Ua poiete te Atua i te tane e te vahine ia taati raua i te pae tino i muri aˈe i to raua faaipoiporaa. (Genese 1:27, 28; Levitiko 18:22; Maseli 5:18, 19) Te opani ra te Bibilia i te peu taotoraa i rotopu i te hoê tane e te hoê vahine i ore i faaipoipo e te peu mahu. (Korinetia 1, 6:18) I roto i teie mau peu, te vai ra te taatiraa i te pae tino, te mirimiriraa i te mero taatiraa o te tahi taata e te taatiraa na roto i te vaha e te tiho.

 Parau mau, te opani ra te Bibilia i te peu mahu, aita râ te Bibilia e farii ra ia hae aore ra ia hamani-ino-hia te mau mahu. Inaha, te faaitoitohia ra te mau Kerisetiano ia “faatura i te mau huru taata atoa.”—Petero 1, 2:17.

Ua fanauhia anei te mau mahu mai tera?

 Aita te Bibilia e faahiti ra e ua fanauhia te taata e te hinaaro e rave i te peu mahu. Ta te Bibilia e parau ra, ua fanauhia tatou ei taata hara. No reira mea puai roa te mau hinaaro tia ore i roto ia tatou. (Roma 7:21-25) Te manaˈo faufaa râ, oia hoi te opani ra te Bibilia i te peu mahu.

Mai te peu tera to tatou huru e nafea ïa tatou i mua i te Atua?

 Te faaitoito ra te Bibilia: “A haapohe i te mau mero o to outou tino no te fenua nei, to roto hoi te mau peu taotoraa tia ore.” (Kolosa 3:5) No te haapohe i te mau hinaaro tia ore o tei turai ia tatou ia hara e tia ia haavî i to tatou feruriraa. E faaî anaˈe ïa i to tatou feruriraa i te mau mea maitatai ia ineine tatou i te patoi i te mau hinaaro tia ore. (Philipi 4:8; Iakobo 1:14, 15) E ere iho â i te mea ohie i te omuaraa e nehenehe râ tatou e upootia. Te fafau ra te Atua e tauturu o ˈna ia tatou ia tamau noa i te faaapî i to tatou “huru feruriraa.”—Ephesia 4:22-24.

 Te aro atoa ra e mirioni taata i to ratou hinaaro e taati i te pae tino no te auraro i te mau ture aveia tia a te Bibilia. Ei hiˈoraa, te vai ra te feia faaipoipo aita faahou to ratou hoa e nehenehe e taati i te pae tino e te feia taa noa. E maiti ïa ratou i te haavî ia ratou iho i mua i te mau faahemaraa. Te oaoa noa ra ratou e e nehenehe atoa te mau mahu e oaoa mai te peu e maiti ratou i te rave i te hinaaro o te Atua.—Deuteronomi 30:19.