BERE a Wiase Ko I pae gui 1914 no, nnipa pii huu no ntɛm ara sɛ Bible Asuafo no mfa wɔn ho nhyɛ akodi mu. (Yes. 2:2-4; Yoh. 18:36; Efe. 6:12) Dɛn na ɛtoo Onyankopɔn asomfo a wɔwɔ Britain?

Afe 1916 mu no, wɔhyɛɛ mmara wɔ Britain sɛ ɛsɛ sɛ mmarima a wɔnwaree a wɔadi fi mfe 18 kosi 40 kɔ sraadi. Mmara no kyerɛe sɛ, wɔn a wɔn som anaa wɔn ahonim mma wɔn kwan nkutoo na wobetumi ayi wɔn afi mu. Enti aban no tew asɛnnibea ahorow sɛ ɛnhwɛ wɔn a wɔfata sɛ woyi wɔn fi sraadi mu.

Mmara yi nyinaa akyi no, anni da bi na wɔkyeree Bible Asuafo 40 guu afiase, na wɔde 8 nso kogyinaa akono wɔ France. Anuanom a wɔwɔ Britain no hui sɛ wɔne wɔn anni no yiye, enti wɔkyerɛw krataa kɔmaa Ɔmampanyin Herbert Asquith sɛ ɛnyɛ ne kwan so sɛ wɔde anuanom begu afiase. Wonyaa nnipa 5,500 ma wɔde wɔn nsa hyɛɛ krataa foforo ase kaa ho kɔe.

Anuanom baawɔtwe a wɔde wɔn kɔɔ France no anko, enti wobuu wɔn kumfɔ. Nanso bere a wɔde wɔn gyinagyinaa hɔ a wɔrebɛbɔ wɔn tuo akum wɔn no, atumfoɔ no kae sɛ wɔntwe nsan na wɔmfa wɔn nkogu afiase mfe du. Enti wɔde wɔn baa England beguu afiase.

Ɔko no gyinaa mu kyɛe, enti eduu baabi no wɔkae sɛ mmarima a wɔaware nso nkɔ sraadi. Wɔkyeree Bible Suani bi a wɔfrɛ no Henry Hudson a ɔyɛ dɔkota, na wodii n’asɛm wɔ Manchester, England. August 3, 1916 no, asɛnnibea no buu no fɔ bɔɔ no ka, na wɔkae sɛ ɔnkɔ sraadi. Saa bere no ara nso na wɔredi Onua James Frederick Scott asɛm wɔ Edinburgh, Scotland. Na onua no yɛ bere nyinaa somfo a wadi mfe 25. Wodii asɛm no, wobuu no bem. Aban no de asɛm no kɔdan asɛnnibea foforo nanso asɛm foforo sɔree wɔ London ma wogyaee eyi akyi di. Onua a na n’asɛm asɔre ne Herbert Kipps. Wobuu no fɔ bɔɔ no ka, na wɔkae sɛ ɔnkɔ sraadi.

Eduu September 1916 no, na anuanom 264 de wɔn asɛm akɔto aban anim sɛ wɔmpɛ sɛ wɔkɔ sraadi. Wɔn mu 5 de, atumfoɔ no gyee wɔn adesrɛ no toom yii wɔn fii sraadi mu, na wɔmaa wɔn mu 154 kɔyɛɛ ɔman nnwuma foforo. Wɔde wɔn mu 23 kɔyɛɛ asraafo nnwuma nanso na wɔnkɔ akono, wɔn mu 82 de, wɔkae sɛ wɔnkɔ sraadi, na ebi mpo de, wodii wɔn asɛm de wɔn guu afiase. Bere a ɔmanfo huu sɛnea aban no reteetee anuanom no, wotuu wɔn ano guu aban no so. Enti aban no yii wɔn fii asraafo asoɛe koguu afiase.

 Atumfoɔ no maa Edgar Clay ne Pryce Hughes kɔyɛɛ ɔtare bi ho adwuma wɔ Wales. Onua Pryce Hughes yi ara na akyiri yi asafo no ma ɔhwɛɛ Britain Betel so. Bere a wɔde anuanom baawotwe fi France baa England no na Onua Herbert Senior ka ho, na akyiri yi wɔde no kɔɔ Wakefield afiase wɔ Yorkshire. Wɔde anuanom afoforo nso guu Dartmoor afiase ma wɔyɛɛ adwumaden. Anuanom a sraadi nti wɔde wɔn koguu Dartmoor afiase dɔɔso sen wɔn a wɔde wɔn kɔɔ afiase a aka nyinaa.

Atumfoɔ no kae sɛ Bible Suani bi a wɔfrɛ no Frank Platt nkɔyɛ asraafo nnwuma nanso ɔrenko, enti ɔpenee so. Bere a ɔkɔe no wɔhyɛɛ no sɛ ɔnkɔko, nanso wampene enti wodii n’ani paa. Atkinson Padgett de, bere a ɔkɔɔ sraadi mu no, ankyɛ na ohuu nokware no. Enti osii gyinae sɛ ɔremma tuo so, eyi maa asraafo mpanyimfo yɛɛ no ayayade.

Kristofo nni ɔfa biara wɔ wiase nsɛm mu. Ɛwom, saa bere no ebia na anuanom nhyɛ da nte asɛm yi ase yiye, nanso womiaa wɔn ani yɛɛ nea Yehowa Nyankopɔn pɛ. Anuanom a yɛabɔ wɔn din nyinaa yɛɛ nhwɛso fɛfɛɛfɛ maa yɛn. Wɔannyina ɔfã biara wɔ wiase nsɛm mu, “sɔhwɛ bere” mu mpo. (Adi. 3:10)—Tete wɔ bi ka, Britain.