Mea rahi te mau irava Bibilia o te faahiti ra i te taime e hoˈi mai te Mesia no te haava i te taata i nia i te fenua. Ei hiˈoraa, te parau ra te Mataio 25:31-33:

 “Ia tae mai te Tamaiti a te taata nei [Iesu Mesia] ma to ˈna hanahana e ma te mau melahi atoa, e parahi oia i nia i to ˈna terono hanahana. E haaputuhia te mau nunaa atoa i mua ia ˈna, e e faataa ê oia ia ratou ei piti pǔpǔ taata, mai te hoê tiai e faataa ê i te mamoe i te puaaniho. E tuu oia i te mamoe i to ˈna rima atau, te puaaniho râ, i to ˈna rima aui.”

 E ravehia teie haavaraa i te roaraa o “te hoê ati rahi” tei ore i itehia aˈenei i nia i te fenua. E hope teie ati rahi i te tamaˈi o Aramagedo. (Mataio 24:21; Apokalupo 16:16) Ua faahohoˈahia te mau enemi a te Mesia i te puaaniho, o ratou “te faautuahia i te haamouraa mure ore.” (Tesalonia 2, 1:9; Apokalupo 19:11, 15) Area râ ta ˈna mau tavini taiva ore faahohoˈahia i te mamoe, e fanaˈo ïa ratou i “te ora mure ore.”—Mataio 25:46.

Afea te Mesia e hoˈi mai ai?

 Ua parau Iesu: “No nia i te reira mahana e te reira hora, aita te hoê i ite.” (Mataio 24:36, 42; 25:13) Tera râ, ua faaite o ˈna e ite-mata-hia te tahi mau tupuraa, “te tapao” ïa e fatata o ˈna i te hoˈiraa mai.—Mataio 24:3, 7-14; Luka 21:10, 11.

E hoˈi mai anei te Mesia ei varua aore ra ei tino iˈo?

 Ua faatiahia mai Iesu ei varua, aita ïa o ˈna e hoˈi mai ei tino iˈo. (Korinetia 1, 15:45; Petero 1, 3:18) No reira Iesu i parau ai i ta ˈna mau aposetolo hau o ˈna i haapohehia ˈi: “E maa taime â e ore teie nei ao e ite faahou mai ia ˈu.”—Ioane 14:19.

Te mau manaˈo hape no nia i te hoˈiraa mai o te Mesia

 Manaˈo hape: Ia parau te Bibilia e ite te mau taata ia Iesu “ia haere mai na nia i te mau ata,” te auraa ïa e ite mata roa tatou ia ˈna.—Mataio 24:30.

 Tupuraa mau: Pinepine te Bibilia e faahiti i te mau ata no te hoê mea eita e nehenehe e ite-mata-roa-hia. (Levitiko 16:2; Numera 11:25; Deuteronomi 33:26) Ei hiˈoraa, ua parau te Atua ia Mose: “Te haere atu nei au ia oe ra na roto i te hoê ata poiri.” (Exodo 19:9) Aita râ Mose i ite mata roa i te Atua. Oia atoa, e taa te mau taata e haere mai te Mesia na nia i te mau ata noa ˈtu râ aita ratou e ite mata roa ia ˈna.

 Manaˈo hape: I roto i te Apokalupo 1:7 te na-ô-hia ra: “E ite te mau mata atoa ia ˈna.” Te manaˈo ra ïa te mau taata e ite mata roa ratou i te Mesia ia hoˈi mai o ˈna.

 Tupuraa mau: I roto i te Bibilia ia faaohipahia te mau taˈo Heleni “mata” e “ite” e ere noa no te parau e ua ite-mata-roa-hia te tahi mea. a I te tahi taime ua faaohipahia teie mau taˈo no te parau e ua taa aore ra ua maramarama tatou no nia i te tahi mau mea. (Mataio 13:15; Luka 19:42; Roma 15:21; Ephesia 1:18) Te parau ra te Bibilia ua faatiahia Iesu e “te parahi ra oia i roto i te maramarama eita e raeahia, aita hoê aˈe taata . . . e nehenehe e hiˈo atu.” (Timoteo 1, 6:16) No reira, ia parau te Bibilia “e ite te mau mata atoa ia ˈna” e taa i te mau taata atoa e o Iesu ta te Atua i maiti no te haava i te mau taata atoa i nia i te fenua.—Mataio 24:30.