E faahapa noa vau ia ˈu: E nehenehe anei te Bibilia e tauturu ia ˈu ia maitai mai?

FAAROO NA ROTO TE REO

Te pahonoraa a te Bibilia

E. E nehenehe te Bibilia e tauturu ia tatou ia rave i tei titauhia no te faaea i te faahapa noa ia tatou. (Salamo 32:1-5) Mai te peu ua rave tatou i te tahi mea tano ore e ua tatarahapa mau â tatou, e faaore iho â te Atua i ta tatou hara e e nehenehe o ˈna e tauturu ia tatou ia maitai mai. (Salamo 86:5) Te faaite ra te Bibilia e mea maitai te manaˈo faahapa i te tahi taime no te mea e turai te reira ia tatou ia faaea i te rave i te tahi mea tano ore e ia patoi roa i te na reira faahou. (Salamo 51:17; Maseli 14:9) Tera râ, te faaara mai ra te Bibilia eiaha tatou e faahapa rahi roa ia tatou a manaˈo atu ai e mea faufaa ore tatou no Iehova. Ia manaˈo tatou mai tera, e nehenehe tatou e “horomii-roa-hia i te oto rahi.”—Korinetia 2, 2:7.

Eaha te tumu e faahapa noa ˈi tatou ia tatou?

Mea rahi tumu e faahapa noa ˈi tatou ia tatou. Ua haamauiui paha tatou i te tahi taata ta tatou e au roa aore ra aita paha tatou i rave i tei titauhia ia tatou. I te tahi taime, e faahapa noa tatou ia tatou aita e tumu. Ei hiˈoraa, ia haamau tatou i te tahi fa aita e naeahia, papu e tupu iho â te manaˈo faahapa i te mau taime iho â râ aita tatou i rave mai ta tatou i manaˈo. No reira te Bibilia e faaitoito mai ai ia tatou ia faaite i te manaˈo tano noa i nia ia tatou iho.—Koheleta 7:16.

E nafea tatou e faaea i te faahapa noa ia tatou?

Eiaha tatou e faahapa noa ia tatou a manaˈo atu ai e mea faufaa ore tatou, e rave râ tatou i tei maraa ia tatou no te faaafaro i te reira. E nafea?

A faˈi i ta outou mau hapa. I roto i te pure, a ani ia Iehova a ia faaore mai i ta outou hapa. (Salamo 38:18; Luka 11:4) E papu ia outou e e faaroo mai Iehova i ta outou pure, ia tatarahapa mau â outou e ia ore e rave faahou i te reira. (Paraleipomeno 2, 33:13; Salamo 34:18) Te ite mai ra Iehova i te rotoraa o te hoê taata, te mea ta te taata e ore e ite. Ia ite Iehova e te tutava ra tatou i te haapae roa i te haerea ino ‘e faaore oia i ta tatou mau hara.’—Ioane 1, 1:9; Maseli 28:13.

Papu, ua haamauiui anaˈe outou i te hoê taata, mea tia ia faˈi e ua hape outou, e ia tatarahapa mau â outou ia ˈna. E ere paha i te mea ohie. E titauhia ia outou i te itoito e te haehaa. Tera râ, e nehenehe te tatarahapa-mau-raa e haamâmâ ia tatou i te hoê manaˈo teimaha e e tauturu ia tatou ia faatupu i te hau e te tahi atu.—Mataio 3:8; 5:23, 24.
A feruri i nia i te mau irava no nia i te aroha hamani maitai o te Atua. Ei hiˈoraa, e hiˈo anaˈe i te Ioane 1, 3:19, 20. Ua taa i te Bibilia e e nehenehe ‘to tatou aau e faahapa noa ia tatou,’ oia hoi, e mea etaeta roa paha tatou i nia ia tatou a manaˈo atu ai e mea faufaa ore tatou no Iehova. Tera râ, te haapapu atoa ra teie irava “e mea rahi aˈe te Atua i to tatou aau.” E nafea ïa? Ua ite oia i te mau mea atoa no nia ia tatou e te taa ra ia ˈna i to tatou huru aau e paruparu. Ua ite atoa oia e no to tatou huru taata tia ore, e nehenehe tatou e rave i te mea ino. b (Salamo 51:5) Aita oia e faarue i te feia o te tatarahapa mau râ.—Salamo 32:5.
Eiaha e haamanaˈo faahou i te mau hape tahito. E rave rahi aamu Bibilia o te faahiti ra i te tahi mau tane e vahine o tei rave i te mea ino, i muri aˈe râ, ua taui ratou i to ratou haerea. Te vai ra te hiˈoraa o Saulo no Tareso o tei matauhia i te pii te aposetolo Paulo. Ei Pharisea, i hamani ino na oia i te mau pǐpǐ a Iesu. (Ohipa 8:3; 9:1, 2, 11) I to ˈna râ iteraa e te patoi ra o ˈna i te Atua e i te Mesia, ua tatarahapa oia, ua taui i to ˈna haerea e ua riro mai oia ei Kerisetiano hiˈoraa maitai. Noa ˈtu ua tatarahapa mau â Paulo i to ˈna haerea, aita râ o ˈna i haamanaˈo faahou i te mau hape tahito ta ˈna i rave. A ite ai i te aroha hamani maitai rahi o Iehova ia ˈna, ua riro Paulo ei taata poro itoito mau e aita i moˈehia ia ˈna te tiaturiraa o te ora mure ore.—Philipi 3:13, 14.

Te mau irava Bibilia no nia i te manaˈo faahapa e te faaoreraa i te hara

Salamo 51:17: “Eita oe e patoi i te hoê aau tatarahapa e te haehaa, e te Atua e.”

Auraa: Ia tatarahapa mau â outou, eita te Atua e patoi ia outou no te hape ta outou i rave. E faaite mai râ oia i te aroha hamani maitai.

Maseli 28:13: “Eita te taata o te tapoˈi i ta ˈna mau hapa e manuïa, e aroha-hamani-maitai-hia râ te feia tei faˈi e tei haapae i ta ratou mau hapa.”

Auraa: Ia faˈi tatou i ta tatou mau hara i mua i te Atua e ia taui tatou i to tatou haerea, e faaore mai oia i ta tatou mau hara.

Ieremia 31:34: “E faaore . . . au i ta ratou hape, e eita vau e haamanaˈo faahou i ta ratou hara.”

Auraa: Ia faaore anaˈe te Atua i ta tatou mau hape, eita o ˈna e haamanaˈo faahou i te reira. E faaite râ oia i te aroha hamani maitai.

a O Iehova te iˈoa o te Atua.—Exodo 6:3.

b I rave ai te taata i te ohipa ino, no te hara ïa ta Adamu i tutuu mai. Ua hara raua Eva ta ˈna vahine i te Atua e ua ere o ˈna i te ora tia roa no ˈna e no to ˈna huaai.—Genese 3:17-19; Roma 5:12.