So Yesu Yɛ Ade Nyinaa so Tumfoɔ Nyankopɔn?

Mmuae a wɔtaa de ma:

▪ “Yiw, Yesu yɛ ade nyinaa so Tumfoɔ Nyankopɔn.”

▪ “Yesu yɛ Onyankopɔn a ɔdaa ne ho adi wɔ honam mu.”

Dɛn na Yesu Kae?

▪ “Sɛ modɔ me a, mo ani begye sɛ merekɔ Agya no nkyɛn, efisɛ Agya no yɛ kɛse sen me.” (Yohane 14:28) Yesu ankasa kae sɛ ɔne n’Agya nyɛ pɛ.

▪ “Merekɔ m’Agya ne mo Agya ne me Nyankopɔn ne mo Nyankopɔn no nkyɛn.” (Yohane 20:17) Yesu anka n’ankasa ho asɛm sɛ ɔne Onyankopɔn, na mmom ɔkaa Onyankopɔn ho asɛm sɛ Obi foforo.

▪ “Mamfa m’ankasa me pɛ so na mekasae, na mmom Agya a ɔsomaa me no ara na ahyɛ me nea ɛsɛ sɛ meka ankasa.” (Yohane 12:49) Yesu nkyerɛkyerɛ mfi n’ankasa hɔ; efi Agya no hɔ.

YESU kae sɛ ɔyɛ Onyankopɔn Ba na ɔnyɛ ade nyinaa so Tumfoɔ Nyankopɔn. Sɛ na Yesu yɛ Onyankopɔn a, ɛnde hena na ɔbɔɔ no mpae bere a na ɔwɔ asase so no? (Mateo 14:23; 26:26-29) Nokwarem no, Yesu anhyɛ da anyɛ ne ho te sɛ nea na ɔne obi foforo na ɛrekasa!

Bere a Yesu asuafo no mu baanu kɔsrɛɛ no dibea soronko bi wɔ n’Ahenni mu no, ɔka kyerɛɛ wɔn sɛ: “Me nifa ne me benkum so tena no de, ɛnyɛ me dea na mede ama, na mmom ɛyɛ wɔn a m’Agya asiesie ama wɔn no dea.” (Mateo 20:23) Bere a Yesu kae sɛ onni tumi a ɛbɛma wadi wɔn abisade no ho dwuma no, so na ɔredi atoro? Dabida! Mmom no, ofii ahobrɛase mu gye toom sɛ Onyankopɔn nkutoo na ɔwɔ tumi sɛ osi saa gyinae no. Yesu kyerɛkyerɛɛ mu mpo sɛ nneɛma bi wɔ hɔ a ɔno anaa abɔfo no nnim, gye n’Agya nkutoo na onim.—Marko 13:32.

So bere a Yesu wɔ asase so nkutoo na na ɔhyɛ Onyankopɔn ase? Dabi. Wɔ Yesu wusɔre akyi mpo no, Bible ka ne ho asɛm sɛ ɔbrɛɛ ne ho ase hyɛɛ Onyankopɔn ase. Ɔsomafo Paulo kae yɛn sɛ, “Onyankopɔn di Kristo so tumi.” (1 Korintofo 11:3, Today’s English Version) Bible ka sɛ daakye, “sɛ onya de nneɛma nyinaa gu Kristo nan ase a, afei Ɔba no ankasa nso de ne ho bɛhyɛ Onyankopɔn a ɔde nneɛma nyinaa hyɛɛ n’ase no ase; na Onyankopɔn bedi nneɛma nyinaa so koraa.”—1 Korintofo 15:28, TEV.

Ɛda adi pefee sɛ Yesu nyɛ ade nyinaa so Tumfoɔ Nyankopɔn. Ɛno nti na ɔfrɛɛ n’Agya sɛ, “me Nyankopɔn” no.—Adiyisɛm 3:2, 12; 2 Korintofo 1:3, 4. *

[Ase hɔ asɛm]

[Asɛm a wɔafa aka wɔ kratafa 7]

Yesu kae sɛ nneɛma bi wɔ hɔ a ɔno anaa abɔfo no nnim, gye n’Agya nkutoo na onim