Gilead Adesua Awiei A Ɛto So 131

‘Ma Yehowa Ani Nnye’

ABUSUAFO, nnamfo ne adɔfo hyiaa mu September 10, 2011 kɔɔ Ɔwɛn Aban Gilead Bible Sukuu adesua awiei a ɛto so 131 no bi. Ansa na wɔrebefi dwumadi no ase no, adesuafo no ne wɔn a wɔbɛma ɔkasa no dwumadi nti, na wɔn yam hyehye wɔn kakra. Nanso bere a dwumadi no baa awiei no, na nnipa 9,063 a wɔahyia hɔ no nyinaa ho atɔ wɔn a wɔresereserew, efisɛ nsɛm a wotiei, ɔyɛkyerɛ a wɔhwɛe ne nsɛm a wobisabisaa nkurɔfo no maa wɔn ani gyei.

Stephen Lett a ɔka Yehowa Adansefo Sodikuw ho no na odii dwumadi no ho kyeame, na ɔno na odii kan kasae. Bible mu nsɛm bi ka Yehowa Nyankopɔn ho asɛm te sɛ nea ɔwɔ nipadua—ɔwɔ ani, aso, nsa ne abasa—na Onua Lett kyerɛkyerɛɛ mu twee atiefo adwene sii nsɛm bi a ɛkyerɛ sɛnea Yehowa de yɛ adwuma so.

Kyerɛwsɛm a odii kan kyerɛkyerɛɛ mu ne 2 Beresosɛm 16:9. Ɛhɔ ka sɛ Yehowa de “n’aniwa kyini asase so baabiara sɛ ɔde n’ahoɔden bedi ama wɔn a wɔn koma di mũ wɔ ne ho.” Ɔhyɛɛ adesuafo no nkuran sɛ wɔnkɔ so nnya koma a edi mũ mfa nsom Yehowa. Ɔka kyerɛɛ wɔn sɛ wonsuasua Onyankopɔn nhwɛ suban pa a ɛwɔ nnipa ho. Afei Onua Lett de wɔn kɔɔ 1 Petro 3:12; ɛhɔ ka Yehowa ho asɛm sɛ wabue n’aso ama treneefo adesrɛ. Otuu adesuafo no fo sɛ wɔnkɔ so mmɔ Yehowa mpae na wɔnkae sɛ Yehowa wɔ ɔpɛ sɛ obetie wɔn mpaebɔ ampa.

Bio nso, ɔkyerɛkyerɛɛ Yesaia 41:13 mu. Ɛhɔ no, Yehowa hyɛ bɔ sɛ: “Me Yehowa wo Nyankopɔn, mikura wo nsa nifa mu; na meka kyerɛ wo sɛ, ‘Nsuro, na me ara mɛboa wo.’” Onua Lett de ahotoso kae sɛ: “Monhwɛ sɛnea Yehowa nsɛm yi ka koma. Ɔteɛ ne nsa so yɛn nsa.” Afei ɔka kyerɛɛ adesuafo no sɛ wɔmma Yehowa mmoa wɔn, na sɛ ɔreboa wɔn a, ɛnsɛ sɛ wɔpopo wɔn ti. Ɔsan kae sɛ adesuafo no betumi asuasua Yehowa na wɔn nso ateɛ wɔn nsa aboa afoforo.

Kyerɛwsɛm a Onua Lett de wiee ne kasa no ne Yesaia 40:11. Ɔka kyerɛɛ atiefo no sɛ wɔmfa wɔn adwene mmu sɛnea saa kyerɛwsɛm no ma yehu ayamhyehye a Yehowa wɔ ma yɛn. Onua Lett kae sɛ: “Yehowa de ne nsa ma yɛn so, na oturu yɛn wɔ ne kokom.” Dɛn na yɛn nso yɛbɛyɛ? Otuu adesuafo no fo sɛ wɔnkɔ so nnya ahobrɛase na wɔnyɛ wɔn ho bɔkɔbɔkɔ sɛ nguammaa na ama Yehowa aturu wɔn wɔ ne kokom.

“Yɛwɔ Saa Ademude Yi Wɔ Anwenne Mu”

David Splane a ɔka Sodikuw no ho no kyerɛkyerɛɛ asɛmti yi mu, na na egyina Kyerɛwnsɛm no so. (2 Korintofo 4:7) Ademude no ne dɛn? So ɛyɛ nimdeɛ anaa nyansa? Ɔkae sɛ “ɛnyɛ emu biara. Mmom ademude a ɔsomafo Paulo kaa ho asɛm no ne ‘ɔsom adwuma’ a ɛma ‘yɛda nokware no adi’ no.” (2 Korintofo 4:1, 2, 5) Onua Splane kaee adesuafo no sɛ asram anum a wɔde suaa ade no asiesie wɔn ama dwumadi titiriw bi wɔ asɛnka adwuma no mu. Ɛsɛ sɛ saa adwuma no som bo paa ma wɔn.

Onua Splane kyerɛkyerɛɛ mu sɛ “anwenne” a wɔde dɔte ayɛ no gyina hɔ ma yɛn nipadua. Ɔkyerɛɛ nsonsonoe a ɛwɔ anwenne a wɔde dɔte ayɛ ne nea wɔde sika ayɛ mu. Anwenne a wɔde sika ayɛ no, wɔntaa mfa nyɛ adwuma. Nanso anwenne a wɔde dɔte ayɛ no de, wɔde yɛ adwuma paa. Sɛ wode ademude bi to sika anwenne mu a, wode w’adwene bɛkɔ anwenne no ne ademude no nyinaa so. Onua Splane kae sɛ: “Ɛsɛ sɛ mo, asɛmpatrɛwfo a moawie mo adesua yi kyerɛ nkurɔfo kwan ba  Yehowa nkyɛn, na ɛnsɛ sɛ moma nnipa adwene ba mo so. Moyɛ dɔte anwenne ara kwa.”

Ɔtoaa so kyerɛkyerɛɛ n’asɛm no mu sɛ tete no, na ogya ntumi nhyew anwenne a wɔde dɔte ayɛ no bi; ná wɔakokwaw ebi nso ho sɛnea ɛbɛyɛ a ɛremmubu. Dɛn na na ɔpɛ sɛ ɔkyerɛ? Sɛ asɛmpatrɛwfo no fi wɔn dwumadi no ase a, wɔde nkakrankakra bɛyɛ te sɛ nea wɔde ɔbo akokwaw wɔn ho. Ɛno nti sɛ obi kasa tia wɔn mpo a, ɛrenhaw wɔn pii na wɔn bo nso remfuw ntɛm. Onua Splane kae sɛ: “Nneɛma a mo ahoɔden betumi no, ɛbɛyɛ mo nwonwa mpo.” Ɛnyɛ abɔfo na Yehowa de ademude a ɛne asɛnka adwuma no ahyɛ wɔn nsa na mmom anwenne a wɔde dɔte ayɛ na ɔde ahyɛ wɔn nsa. Owiee n’asɛm no sɛ: “Eyi kyerɛ sɛ Yehowa nim sɛ mubetumi ayɛ adwuma no.”

“Wo ne Anammɔnfo Tu Mmirika na Wobrɛ a . . . Ɛbɛyɛ Dɛn na Woatumi ne Apɔnkɔ Atu Mmirika?”

Samuel Herd a ɔka Sodikuw no ho no bisae sɛ: “Wubetumi atu mmirika akodu he, na ahoɔhare bɛn na wubetumi de atu mmirika no?” Adɛn nti na obisaa adesuafo no saa asɛm no? Ɔde adesuafo no tebea totoo odiyifo Yeremia ho. Ɔhaw bebree totoo Yeremia na anyɛ mmerɛw amma no sɛ obedi ho dwuma. Nanso na sɔhwɛ akɛse da n’anim. Enti Yehowa bisaa no sɛ: “Sɛ wo ne anammɔnfo tu mmirika na wobrɛ a, ɛnde ɛbɛyɛ dɛn na woatumi ne apɔnkɔ atu mmirika?”—Yeremia 12:5.

Onua Herd de asɛm no totoo adesuafo no ho, na ɔkae sɛ: “Sɔhwɛ bebree a moakyerɛw no nti, ebia ɛbɛyɛ mo sɛ mo ne apɔnkɔ na ɛretu mmirika. Nanso nea ɛwom paa ne sɛ, mo ne anammɔnfo na ɛretu mmirika, na ɛnyɛ apɔnkɔ. Sɛ mufi mo dwumadi no ase a, mo ne apɔnkɔ na ebetu mmirika, kyerɛ sɛ, mubehyia nsɛnnennen akɛse a ɛkyɛn nnɛ de yi. Ɛba saa a, mubetumi agyina anaa? Gilead ntetee no asiesie mo sɛnea ɛbɛyɛ a mubetumi ne apɔnkɔ atu mmirika a mommrɛ.” Ɔhyɛɛ adesuafo no nkuran sɛ wɔnkɔ so nhyɛ wɔn ho den wɔ Onyankopɔn som mu, na wɔnyɛ nhyehyɛe pa nsua Bible na wɔmmɔ mpae daa.

Onua Herd kae sɛ wɔn a wɔrekɔyɛ asɛmpatrɛwfo wɔ aman foforo so no, ɛtɔ mmere bi a wɔn abam betumi abu anaa wobehyia nnipa a wɔmpɛ asɛm no. Ɔyare betumi abɔ ebinom anaa wɔbɛte nka sɛ wontumi nyɛ adwuma no yiye. Nanso ɔmaa adesuafo no awerɛhyem sɛ obi wɔ hɔ a obetumi ahyɛ wɔn den ama wɔadi tebea bɔne biara so a wɔrempa abaw. Onua Herd kae sɛ: “Sɛ mo ne anammɔnfo na ɛretu mmirika oo, mo ne apɔnkɔ na ɛretu mmirika oo, munnya awerɛhyem sɛ Onyankopɔn nsa a tumi wom no betumi aboa mo ama moafa tebea biara mu. Ɛno bɛma moatumi ayɛ asɛmpatrɛw adwuma no de ayi Yehowa ayɛ ahyɛ no anuonyam.”

Dwumadi no Mu Nsɛntitiriw Foforo

“Gyigye Bebree.” John Ekrann a ɔka United States Baa Boayikuw ho no kyerɛkyerɛɛ asɛm bi mu. Asɛm no fa odiyifo Elisa ne okunafo bea bi ho. Ná anka obi rebɛfa okunafo no mmabarima akɔyɛ nkoa. (2 Ahene 4:1-7) Ná okunafo no wɔ ahina ketewa biako pɛ a ɔde ngo gu mu. Elisa ka kyerɛɛ no sɛ onkogyigye nhina mfi wɔn a wɔtete bɛn no no nkyɛn. Ɔkae sɛ: “Gyigye bebree.” Yehowa nam Elisa so yɛɛ anwonwade ma ɔde ngo hyɛɛ nhina no nyinaa mã. Afei okunafo no tɔn ngo no na onyaa sika de tuatuaa ne ho aka, na onyaa bi nso de hwɛɛ n’abusua kosii bere bi.

Asuade bɛn na wɔn a wɔrekɔyɛ asɛmpatrɛwfo yi betumi anya afi asɛm yi mu? Bere a okunafo no regyigye nhina no, ɛrentumi mma sɛ ɔsaa mu. Onua Ekrann kae sɛ: “Yebetumi aka sɛ ogyee ahina biara a ɔde ngo gu mu a ɛbɛyɛ yiye, na sɛ onya akɛse a, n’ani gye.” Afei ɔhyɛɛ adesuafo no nkuran sɛ dwumadi biara a wɔde bɛma wɔn no, ketewa oo, kɛse oo, wonnye. Ɔkae sɛ: “Ɛnsɛ sɛ mosa mu.” Ɔsan ka kyerɛɛ adesuafo no sɛ okunafo no nyaa nhyira pii, efisɛ otiee Elisa akwankyerɛ a ɔde maa no no yiye. Dɛn na na ɔpɛ sɛ ɔkyerɛ? Nsi ne gyidi a yɛda no adi no na ɛkyerɛ nhyira dodow a yebenya.  Onua Ekrann kae sɛ: “Munkum mo ho nyɛ adwuma.”

“Wɔyɛ Koko Ma Yɛn.” Teokrase Sukuu Ahorow Dwumadibea sohwɛfo, William Samuelson kyerɛkyerɛɛ saa asɛm yi mu; efi Numeri 14:9. Ɔkaa nhwɛso pa a Yosua ne Kaleb yɛe no ho asɛm. Sɛnea kyerɛwsɛm no kae sɛ “wɔyɛ koko ma yɛn” no ma yehu sɛ na ɛnyɛ den koraa sɛ wobedi Kanaanfo no so nkonim, na na nkonimdi no bɛhyɛ Israelfo no den ma wɔatoa so. Dɛn na na adesuafo no betumi asua afi mu? Ɔkae sɛ: “Ɔsom adwuma a morekɔyɛ no mu no, sɛ muhyia nsɛnnennen a, momfa no sɛ biribi a ebetumi ahyɛ mo den ama moakɔ so ayɛ adwuma no.”

“So Wɔbɛto Wɔn Gyidi Sɛkyɛ Wɔ Ahum a Ɛbɛba no Mu?” Gilead akyerɛkyerɛfo no biako a wɔfrɛ no Sam Roberson kyerɛkyerɛɛ asɛm a ɔsomafo Paulo kae sɛ ebinom “ama wɔn gyidi agu asu” no mu. (1 Timoteo 1:19) Otuu adesuafo no fo sɛ wɔmmoa nkurɔfo mma wonnya gyidi a wɔato no sɛkyɛ denneennen wɔ Yehowa Nyankopɔn mu. Ɔkae sɛ: “Yebetumi de mo adwuma no atoto ɔtomfo adwuma ho.” Ɔkwan bɛn so? Ɛne sɛ, ɔtomfo keka nkɔnsɔnkɔnsɔn sisi anim na atumi ato suhyɛn sɛkyɛ ma agyina hɔ pintinn. Saa ara na asɛmpatrɛwfo boa Bible asuafo ma wonya suban pa a ɛbɛma wɔanya nkwa.

Onua Roberson de nkɔnsɔnkɔnsɔn no apɔw so apɔw so totoo suban awotwe a wɔaka ho asɛm wɔ 2 Petro 1:5-8 no ho. Ɔkae sɛ, sɛ asɛmpatrɛwfo boa Bible asuafo ma wohu sɛnea Yehowa da saa suban no adi a, ɛma asuafo no nso tumi ne Yehowa nya ayɔnkofa a emu yɛ den paa. Ɛba saa a, ɔhaw biara sɔ wɔn gyidi hwɛ a, wobetumi adi so nkonim.

Osuahu Ahorow ne Nsɛm a Wobisabisaa Nkurɔfo

Gilead akyerɛkyerɛfo no biako a wɔfrɛ no Michael Burnett maa Gilead adesuafo no kaa osuahu a wonyae wɔ asɛnka mu no bi na wɔyɛɛ bi ho ɔyɛkyerɛ. Bere a atiefo no tee sɛnea adesuafo no tumi dii nkurɔfo adanse wɔ sotɔɔ mu, wimhyɛn gyinabea, afie afie ne obi a ɔfom frɛɛ wɔn telefon so mpo no, wɔn ani gyei pii.

Michael Hansen a ɔka United States Betel Abusua ho no bisabisaa anuanom mmarima baasa a wɔde mfe pii ayɛ asɛmpatrɛw adwuma no bi nsɛm. Anuanom mmarima yi ne Stephen McDowell a ɔyɛ ɔsɛmpatrɛwfo wɔ Panama, Mark Noumair a ɔyɛɛ asɛmpatrɛw wɔ Kenya ne William Yasovsky a ɔyɛɛ asɛmpatrɛw wɔ Paraguay no. Asɛmti a na wɔreka ho asɛm ne “Fa Anigye Yɛ Yehowa Apɛde,” na nsɛm a wɔkae no sii saa asɛmti no so dua. (Dwom 40:8) Ɛho nhwɛso ne sɛ, Mark Noumair kaa nneɛma pɔtee bi a ɛmaa ɔne ne yere ani gyee kɛse bere a na wɔyɛ asɛmpatrɛwfo no. Onua no ne ne yere ne ɛhɔ anuanom bebree faa nnamfo ma wonyaa akomatɔyam. Bere a wohui sɛ anuanom no de akwankyerɛ reyɛ adwuma na wɔreyɛ nsakrae akɛse wɔ wɔn abrabɔ mu, na wohuu sɛnea Yehowa ahyira wɔn adwuma so no, ɛno nso maa wɔn ani gyei. Ɔmaa adesuafo no nyaa awerɛhyem sɛ anigye kɛse bi da wɔn anim daakye.

Adesuakuw no muni biako kenkan krataa bi de kyerɛɛ anisɔ kɛse a adesuafo no anya ama ntetee a wɔde ama wɔn no. Ɛno akyi no Onua Lett de dwumadi no baa awiei, na ɔhyɛɛ adesuafo no nkuran sɛ wɔmfa nyansa nyɛ wɔn biribiara. Ɔkae sɛ, sɛ wɔyɛ saa a “ɛbɛma Yehowa ani agye.” Sɛ asɛmpatrɛwfo yi de nokwaredi som Yehowa wɔ baabi wɔrekɔ no a, sɛnea ɛte biara no ɛbɛma Yehowa ani agye.—Yesaia 65:19.

 [Nsɛm a wɔahyehyɛ/​Asase mfonini wɔ kratafa 31]

ADESUAKUW NO HO NSƐM

10 Aman dodow a wofi so yɛ

34.7 Mfe dodow a wɔadi nkyekyɛm yɛ

19.0 Mfe dodow a wɔadi fi bere a wɔbɔɔ asu nkyekyɛm yɛ

13.5 Mfe dodow a wɔde ayɛ bere nyinaa som adwuma no nkyekyɛm yɛ

[Asase mfonini]

(Wopɛ nsɛm a wɔahyehyɛ awie no a, hwɛ nhoma no mu)

Aman a wɔde wɔn rekɔ so na ɛwɔ ase hɔ no

AMAN A WƆDE SUKUUFO NO REKƆ SO

BENIN

BRAZIL

BULGARIA

BURUNDI

CAMEROON

CANADA

CENTRAL AFRICAN REPUBLIC

GERMANY

GHANA

HONG KONG

INDONESIA

KENYA

LIBERIA

LITHUANIA

MALAYSIA

MOZAMBIQUE

NEPAL

PANAMA

PARAGUAY

SIERRA LEONE

SLOVAKIA

SOUTH AFRICA

UNITED STATES OF AMERICA

VENEZUELA

[Mfonini wɔ kratafa 30]

Gilead adesuafo no bi reyɛ osuahu a wonyae wɔ asɛnka mu no biako ho ɔyɛkyerɛ

[Mfonini wɔ kratafa 31]

Ɔwɛn Aban Gilead Bible Sukuu Adesuakuw a Ɛto so 131 a Wɔawie Wɔn Adesua

Din a wɔakyerɛw wɔ ase hɔ no, wɔahyehyɛ no akuw fi anim kɔ akyi, na edin a ɛwɔ kuw biara mu no fi benkum kɔ nifa.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.