō ‵tou olaga i aso takitasi kae fesoasoani mai ke iloa ne tatou a te Atua mo ana folafolaga.—1 Timoteo 4:8; Iakopo 4:8.

Ke momea aka nei te ‵lei o tou olaga. E mafai o fesoasoani  atu te Tusi Tapu ke momea aka te ‵lei o tou olaga totino. E maua i ei a manatu fesoasoani e uiga ki mea konei.

• Fesokotakiga mo nisi tino.—Efeso 4:31, 32; 5:22, 25, 28, 33.

• Te malosi ‵lei i te feitu tau lagonaga mo te feitu faka-te-foitino.—Salamo 37:8; Faataoto 17:22.

• Tulaga i mea tau amioga.—1 Kolinito 6:9, 10.

• Te ola ‵lei i mea tau tupe.—Faataoto 10:4; 28:19; Efeso 4:28. *

Ne loto fakafetai malosi se tauavaga talavou i Asia ki te tāua o pati fesoasoani i te Tusi Tapu. E pelā mo tauavaga ‵fou e tokouke, ne faigata ki a lāua ke fakafetaui aka ki uiga o te suā tino mo te faiga o fesokotakiga ‵lei. Kae ne kamata o fakagalue aka ne lāua a lā mea ne faitau i te Tusi Tapu. Ne a mea ne iku mai i ei? Ne fai mai a Vicent, te avaga tagata: “A mea ne faitau ne au i te Tusi Tapu ne fesoasoani mai ke iloa ne au o fakafesagai atu ki tulaga faiga‵ta i te mā olaga avaga i se auala alofa. A te ola e ‵tusa mo mea e fai mai i te Tusi Tapu ne fai ei ke maua ne māua se olaga fiafia.” Ne lotomalie foki tena avaga ko Annalou ki ei, ana muna: “A te faitau ki fakaakoakoga i te Tusi Tapu ne fesoasoani mai ki a māua. Nei la, ko fiafia malosi au kae lotomalie au ki te mā olaga avaga mo mā fakamoemoega i te olaga.”

Ke iloa te Atua. I tafa o ana pati e uiga ki te olaga avaga, ne fai mai foki a Vicent: “Mai te faitau ki te Tusi Tapu, ko momea aka nei toku pili atu ki a Ieova i lō aso mua.” E fakaasi mai i te mea ne lavea ne Vicent se manatu tāua—e mafai o fesoasoani mai te Tusi Tapu ke fakamasani koe mo te Atua. Mai te fai penā, ka se maua fua ne koe a mea aoga mai i ana pati fesoasoani, kae ka momea aka foki te iloa ‵lei ne koe a ia pela me se taugasoa. Kae ka lavea ne koe me e fakaasi mai ne ia a fakamatalaga likiliki e uiga ki se olaga tai ‵lei atu i aso mai mua, se taimi telā ka mafai o maua ne koe “te ola tonu”—telā ka tumau ki te se-gata-mai. (1 Timoteo 6:19) Tenā te fakamoemoega e tuku mai i ei kae e se maua i so se isi tusi.

Kafai ko fakatoka koe o faitau ki te Tusi Tapu kae tumau i ei, e mafai foki o maua ne koe a mea aoga konā—ka momea aka nei te ‵lei o tou olaga kae ka iloa foki ne koe te Atua. Kae i te taimi e faitau ei koe ki te Tusi Tapu, kāti ka uke au fesili. Kae kafai e penā loa, masaua te fakaakoakoga ‵lei a te ofisa Aitiope telā ne ola i se 2,000 tausaga ko ‵teka. Ne uke ‵ki ana fesili e uiga ki te Tusi Tapu. I te taimi ne fesili atu ei me e mata, e malamalama a ia i ana mea ne faitau, ne tali atu a ia: “E mafai pefea o malamalama au, māfai e seai se tino e fesoasoani mai ki a au?” * Mai konā ne talia ei ne ia mo te fiafia a te fesoasoani mai i se tino telā ne fetaui ‵lei ke akoako atu ne ia te Tusi Tapu, ko Filipo, se soko mua o Iesu. (Galuega 8:30, 31, 34) E pelā eiloa mo te fakaakoakoga tenei, kafai e fia iloa ne koe a mea e uke atu e uiga ki te Tusi Tapu, ko ‵kami atu koe ke faka‵fonu te pepa tenei i te itaneti i te www.mr1310.com io me tusi atu ki se fakatuatusi telā e pili atu ki a koe i te mekesini tenei. E mafai foki o fesokotaki atu koe ki se Molimau a Ieova telā e pili ki a koe io me āsi atu ki se Fale Tapuaki i te kogā koga e nofo koe i ei. Kaia e se faitau ei koe ki te Tusi Tapu i te aso nei ko te mea ke takitaki atu ei koe ki se olaga tai ‵lei atu?