WIASE NSƐM
Asia
Sɛ yɛreka wiase no fã baabi a nnipa hyɛ paa a, ɛyɛ Asia. Yɛkyɛ wiase mu nnipa mu nnan a, China ne India nko ara bɛfa baako. Sɛ ɛba ntetee ne ahobammɔ a, ɔhaw bɛn na aman a ɛwɔ Asia no rehyia?
Nimdeɛ bɔ Mmofra ho Ban
Mmaranimfo a wɔwɔ China ka sɛ mmofraberem pɛɛ no, sɛ awofo ankyerɛ wɔn mma ɔbarima ne ɔbaa nna ho nsɛm a, ɛnyɛ den koraa sɛ nnipabɔnefo bɛyɛ wɔn basabasa. Bɛyɛ mfe nnan bi ntam no, wɔbɔɔ nnipa bɛyɛ 8,000 soboɔ wɔ China sɛ wɔayɛ mmofra basabasa. Mmaranimfo bi a ɔwɔ Beijing Normal University kaa sɛ: “Ɛnyɛ den koraa sɛ nnipa bɛyɛ mmofra basabasa. Nanso sɛ mmofra hu nna ho nsɛm sɛnea ɛfata a, ɛbɛsi ɔhaw yi ano.”
NEA BIBLE KA: Awofo a wɔn ani da hɔ boa wɔn mma ma wɔhu sɛnea wɔbɛbɔ wɔn ho ban “afiri nkontomponi” ho.—Mmebusɛm 2:1, 10-12.
Mframa Gyampanturudu Akyi Asɛm
Nhwehwɛmu bi a wɔyɛe daa no adi sɛ bere biara a ahum kɛse bɛtu afa Philippines no, afe a ɛdi hɔ no, mmaayewa pii wuwu. Mmaayewa a wɔwu no boro nnipa a ahum no ankasa kunkum wɔn no so mpɛn 15. Dɛn na ɛde wei ba? Adeɛ baako ne sɛ, sɛ ahum kɛse tu saa a, nkurɔfo pii adwuma sɛe. Bio, ɛyɛ den sɛ nnipa bɛnya sika asisi adan foforo. Afei ɔkwan a wɔfa so hwɛ mmaayewa wɔ wɔn adidi ne wɔn ayaresa mu no nkɔ yie.
NEA BIBLE KA: ‘Kyɛ w’aduane mu ma deɛ ɛkɔm de no, na fa ahiafoɔ a wɔnni baabi teɛ kɔ wo fie. Sɛ wohu obi a ɔda adagya a, kata ne ho.’—Yesaia 58:7.
Mpanimfoɔ a Wɔkum Wɔn ho wɔ South Korea
Nnipa pii hyɛɛ da kunkum wɔn ho wɔ South Korea afe 2011 mu. Woyi wɔn mu 100 si hɔ a, wɔn mu bɛboro 25 yɛ mpanimfoɔ a wɔadi mfe 65 ne akyi. Nnipa bi a wɔyɛɛ asɛm yi mu nhwehwɛmu kaa sɛ nkurɔfo nte wɔn ani nhwɛ nkwakoraa ne mmerewa sɛnea ɛsɛ. Bio nso, nnipa a wɔn mfe akɔ anim wɔ South Korea no mu pii di hia. Seesei South Koreafo dodow no ara nnye ntom sɛ ɛhia sɛ mmofra boa wɔn awofo a wɔn mfe akɔ anim.
NEA BIBLE KA: “Di wo papa ne wo maame ni.”—Efesofoɔ 6:2.
