Ná Niniwe yɛ Asiria Ahemman no ahenkurow. Ná ɛyɛ kurow kɛse a ahemfie ne asɔrefie pii a ɛyɛ fɛ paa wɔ hɔ, na na ɛhɔ akwan ne afasu yɛ akɛseakɛse. Hebrini, odiyifo Nahum frɛɛ no “mogya kurow.”—Nahum 3:1.

Saa din no fata efisɛ yɛhwɛ Senaherib ahemfie a ɛwɔ Niniwe no ho mfonini a, ɛma yehu sɛ na Asiriafo tirim yɛ den paa. Mfonini no biako yɛ obi a wɔaka no atim fam retu ne tɛkrɛma afi n’anom. Nsɛm a wɔakyerɛkyerɛw agu nneɛma ho kyerɛ sɛ na ɛhɔfo hoahoa wɔn ho sɛ wɔkyere wɔn atamfo a, wotumi de nhama wurawura wɔn ano anaa wɔn hwenem twe wɔn. Sɛ wɔne atamfo ko na wokunkum ahemfo no a, wɔkyere ahemfie mpanyimfo no de ahemfo no ti sensɛn wɔn kɔn mu.

Archibald Henry Sayce yɛ obi a wasua nea ɛkɔɔ so wɔ tete Asiria ne ne mpɔtam, na ɔma yehu atirimɔdensɛm a na Niniwefo di bere a wɔne atamfo ako no. Ɔkyerɛkyerɛ mu sɛ: “Sɛ wodi nkonim a, baabiara a wobɛfa no, wubehu sɛ wɔatwitwa nnipa ti sum hɔ; ná wɔhyew mmarimaa ne mmeawa animono anaa wɔyɛ wɔn nea ɛkyɛn saa mpo; ná wotumi bɔ mmarima asɛndua mu, anaa wɔworɔw wɔn were, wɔbobɔ wɔn ani, anaa wotwitwa wɔn nsa ne wɔn nan, anaa wotwitwa wɔn asõ ne wɔn hwene.”

Onyankopɔn ka kyerɛɛ Yudafo no sɛ: “Sɛ wusi fie foforo a, gye ban wɔ ɔdan no atifi na obi amfi hɔ anhwe ase, na wo fie anni mogya ho fɔ.” (Deuteronomium 22:8) Ná tete Yudafo taa tena wɔn dan atifi, enti na ɛho hia sɛ wogye ho ban.

Israelfo pii wɔ hɔ a, na wɔn adan atifi yɛ traa. Adan atifi hɔ ara na na wɔtaa tena to awia, gye mframa, anaa wɔtena yɛ fie nnwuma bi. Sɛ edu ahohuru bere a, ɛhɔ ne baabi a wɔda ma wɔn ho tɔ wɔn. (1 Samuel 9:26) Akuafo nso tumi hata wɔn nnɔbae wɔ hɔ ansa na wɔakɔyam; wotumi nso hata borɔdɔma ne bobe aba wɔ hɔ.​—Yosua 2:⁠6.

Ná nokware asomfo ne abosonsomfo nyinaa tumi kɔsom wɔ adan atifi. (Nehemia 8:​16-18; Yeremia 19:13) Bere bi ɔsomafo Petro kɔbɔɔ mpae prɛmtobere wɔ ɔdan atifi. (Asomafo Nnwuma 10:9-16) Ɔdan atifi a bobe anaa abedua nwini atɔ hɔ no, ɛbɛyɛ sɛ na ɛhɔ bɛyɛ anika paa.

Nhoma bi ka sɛ na ntrapoe anaa antweri wowɔ Israelfo afie, na na wɔde foro kɔ adan atifi, nanso na “wɔfa abɔnten na ɛforo kɔ hɔ.” (The Land and the Book) Enti obi betumi afi ɔdan atifi asi fam a onwura fie. Kɔkɔbɔ a Yesu de mae sɛ wonguan mfi kurow a ɛbɛsɛe no mu no, ebia eyi bɛma yɛate ase. Yesu kae sɛ: “Mma nea ɔwɔ ɔdan atifi no nnsi mmma mmmɛfa biribi wɔ ne fie.”​—Mateo 24:17.