Yehowa Nyankopɔn bɔɔ abɔfo koraa ansa na ɔrebɔ nnipa, na wɔyɛ mpempem pii. (Hiob 38:4, 7) Abɔfo yɛ ahonhom, na wɔwɔ tumi paa. Wɔn nyinaa hyɛ Onyankopɔn ase, na ɛtɔ da a, ɔsoma wɔn ma wɔde akwankyerɛ kɔma n’asomfo a wɔwɔ asase so. Ɔtumi ma wɔbɔ wɔn ho ban nso. (Dwom 91:10, 11) Ɛnnɛ, asɛmpa a Yesu akyidifo reka no, abɔfo boa nkurɔfo ma wɔtie na wɔnya so mfaso.—Kenkan Adiyisɛm 14:6, 7.

Ɛnde, ɛyɛ papa sɛ yɛbɛbɔ abɔfo mpae? Dabi. Sɛ wobɔ obi mpae a, na ɛkyerɛ sɛ woresom no. Ɔsom nso de, Onyankopɔn nko ara na ɛsɛ no. (Adiyisɛm 19:10) Abɔfo yɛ Onyankopɔn asomfo, enti nea Onyankopɔn bɛka no, ɛno na wɔtie na ɛnyɛ nea nnipa bɛka. Enti, Onyankopɔn nko ara na ɛsɛ sɛ yɛfa Yesu so bɔ no mpae.—Kenkan Dwom 103:20, 21; Mateo 26:53.

Abɔfo te sɛ nnipa. Sɛnea Onyankopɔn de hokwan ama nnipa sɛ wɔmpaw nea wɔpɛ no, saa ara na abɔfo te. Enti wɔtumi paw sɛ wɔbɛyɛ papa anaa bɔne. Awerɛhosɛm ne sɛ, abɔfo pii tew Onyankopɔn so atua. (2 Petro 2:4) Satan na odii kan tew atua. Akyiri yi, abɔfo afoforo nso dii n’akyi, na wɔbɛyɛɛ adaemone. Ɛnkyɛe pii, wɔtow Satan ne n’adaemone fii soro baa asase so.—Kenkan Adiyisɛm 12:7-9.

Ɛfi afe 1914 reba no, nsɛmmɔnedi ne awudisɛm dɔ ara na ɛredɔɔso. Ɛno kyerɛ sɛ ɛrenkyɛ koraa, Onyankopɔn bɛyi Satan ne n’adaemone afi hɔ. Afei, Onyankopɔn bɛsiesie asase no ama asan afa ne ntama pa afura.—Kenkan Adiyisɛm 12:12; 21:3, 4.