So Wokae?

So w’ani agye Ɔwɛn-Aban a aba nnansa yi akenkan ho? Ɛnde hwɛ sɛ wubetumi abua nsɛmmisa a edidi so yi anaa:

• Dɛn na Kristoni betumi ayɛ bere a ɔte nkate ne honhom fam ɔbrɛ nka no?

Ehia sɛ yehu nea ɛde ɔbrɛ no ba no. Sɛ yɛkyerɛw yɛn su horow ne nneɛma a yɛwɔ to hɔ, na yɛtow nnosoa a ɛho nhia gu a, ebetumi aboa yɛn. Yebetumi ahwɛ yɛn tebea na yɛde botae horow a yebetumi adu ho asisi yɛn anim. Yɛn honhom fam akwahosan ho dwuma a yebedi no ho hia yiye, na ɛsɛ sɛ yɛde mpaebɔ ne nsɛm ho a wosusuw ka ho.—8/15, kratafa 23-6.

• Dɛn nti na Yehowa Adansefo bu akontaahyɛde 144,000 no sɛ ɛnyɛ sɛnkyerɛnne kwan so de?

Bere a wɔkaa 144,000 no ho asɛm kyerɛɛ ɔsomafo Yohane no, ohuu ‘nnipakuw kɛse a obi ntumi nkan wɔn.’ (Adiyisɛm 7:4, 9) Sɛ na akontaahyɛde 144,000 no yɛ sɛnkyerɛnne kwan so de a, anka yɛrenhu nsonsonoe a ɛwom no. Yesu kaa wɔn a wɔne no bedi hene ho asɛm sɛ ‘kuw ketewa.’ (Luka 12:32)—9/1, kratafa 30.

• Na dɛn nti na Israelni betumi atɔn aboa a wɔanhwie ne mogya angu ama ɔnanani?

Ná ɔmamfrani anaa ɔhɔho a wansakra amma Yudasom mu no nni Mmara no ase. Enti na wɔma Israelni kwan sɛ ɔntɔn saa mmoa no mma no. (Deuteronomium 14:21) Nanso na obi a wasakra akɔ Yudasom mu no hyɛ Mmara no ase ma enti ontumi nni aboa a wanhwie ne mogya angu no nam. (Leviticus 17:10)—9/15, kratafa 26.

• Dɛn na Engiresi asɛmfua biomimetic kyerɛ, na dɛn nti na eyi betumi afa Kristofo ho?

Ɛyɛ nyansahu fã bi a wɔnam so suasua abɔde mu adwini. Sɛ nhwɛso no, Wright nuanom no yɛɛ wimhyɛn bere a wosuaa sɛnea nnomaa akɛse tu ho ade no. Na wogyinaa sɛnea onipa srɛ mu dompe ma otumi gyina ntenten so na ɛyɛɛ Eiffel abantenten no. Enti, biomimetic betumi akanyan Kristoni ma wahyɛ Ɔbɔadeɛ no anuonyam.—10/1, kratafa 9.

• Hena na wɔkaa ne ho asɛm wɔ 2 Korintofo 12:2-4 sɛ wohwim no kɔɔ paradise no?

Asɛm yi na edi asɛm a Paulo ka de dii ɔsomafo a ɔyɛ ho adanse no akyi pɛɛ. Esiane sɛ Bible no nkaa obi a wohwim no saa ho asɛm pɛn, na Paulo na ɔkaa asɛm yi kyerɛɛ yɛn nti, ɛda adi sɛ Paulo na onyaa saa anisoadehu yi.—10/15, kratafa 8.

• Su horow a na Yesu wɔ a ɛma ɔfata sɛ ɔyɛ Ɔkannifo a Onyankopɔn apaw no no bi ne nea ɛwɔ he?

Yesu kuraa ne mudi mu pintinn, ɔyɛ ɔnokwafo na na n’abrabɔ teɛ. Yesu de ne ho maa Onyankopɔn koraa. Ná Yesu dwen nnipa ho yiye na na ɔpɛ adwuma.—11/1, kratafa 6-7.

• Wɔ Mfirihyia Apem no mu no, na adaemone no wɔ he?

Yɛwɔ nea yebetumi agyina so aka sɛ wɔde wɔne Satan begu bun mu wɔ Kristo Mfirihyia Apem Nniso no mu. (Adiyisɛm 20:1-3) Genesis 3:15 ka siei sɛ wɔbɛbɔ ɔwɔ no ti, na bun no mu a wɔde no bɛto wɔ Mfirihyia Apem Nniso no mu no ka eyi ho. Abɔfo bɔne anaa adaemone ka n’asefo no ho. Suro a wosuro bun no kyerɛ sɛ wonim sɛ wɔde wɔn begu mu. (Luka 8:31)—11/15, kratafa 30-1.

• Dɛn nti na ɛsɛ sɛ obi hwɛ yiye wɔ mmosa a ɔnom ho sɛ mpo ɔnnom mmow sram a?

Nnipa bi nom nsa bebree mpo a, ɛyɛ den sɛ wubehu sɛ wɔabow. Nanso, asanom ka obi hɔ nkakrankakra ma ɔbɛyɛ ‘ɔsadweam.’ (Tito 2:3) Yesu de kɔkɔbɔ mae wɔ ‘potwaa ne asabow a ɛhyɛ koma so’ ho. (Luka 21:34, 35) Nsa mmow obi ansa na watɔ nko ayɛ akwadworɔ wɔ n’asetra ne Onyankopɔn som mu.—12/1, kratafa 19-21.