Wokɔ aman pii so a, sɛnea wim ayɛ hyehyeehyew no, yenhuu bi saa da. Ɔhyew no nso akɔfa ɔhaw bebree aba. Wo de, hwɛ amanneɛbɔ a edidi so yi:

•   “Efi bere a nkurɔfo fii ase de mfiri susuw sɛnea wim yɛ hyew fa no, mfe 174 ni. Efi saa bere no ara besi nnɛ, June bosome biara nni hɔ a na emu yɛ hyew sen June a etwaam yi.”—National Oceanic and Atmospheric Administration, U.S. Department of Commerce, July 13, 2023.

•   “Sɛnea wim ayɛ hyew wɔ Italy, Spain, France, Germany, ne Poland no, ɛyɛ hu. Wokɔ supɔw a yɛfrɛ no Sicily ne nea yɛfrɛ no Sardinia a, ɛhɔ koraa de ɛkyɛn. Wohwɛ sɛnea ɔhyew no rekɔ soro wɔ hɔ no a, anhwɛ a baabi a ɛbɛkɔ akodu no, nea yɛbɛka ara ne sɛ wei de, yenhuu bi saa da wɔ Europe.”—European Space Agency, July 13, 2023.

•   “Seesei, wim yɛ ara na ɛreyɛ hyew. Sɛ wim yɛ hyehyeehyew saa nso a, ɛreyɛ ara ni na nsu retɔ. Ɛretɔ nso a, ɛtɔ denneennen. Enti anhwɛ a nsuyiri a ɛde bɛba no, ɛbɛyɛ hu paa.”—Stefan Uhlenbrook; ɔyɛ adwuma wɔ World Meteorological Organization, na ɔno ne panyin paa wɔ baabi a wɔsua nsu ho ade. Ɔde asɛm yi too gua July 17, 2023.

 Sɛ wote amanneɛbɔ a ɛtete sei a, ɛyɛ a ɛma ehu tɔ wo so anaa? Hwɛ nea Bible ka fa wim nsakrae a ɛresɛe no ho.

 Aane. Bible kaa nneɛma bi a ebesisi wɔ yɛn bere yi so ho asɛm, na wutumi hu sɛ ewim a ayɛ hyehyeehyew ne nneɛma a ɛtete saa nso ka ho bi. Ɛho nhwɛso ne sɛ, Yesu ka too hɔ sɛ yebehu “nneɛma a ɛyɛ hu” anaa “nneɛma a ɛyɛ nwanwa na etu koma.” (Luka 21:11; Good News Translation) Sɛ nnipa bebree hwɛ sɛnea wim ayɛ hyehyeehyew no a, ɛma wɔsuro sɛ anhwɛ a nnipa bɛsɛe asaase yi.

 Daabi. Onyankopɔn bɔɔ asaase maa nnipa sɛ wɔntena so afebɔɔ, enti ɔrenyɛ nhwɛhaa mma nnipa nsɛe no. (Dwom 115:16; Ɔsɛnkafo 1:4) Wahyɛ bɔ mpo sɛ ‘ɔbɛsɛe wɔn a wɔresɛe asaase no.’—Adiyisɛm 11:18.

 Bible ma yehu sɛ atoyerɛnkyɛm a ɛresisi nyinaa, Onyankopɔn betumi ama ne nyinaa aba awiei, na ɔbɛyɛ nso.

•   “[Onyankopɔn ma] ahum no yɛ dinn, na po asorɔkye no yɛ komm.” (Dwom 107:29) Ahum, asorɔkye, ne nneɛma a ɛtete saa no, Onyankopɔn wɔ ne nyinaa so tumi. Wim nsakrae a asɛe a akɔfa atoyerɛnkyɛm bebrebe yi nyinaa aba no, Onyankopɔn betumi asiesie.

•   “Woma asaase nya nea ehia; ɛsow aba pii ma ɛyɛ frɔmfrɔm.” (Dwom 65:9) Onyankopɔn behyira asaase no ama adan paradise.

 Bible no ma yehu sɛ yɛn asaase yi a asɛe yi, ɛbɛsan afa ne ntama pa afura. Sɛ wopɛ sɛ wuhu nea Bible ka fa ho a, kenkan asɛm a yɛato din “Who Will Save the Earth?” (Hena Na Ɔbɛsa Asaase Yi Yare?)