Aita te Atua e faaroo i te mau pure atoa. No te aha? A hiˈo na e piti tumu.

1. Aita te taata e pure ra ia au i te hinaaro o te Atua

 Aita te Atua e faaroo ia ore te hoê taata e pure ia au i to ˈna hinaaro aore ra ia au i ta ˈna mau faaueraa i roto i te Bibilia. (Ioane 1, 5:14) Ei hiˈoraa, te faaue ra te Bibilia ia haapae tatou i te nounou. O te nounou hoi te tumu o te turai ra i te taata ia hauti i te pere moni. (Korinetia 1, 6:9, 10) No reira, aita te Atua e pahono i ta oe mau pure mai te peu e ani oe ia manuïa ta oe mau hautiraa pere moni. E ere te Atua mai te hoê tavini ra te huru o te auraro nei i ta oe mau aniraa atoa. Auaˈe ra! Ahani aita, e mǎtaˈu ïa oe ia pure vetahi i te Atua no te tahi opuaraa ino.—Iakobo 4:3.

2. Te haa ra te taata ma te ino

 Aita te Atua e faaroo i te pure a te taata o te tamau noa i te rave i te ohipa ino. Ei hiˈoraa, ua parau te Atua i tei parau e tavini ratou na ˈna, e haerea orure hau râ to ratou: “Noa ˈtu mea rahi ta outou pure, eita vau e faaroo. Ua î to outou rima i te toto.” (Isaia 1:15) Tera râ, ahani ratou i faarue i to ratou haerea ino e e haere i mua i te Atua no te “faaafaro” i te reira, ua faaroo ïa te Atua i ta ratou mau pure.—Isaia 1:18.