Nicolas ne Céline de, ɛsono wɔn haw. France Betel maa wɔn dwumadi bi, enti na ɛsɛ sɛ wɔtu kɔ asafo foforo mu. Wɔkaa sɛ: “Mfiase no, yɛn ani gyei paa, nanso eduu baabi no na ayɛ den, efisɛ na yɛafe yɛn nnamfo. Anuanom a na ɛwɔ yɛn asafo foforo no mu no, na yɛne wɔn adamfofa no mu nyɛɛ den papa.” a Esiane sɛ wokɔ asafo foforo mu a ɛnyɛ mmerɛw nti, dɛn na wobɛyɛ na nneɛma akɔ yiye ama wo? Dɛn na afoforo betumi ayɛ de aboa wo? Afei nso, asafo foforo a woakɔ mu no, sɛn na wobɛhyɛ wɔn nkuran na wɔn nso ahyɛ wo nkuran?

NNEƐMA NNAN A WOYƐ A ƐBƐBOA WO

1. Fa wo ho to Yehowa so. (Dw. 37:5) Momma yɛnhwɛ Kazumi a ɔwɔ Japan. Ná watena asafo baako mu mfe 20, nanso wɔyii ne kunu kɔɔ baabi foforo sɛ ɔnkɔyɛ adwuma. Sɛn na ‘ɔde ne kwan hyɛɛ Yehowa nsa’? Ɔkaa sɛ: “Ehu a ɛkaa me, sɛnea na mete nka sɛ mɛyɛ ankonam, ne sɛnea na me yam hyehye me no, mifii me komam kaa ne nyinaa ho asɛm kyerɛɛ Yehowa. Bere biara a meyɛɛ saa no, ɔmaa me ahoɔden a na mihia no.”

Wobɛyɛ dɛn de wo ho ato Yehowa so kɛse? Sɛnea afifide hia nsu ne nnuannuru a ɛwɔ asaase mu na atumi anyin no, yɛn gyidi nso, ɛsɛ sɛ yɛyɛ ho adwuma na atumi anyin. Nicolas a yɛadi kan aka ne ho asɛm no dwinnwen nhwɛso a Abraham, Yesu, ne Paul yɛe no ho; saa mmarima yi nyinaa de nneɛma pii bɔɔ afɔre de yɛɛ Onyankopɔn apɛde. Bere a  odwinnwen wɔn nhwɛso no ho no, onyaa Yehowa mu ahotoso kɛse sɛ ɔbɛboa no. Sɛ woyɛ nhyehyɛe de sua Bible no da biara a, nsakrae biara a ɛbɛba w’asetena mu no, ɛbɛboa wo ma woagyina ano. Afei nso, wubetumi de nea wusua no ahyɛ afoforo nkuran wɔ asafo foforo no mu.

2. Nyɛ ntotoho. (Ɔsɛnk. 7:10) Bere a Jules tu fii Benin kɔɔ United States no, ohui sɛ ɛhɔ amammerɛ yɛ soronko koraa. Ɔkaa sɛ: “Obiara a mehyia no no, na ɛyɛ me sɛ ɛsɛ sɛ meka me ho asɛm kyerɛ no.” Esiane sɛ wɔnyɛ saa wɔ ne kurom nti, ofii ase twee ne ho fii anuanom ho. Nanso, bere a obehuu anuanom yiye no, ɔyɛɛ nsakrae. Ɔka sɛ: “Seesei mabehu sɛ, ɛmfa ho baabi a obi te wɔ asaase so no, nnipa nyinaa yɛ pɛ. Nea ɛwom ara ne sɛ, sɛnea wɔkasa ne sɛnea wɔyɛ wɔn ade no na ɛyɛ soronko. Sɛnea obi te biara, ɛsɛ sɛ yegye no tom.” Enti mfa asafo a na wowom no ntoto foforo a woabam no ho. Onuawa kwampaefo bi a ne din de Anne-Lise ka sɛ: “Sɛnea ɛbɛyɛ a mehu nneɛma foforo nti na mitui, na ɛnyɛ sɛ mɛsan abehu nneɛma dedaw a migyaw no hɔ no.”

Asafo mu mpanyimfo nso, ɛnsɛ sɛ wɔde asafo a na wɔwom no toto foforo a wɔabam no ho. Sɛnea wɔyɛ wɔn ade no yɛ soronko a, ɛno ara nkyerɛ sɛ nea wɔreyɛ no nye. Eye paa sɛ wode w’ani to fam hwɛ sɛnea ɛhɔfo yɛ wɔn ade, ansa na sɛ wowɔ nyansahyɛ bi a wode ama. (Ɔsɛnk. 3:​1, 7b) Eye sɛ wode wo nhwɛso bɛkyerɛkyerɛ anuanom sen sɛ wobɛhyɛ wɔn sɛ wɔnyɛ nea wopɛ.—2 Kor. 1:24.

3. Fa wo ho hyɛ asafo no mu. (Filip. 1:27) Egye bere ne ahoɔden paa na woatu akɔ baabi foforo, nanso mfiase no ara sɛ ɛnyɛ biribi a woyɛ ho hwee a ɛnyɛ yiye a, ɛsɛ sɛ wututu wo nan kɔ adesua. Ade yi, wɔn a wɔwɔ w’asafo foforo no mu no, sɛ wɔnhu wo koraa anaa wɔntaa nhu wo a, ɛbɛyɛ dɛn na wɔatumi aboa wo? Lucinda ne ne mma mmea baanu tu kɔtenaa kurow kɛse bi mu wɔ South Africa. Ɔka sɛ: “Anuanom tuu me fo sɛ menyere me ho ne anuanom a ɛwɔ asafo no mu mmɔ, na me ne wɔn nkɔ asɛnka. Afei nso, mekɔ adesua a memfa me ho nhyem. Bio nso, yɛka kyerɛɛ anuanom sɛ wɔbetumi abɛyɛ asɛnka nhyiam wɔ yɛn fie.”

Sɛ wo ne anuanom bom yɛ asafo no mu nnwuma a, ɛbɛhyɛ wo ne wɔn gyidi den. Anne-Lise a yɛadi kan aka ne ho asɛm no, asafo mu mpanyimfo hyɛɛ no nkuran sɛ ɔmmɔ mmɔden ne obiara a ɔwɔ n’asafo foforo no mu nkɔ asɛnka. Ekowiee sɛn? Ɔka sɛ: “Ntɛm ara na mihui sɛ, wei yɛ ade baako a ɛbɛma mahu sɛ meka asafo no ho.” Afei nso, sɛ wutu wo ho ma yɛ nnwuma bi te sɛ Ahenni Asa so asiesie a, ɛbɛma anuanom ahu sɛ woka saa asafo no ho. Sɛ wode wo ho hyɛ asafo no dwumadi nyinaa mu a, ɛrenkyɛ na anuanom agye wo atom, na wobɛte nka sɛ wɔyɛ w’abusuafo.

4. Hwehwɛ nnamfo foforo. (2 Kor. 6:​11-13) Sɛ nkurɔfo hu sɛ wudwen wɔn ho a, ɛnyɛ  den koraa sɛ wɔbɛba abɛyɛ wo nnamfo. Enti hwɛ sɛ wubedu Ahenni Asa so ansa na adesua ahyɛ ase, sɛnea ɛbɛyɛ a wubetumi ne afoforo abɔ nkɔmmɔ; mopɔn nso a, wubetumi atwɛn kakra ne afoforo abɔ nkɔmmɔ. Bɔ mmɔden sɛ wubehu anuanom din. Sɛ wopɛ nnipa, na wutumi kae nkurɔfo din a, ɛbɛma afoforo atumi abɛn wo, na wɔbetumi abɛyɛ wo nnamfo.

Sɛ́ anka wubenya adwene sɛ asafo foforo no mufo mpɛ sɛ wɔgye wo tom no, ma wɔn bere ma wɔmfa nhu sɛnea wote ankasa. Suasua Lucinda. Ɔka sɛ: “Esiane sɛ yɛyɛɛ nhyehyɛe too nsa frɛɛ afoforo baa yɛn fie nti, seesei yɛne wɔn afa adamfo denneennen.”

“OBIARA NNYE NE YƆNKO NTOM”

Ebinom wɔ hɔ a, sɛ wɔkɔ Ahenni Asa bi so na wɔnnim obiara wɔ hɔ a, ɛyɛ a ɛnyɛ mmerɛw mma wɔn. Enti sɛ obi ba w’asafo mu foforo a, wobɛyɛ dɛn ama n’ani aka? Ɔsomafo Paul hyɛ yɛn nkuran sɛ: “Obiara nnye ne yɔnko ntom, sɛnea Kristo nso gyee mo toom no.” (Rom. 15:7) Sɛ asafo mu mpanyimfo suasua Kristo a, wɔbetumi aboa wɔn a wɔaba wɔn asafo mu foforo no ma wɔate nka sɛ wɔka asafo no ho. (Hwɛ adaka a yɛato din, “ Sɛ Wutu Kɔ Baabi a, Dɛn Na Wobɛyɛ Na Nneɛma Akɔ Yiye?” no.) Nanso asafo no mufo nyinaa a mmofra mpo ka ho, betumi aboa ma wɔn a wɔaba wɔn asafo mu foforo no ani aka.

Afoforo a yebegye wɔn atom no, ebi ne sɛ yɛbɛto nsa afrɛ wɔn aba yɛn fie, nanso ɛnyɛ ɛno nko. Yebetumi ayɛ nneɛma pɔtee bi nso de aboa wɔn. Ɛho nhwɛso ni. Onuawa bi hyɛɛ da gyee bere de onuawa foforo a na wabɛtena ne mpɔtam hɔ foforo kɔɔ kurom kɔkyerɛkyerɛɛ no hɔ, na ɔkyerɛɛ no baabi nso a ɔbɛfa kar anaa keteke. Nea onuawa yi yɛe no kaa onuawa foforo no koma, na ɛboaa no maa n’ani kae.

HOKWAN A EBETUMI AMA WOANYA NKƆSO

Sɛ abɛbɛ renyin a, ɔworɔw ne ho mpɛn pii ansa na ne ntaban mu abae ma watumi atu. Wo nso, sɛ wokɔ asafo foforo mu a, yɛbɛka  a, biribiara a ɛmma wuntumi ntrɛw wo ntaban mu ntu wɔ Yehowa som mu no, ɛsɛ sɛ woworɔw gu hɔ. Nicolas ne Céline ka sɛ: “Wutu kɔ baabi a, ɛma wusua nneɛma foforo. Nea ɛbɛyɛ na yɛatumi ne afoforo abɔ yiye na yɛn ani aka no, na ehia sɛ yenya suban foforo.” Jean-Charles a yɛkaa ne ho asɛm mfiase no ka sɛnea tu a wɔtui no aboa n’abusua. Ɔka sɛ: “Tu a yetui no aboa ma yɛn mma no anya nkɔso wɔ asafo foforo no mu. Abosome kakraa bi akyi no, yɛn babea no fii ase yɛɛ dwumadi wɔ nnawɔtwe mfinimfini adesua no mu, na yɛn babarima no nso bɛyɛɛ ɔdawurubɔfo a ɔmmɔɔ asu.”

Na sɛ worentumi ntu nkɔ baabi foforo nso ɛ? Yɛbɛyɛ nhwɛso a, ebia wo tebea mma wo kwan mma wuntu nkɔ baabi a mmoa ho hia. Sɛ saa a, ɛnde sɛ wode nyansahyɛ a yɛaka ho asɛm yi bi yɛ adwuma a, ebetumi ama ayɛ sɛ nea woatu kɔ asafo foforo mu. Fa wo ho to Yehowa so, na fa wo ho hyɛ asafo no dwumadi nyinaa mu; wo ne anuanom nyɛ nhyehyɛe nkɔ asɛnka, wo ne wɔn mfa nnamfo, na nnamfo a wowɔ dedaw no nso, hyɛ mu den. Sɛ obi aba w’asafo mu foforo anaa obi hia mmoa bi a, wubetumi ayɛ biribi pɔtee de aboa no anaa? Esiane sɛ ɔdɔ na ɛma yehu sɛ yɛyɛ nokware Kristofo nti, sɛ woyɛ saa a, ɛda adi sɛ ɛbɛboa wo ama woanya nkɔso. (Yoh. 13:35) Wubetumi anya awerɛhyem sɛ “afɔrebɔ a ɛtete saa no sɔ Onyankopɔn ani.”—Heb. 13:16.

Sɛ wokɔ asafo foforo mu a, ɛnna fam, nanso Kristofo bebree atu kɔ asafo foforo mu ma akɔ yiye ama wɔn. Enti wo nso, ebetumi akɔ yiye ama wo. Anne-Lise ka sɛ, “Asafo foforo a mekɔɔ mu no boaa me ma mitumi trɛw me ntaban mu.” Seesei Kazumi gye di sɛ, sɛ wutu kɔ baabi a, “Yehowa betumi afa akwan a wunnwen ho da so aboa wo.” Jules nso ɛ? Ɔka sɛ: “Nnamfo a manya nti, m’ani aka. Seesei, mete nka sɛ meka asafo no ho paa, enti ɛbɛyɛ den sɛ mefi ha akɔ baabi foforo.”