Mmebusɛm 1:1-33
1 Israel hene+ Solomon, Dawid ba no mmebusɛm ni:+
2 Ɛwɔ hɔ sɛ nnipa mfa nsua* nyansa+ ne nteɛso,Na wɔmfa nte anyansasɛm ase;
3 Na wɔmfa nnya nteɛso+ a ɛma nhumu,Na wɔmfa nyɛ adetrenee,+ mmu atɛn pa,*+ na wɔnyɛ nea ɛteɛ;*
4 Na nea onni suahu mfa nsua nyansa,+Na ɛmma aberante* nnya nimdeɛ, na ɔmfa adwene.+
5 Onyansafo tie, na osua nneɛma pii;+Onipa a ɔwɔ ntease* benya akwankyerɛ pa,+
6 Na ama wate ɛbɛ ne kasakoa ase,Na wate anyansafo nsɛm ne akasabebu* ase.+
7 Yehowa suro, ɛno ne nimdeɛ mfiase.+
Nkwaseafo nko ara na wɔmfa nyansa ne nteɛso nyɛ hwee.+
8 Me ba, tie wo papa nteɛso,+Na mpo wo maame akwankyerɛ.*+
9 Ɛte sɛ nhwiren abotiri fɛfɛɛfɛ a ɛbɔ wo ti,+Ne kɔnmuade a ɛyɛ fɛ wɔ wo kɔn mu.+
10 Me ba, sɛ abɔnefo pɛ sɛ wɔdaadaa wo a, mpene.+
11 Wɔbɛka sɛ: “Bra ma yɛnkɔ.
Ma yenkohintaw na yenhwie mogya ngu.
Yɛbɛtetɛw wɔn a wɔnyɛɛ hwee no, na yɛadi wɔn bɔne kwa.
12 Yɛbɛmemene wɔn anikan sɛnea Ɔdamoa* yɛ no,Yɛbɛmene wɔn koraa te sɛ nea wɔrekɔ amoa mu.
13 Ma yennye wɔn agyapade a ɛsom bo nyinaa;Yɛde nneɛma a yebenya no* bɛhyɛ yɛn afi ma.
14 Bra bɛka yɛn ho,*Na yɛbɛkyɛ nea yɛawia no pɛpɛɛpɛ.”*
15 Me ba, nni wɔn akyi.
Hwɛ yiye na wo nan ankɔfa wɔn kwan so,+
16 Efisɛ wɔn nan tu mmirika kodi bɔne;Wɔde ahoɔhare kɔka mogya gu.+
17 Sɛ wode atena sum anomaa afiri ma ohu a, ɛyɛ kwa.
18 Ɛno nti na wohintaw hwie mogya gu no;Wɔtetɛw gye nkurɔfo nkwa* fi wɔn nsam.
19 Saa ara na wɔn a wɔpɛ mfaso bɔne no akwan te,Ɛno ara na ɛbɛma wɔn nkwa* afi wɔn nsa.+
20 Nyansa*+ teɛm wɔ mmorɔn so.+
Ɛma ne nne so daa wɔ mmɔnten so.+
21 Ɛteɛm wɔ abɔnten kɛse so.
Ɛka ne nsɛm wɔ kurow apon ano sɛ:+
22 “Agyimifo, mobɛpɛ agyimisɛm akosi da bɛn?
Na mo, fɛwdifo, mo ani begye fɛwdi ho akosi da bɛn?
Na mo, nkwaseafo, mubekyi nimdeɛ akosi da bɛn?+
23 Sɛ mekasa kyerɛ mo a, muntie na monsesa mo akwan.+
Moyɛ saa a, mehwie me honhom ama mo,Na mama moahu me nsɛm.+
24 Mefrɛe, na moantie,Meteɛɛ me nsa, na obiara ammua.+
25 Moamfa m’afotu biara anyɛ hwee,Na bere a mekasa kyerɛɛ mo no, moantie.
26 Ɛno nti me nso, sɛ muhu amane a mɛserew mo,Na nea musuro ba mo so a, medi mo ho fɛw,+
27 Sɛ nea musuro ba mo so sɛ ahum,Na mo amanehunu ba sɛ mframa a ano yɛ den,Na ɔhaw ne abɛbrɛsɛ ba mo so a, medi mo ho fɛw.
28 Saa bere no wɔbɛkɔ so afrɛ me, nanso merennye so;Wɔbɛhwehwɛ me denneennen, nanso wɔrenhu me,+
29 Efisɛ wokyii nimdeɛ,+Na wɔampɛ sɛ wosuro Yehowa.+
30 Wɔantie m’afotu,Na me kasakyerɛ nso, wɔamfa emu biara anyɛ hwee.
31 Enti wobetwa wɔn nneyɛe so aba,*+Na wɔn ara agyinatu* bɛfono wɔn.
32 Na agyimifo atuatew bekum wɔn,Na nkwaseafo akokoduru bɔne bɛsɛe wɔn.
33 Nea otie me no de, ɔbɛtena hɔ komm,+Na ne ho adwo no a onsuro mmusu.”+
Ase Hɔ Nsɛm
^ Nt., “nhu.”
^ Anaa “atɛn turodoo.”
^ Anaa “nea ɛda ne kwan mu.”
^ Anaa “ɔbabun.”
^ Anaa “Ɔbadwemma.”
^ Anaa “aborɔme.”
^ Anaa “mmara.”
^ Anaa “Sheol,” kyerɛ sɛ, adasamma damoa. Hwɛ Nkyerɛkyerɛmu afã hɔ.
^ Anaa “asade.”
^ Anaa “Fa wo ntama bɛbɔ yɛn de ano.”
^ Anaa “Na yɛn nyinaa benya sika kotoku baako.”
^ Anaa “akra.”
^ Anaa “kra.”
^ Anaa “Nokware nyansa.”
^ Nt., “wobedi so aba.”
^ Anaa “nhyehyɛe; tirimbɔ.”
