I muri aˈe i to ˈna bapetizoraahia, ua hoˈi Zarina i Rusia i Asia i ropu e ua faaoti papu oia e faaite i to ˈna faaroo i ta ˈna e piti tamahine. No te mea aita i rahi ta ˈna moni, ua ora oia i roto i te hoê piha nainai e to ˈna nau metua e to ˈna teina e te vahine a to ˈna teina. Ua faaue to ˈna nau metua ia ˈna eiaha e haapii i te parau mau i ta ˈna mau tamarii e ua faaue atoa raua i ta raua mootua tamahine eiaha e haapii i te Bibilia na muri i to raua mama.

 Ua feruri hohonu Zarina e nafea oia e tauturu ai i ta ˈna nau tamahine ia haapii o vai Iehova. (Maseli 1:8) No reira ua taparuparu oia ia Iehova, no te ani i te aratairaa e te paari. I muri iho, ua rave Zarina mai ta ˈna i ani ia Iehova ma te hahaere e ta ˈna nau tamahine e ma te paraparau atu no nia i te poieteraa. Ua tauturu te reira ia raua ia haafaufaa i te Atua poiete.

 I muri iho, ua itehia mai ia Zarina i te tahi ravea no te haapii hau atu â i te Bibilia i ta ˈna nau tamahine ma te faaohipa i te buka Eaha ta te Bibilia e haapii mau ra? a Ua papai oia i te mau paratarafa e te mau uiraa atoa o te buka i nia iho i te mau api parau. Ua tuu atoa o ˈna i te tahi mau faataaraa hau no te tauturu i ta ˈna nau tamahine ia taa ˈtu â. I muri iho ua tuu oia i te reira e te peni tara i raro aˈe i te matini puˈaraa ahu. Ia haere te mau tamahine i te vahi hopuraa pape, e taio raua i te mau paratarafa a papai atu ai i ta raua pahonoraa i raro mai.

 Ma te faaohipa i teie ravea, ua nehenehe Zarina e haapii e piti pene o te buka Haapii mai e ta ˈna nau tamahine hou a haere ai ratou i te tahi atu nohoraa. I ǒ, aita e haafifiraa no ˈna no te haapii i ta ˈna nau tamahine. I Atopa 2016, ua bapetizohia na e piti tamahine, e ua oaoa to raua mama i te faaohiparaa i te paari no te tauturu ia raua i te pae varua.