“No reira, te parau atu nei au: Te mau mea atoa ta outou e ani ia pure outou, a tiaturi e ua noaa ia outou, e noaa iho â ïa.”—Mareko 11:24, Huriraa o te ao apî.

 “E teie nei, e faaite hua ˈtu vau ia outou, te mau mea atoa ta outou e ani ia pure ra, a manaˈo ai, e noaa taua mau mea ra, e noaa ïa ia outou.”—Mareko 11:24, Te Bibilia Moˈa ra.

 Na roto i teie mau parau, ua faaite Iesu i ta ˈna mau pǐpǐ te faufaaraa ia faatupu i te faaroo puai a pure ai ratou. Ua haapapu atoa o ˈna e faaroo e e pahono atoa te Atua i ta ratou mau pure. Ia pure te hoê taata ma te aau tae e ia au i to te Atua hinaaro, ua papu ia ˈna e tupu iho â ta ˈna i ani mai te huru ra ua pahono aˈena-hia i te reira.

 Ua haapapu Iesu te faufaaraa ia pure ma te faaroo. Ua faataa o ˈna, ia pure anaˈe te hoê taata “ia ore to ˈna aau e feaa, ia tiaturi râ oia e e tupu iho â ta ˈna parau.” (Mareko 11:23) No te aha? No te mea, ia feaa anaˈe te hoê taata, eiaha o ˈna e “manaˈo e e noaa ia ˈna te tahi mea ia Iehova a ra.”—Iakobo 1:5-8.

 E pure pinepine te hoê taata tei faatupu i te faaroo. (Luka 11:9, 10; Roma 12:12) Te faaite ra ïa oia e ua hinaaro mau te mea ta ˈna e ani ra e ua papu ia ˈna e pahono iho â te Atua i ta ˈna pure. Tera râ, ua ite o ˈna aita te Atua e pahono mai mai ta ˈna e manaˈo ra aore ra i te taime ta ˈna e hinaaro ra.—Ephesia 3:20; Hebera 11:6.

 Tera râ, aita Iesu i parau e noaa i te mau taata tei pure i te Atua te mau mea ta ratou e ani ra. Ua faahiti Iesu teie mau parau i ta ˈna mau pǐpǐ, oia hoi te mau taata tei faatupu i te faaroo. Te tutava nei ratou i te rave i te mea tei maraa ia ratou no te haamori te Atua ra o Iehova. Te parau ra te Bibilia, e faaroo te Atua i te mau pure tei au i to ˈna hinaaro. (Ioane 1, 5:14) Aita oia e faaroo i te pure a te feia te tâuˈa ore i ta ˈna mau ture aveia e te rave i te ohipa ino ma te ore e tatarahapa. (Isaia 1:15; Mika 3:4; Ioane 9:31) No te ite eaha te mau pure ta te Atua e faaroo, a mataitai i teie video poto.

 I te pae hopea o ta ˈna taviniraa i te fenua, ua paraparau Iesu i ta ˈna mau pǐpǐ no nia i te faufaaraa ia faaite i te faaroo i te Atua. No te haapapu i te reira, ua faaohipa oia i te hoê faahohoˈaraa. I to ratou tere i Ierusalema, ua ite atea Iesu i te hoê tumu suke e rauere apî to nia iho. Tera râ, no te mea aita e maa to nia iho, ua faaino Iesu i teie tumu suke. (Mareko 11:12-14) Ua faahohoˈa maitai teie tumu suke i te huru o te nunaa Iseraela i tahito tei parau ra e haamori ratou i te Atua, aita râ. Ua ere râ ratou i te faaroo. (Mataio 21:43) Aita i maoro aˈenei, ua mǎrô te tumu suke. Tera atoa te tupu i nia ia Iseraela no te mea ua erehia ratou i te faaroo.—Mareko 11:19-21.

 Ua papu ia Iesu e nehenehe ta ˈna mau pǐpǐ e faatupu i te faaroo no te faaruru i te mau fifi e no te rave i te mau mea faahiahia. (Mareko 11:22, 23) Ua tano maitai ta Iesu aˈoraa no te mea fatata te faaroo o ta ˈna pǐpǐ i te tamatahia. Oia mau, e pohe Iesu e e uˈana te patoiraa i roto i te taviniraa. (Luka 24:17-20; Ohipa 5:17, 18, 40) I teie atoa mahana, ia tuu te mau pǐpǐ i to ratou tiaturiraa i nia i te Atua e te puai o te pure, e nehenehe ratou e faaruru i te mau fifi.—Iakobo 2:26.

 A mataitai i teie video poto o te faaite mai i te tahi mau tuhaa o te buka Mareko.